រាជធានីភ្នំពេញ ៖ អង្គការសង្គមស៊ីវិលចំនួន១២អង្គភាព បានចេញសេចក្តីថ្លែងការណ៍រួមមួយមានចំនួន៥ចំណុចដាក់ជូនដល់ក្រុមការងារបច្ចេកទេសរបស់គណបក្សប្រជាជនកម្ពុជានិងគណបក្សសង្គ្រោះជាតិសម្រាប់យកទៅពិចារណា និងចរចាគ្នានាថ្ងៃទី៣ មីនា នៅវិមានព្រឹទ្ធសភា ។
រាជធានីភ្នំពេញ ៖ អង្គការសង្គមស៊ីវិលចំនួន១២អង្គភាព បានចេញសេចក្តីថ្លែងការណ៍រួមមួយមានចំនួន៥ចំណុចដាក់ជូនដល់ក្រុមការងារបច្ចេកទេសរបស់គណបក្សប្រជាជនកម្ពុជានិងគណបក្សសង្គ្រោះជាតិសម្រាប់យកទៅពិចារណា និងចរចាគ្នានាថ្ងៃទី៣ មីនា នៅវិមានព្រឹទ្ធសភា ។
សេចក្តីថ្លៃងការណ៍រួមចុះផ្សាយនៅថ្ងៃទី១ មីនា បានអបអរសេចក្តីប្រកាសរួមនៃក្រុមការងារគណបក្សនយោបាយទំាងពីរ កាលពីថ្ងៃទី១៨ កុម្ភៈ ឆ្នាំ២០១៤ និងការគ្រោងជួបគ្នាជាថ្មីនៃក្រុមបច្ចេកទេសទាំងពីរនាថ្ងៃទី៣ មីនា ។
សេចថ្លែងការណ៍បានផ្តល់អនុសាសន៍ចំនួន៥ចំណុចដល់កិច្ចប្រជុំក្រុមបច្ចេកទេសគណបក្សនយោបាយទំាង២ក្នុងនោះមាន ៖
ទី១‑សមាសភាពនៃគណៈកម្មការចម្រុះកំណែទម្រង់ការបោះឆ្នោតគួរមានសមាជិកជាស្ត្រីមកពីគណបក្សនយោបាយទំាងពីរ ។
ទី២‑ដំណើរការនៃគណៈកម្មការចម្រុះកំណែទម្រង់ការបោះឆ្នោតនេះ ត្រូវតែមានការបើកចំហ និងការផ្តល់ព័ត៌មានជូនសាធារណជន ។
ទី៣‑នីតិវិធីនៃការធ្វើការរបស់គណៈកម្មការត្រូវធានាឲ្យមានការស្រុះស្រួលគ្នាជាឯកច្ឆន្ទ និងភាពរលូននៃដំណើរការ។
ទី៤‑គណៈកម្មការនេះ ត្រូវសម្រេចឲ្យបាននូវបញ្ជីផលដែលបានរំពឹងទុកនៃកំណែទម្រង់ការបោះឆ្នោត (មានជាអាទិ៍ គណៈកម្មាធិការជាតិរៀបចំការបោះឆ្នោត ការចុះឈ្មោះបោះឆ្នោត បញ្ជីឈ្មោះបោះឆ្នោត ប្រព័ន្ធផ្សព្វផ្សាយ យន្តការដោះស្រាយទំនាស់ការបោះឆ្នោត និងការលើកស្ទួយស្រ្តី និងយុវជនតំណាងជាប់ឆ្នោត…) និងបង្កើតផែនការសម្រាប់ការអនុវត្តកំណែទម្រង់ការបោះឆ្នោតដែលព្រមព្រៀងគ្នាឲ្យបានច្បាស់លាស់នៅដំណាច់ឆ្នំា២០១៤ ។
ទី៥‑ការអនុវត្តផែនការកំណែទម្រង់ការបោះឆ្នោតនេះ គួរធានាឲ្យមានការរៀបចំការបោះឆ្នោតឡើងវិញមុនអាណត្តិមុនដំណាច់ឆ្នាំ២០១៥ ។
ទាក់ទងនឹងសំណើរបស់សង្គមស៊ីវិលចំពោះគណបក្សនយោបាយនេះ លោកយ៉ែម បុញ្ញឫទ្ធិ អ្នកនាំពាក្យគណបក្សសង្គ្រោះជាតិ និងជាសមាជិកមួយរូបនៃក្រុមបច្ចេកទេសបានប្រាប់កោះសន្តិភាពនារសៀលថ្ងៃទី២ មីនា តាមទូរស័ព្ទថា ក្នុងនាមគណបក្សសង្គ្រោះជាតិ សូមស្វាគមន៍ចំពោះការស្នើសុំ និងអនុសាសន៍របស់សង្គមស៊ីវិលជាតិ និងអន្តរជាតិ ។ ចំពោះការស្នើសុំថា គណៈកម្មការចម្រុះមានសមាសភាពជាស្ត្រីនោះ គណបក្សសង្គ្រោះជាតិ នឹងព្យាយាមរកសមាសភាពជាស្ត្រីឲ្យចូលរួមបាន ប៉ុន្តែបញ្ហានយោបាយ គេមិនគិតពីស្ត្រី ឬបុរសនោះទេ គឺគេនិយាយពីគោលការណ៍អ្វីដែលគណបក្សនយោបាយនីមួយៗចង់បាន ដូច្នេះយើងស្វាគមន៍ ។
លោកយ៉ែម បុញ្ញាឫទ្ធិ បញ្ជាក់ថា ចំពោះសំណើថាឲ្យមានការបោះឆ្នោតមុនអាណត្តិនោះគណបក្សសង្គ្រោះជាតិបានគិតគូរ រួចហើយ ហើយចំពោះសំណើនេះគណបក្សសង្គ្រោះជាតិ នឹងពិនិត្យយកទៅពិចារណាទៀត ។ ការស្នើសុំឲ្យមានការបោះឆ្នោតមុនអាណត្តិនេះជាចំណុចមួយល្អព្រោះថាដើម្បីដោះស្រាយបញ្ហាជាប់គំាងនយោបាយសព្វថ្ងៃនេះ ។ ក្រុមការងារបច្ចេកទេសនិងពិភាក្សាគ្នា ហើយនិងកំណត់យកចំណុចកណ្តាលមួយក្នុងការឈានដល់បោះឆ្នោតមុនអាណត្តិ។
លោកយ៉ែម បុញ្ញឫទ្ធិ បញ្ជាក់ទៀតថា ដើម្បីដោះស្រាយបញ្ហានយោបាយនោះ គឺត្រូវគិតពីប្រយោជន៍ជាតិជាធំ ហើយយើងសង្ឃឹមថានឹងដោះស្រាយបញ្ហាទំាងនេះបាន យើងចង់ធ្វើការដោះស្រាយឲ្យបានឆាប់ ។ ការលើកឡើងរបស់សហគមន៍ស៊ីវិលថាចង់ឲ្យមានសាធារណជនចូលរួមឲ្យបានទូលាយគឺជាការល្អ ព្រោះយើងឲ្យប្រជាពលរដ្ឋបានដឹងឮ ប៉ុន្តែពេលខ្លះវាមិនអាចឲ្យសាធារណជនចូលរួមបានទេ ព្រោះវាជារឿងបច្ចេកទេស ។ ទោះជាយ៉ាងណាក្តីខ្ញុំសង្ឃឹមថា ពេលក្រោយមកយើងនឹងបើកឲ្យប្រជាពលរដ្ឋបានចូលរួមទូលាយពីការជជែកគ្នានោះ ។
យ៉ាងណាក៏ដោយ ការជួបចរចាគ្នារវាងក្រុមបច្ចេកទេសគណបក្សសង្គ្រោះជាតិ និងគណបក្សប្រជាជននេះ ភាគីគណបក្សប្រជាជនកម្ពុជាធ្លាប់បានលើកឡើងថាជាការចរចាដោះស្រាយតែបញ្ហាកែទម្រង់ការបោះឆ្នោតនៅថ្ងៃខាងមុខ ប៉ុណ្ណោះ ចំណែកការជាប់គំាងនយោបាយនោះមិនមានទេ ព្រោះថាស្ថាប័នរបស់រដ្ឋទំាងអស់កំពុងតែដំណើរការជាធម្មតា ប្រសិនបើជាប់គំាងនយោបាយ ស្ថាប័នរដ្ឋមិនដំណើរការទេ ។
ចំពោះបញ្ហាថាជាប់គាំងនយោបាយនេះ ខាងគណបក្សសង្គ្រោះជាតិតែងតែលើកឡើងជារៀងរហូត និងថារដ្ឋាភិបាលដែលកំពុងដឹកនំាសព្វថ្ងៃនេះកំពុងតែស្ថិតក្នុងការដាក់គំនាបពីម្ចាស់ជំនួយអន្តរជាតិ ។
លោកជាម យៀប ប្រធានគណៈកម្មការហិរញ្ញវត្ថុ ធនាគារ សវនកម្មនៃរដ្ឋសភា និងជាសមាជិករបស់ក្រុមបច្ចេកទេសខាងគណបក្សប្រជាជនកម្ពុជាមិនអាចសុំការបកស្រាយបានទេ នៅថ្ងៃជាមួយគ្នានោះ ដោយសារទូរស័ព្ទចូលគ្មានអ្នកលើក ៕
ចែករំលែកព័តមាននេះ