តាមប្រភពព័ត៌មាន Khaleej Times បានឱ្យដឹងថា កីឡាករជើងខ្លាំង Cristiano Ronaldo បានបង្ហាញតម្រុយថារូបគេអាចនឹងចូលនិវត្តន៍នៅឆ្នាំក្រោយ ។ កីឡាករព័រទុយហ្កាល់របស់ក្លិបសេះបង្កង់រូបនេះមានអាយុ៣៤ឆ្នាំហើយ ។
Ronaldo បានប្រាប់ទៅកាន់សារព័ត៌មាន TVI ថា៖ «ខ្ញុំមិនគិតពីគម្រោងនៃការចូលនិវត្តន៍ទេ ។ ប្រហែលជាខ្ញុំនឹងបញ្ចប់អាជីពរបស់ខ្ញុំនៅឆ្នាំក្រោយ តែខ្ញុំក៏អាចនឹងនៅលេងរហូតដល់អាយុ៤០ឬ៤១ឆ្នាំដែរ ។ ខ្ញុំមិនដឹងទេ ។ អ្វីដែលខ្ញុំតែងនិយាយគឺថា ខ្ញុំត្រូវរីករាយអ្វីដែលមាននៅពេលនេះ»។
កីឡាករដែលបានបំបែកកំណត់ត្រាជាច្រើនរូបនេះបានលើកឡើងថា មានកីឡាករតិចណាស់ដែលអាចធ្វើបែបនេះដូចរូបគេ ។ គេបានសួរទៅអ្នកសម្ភាសន៍ថា ៖«តើមានកីឡាករណាដែលមានកំណត់ត្រាច្រើនជាងខ្ញុំ ។ ខ្ញុំមិនគិតថា មានកីឡាករណាមានកំណត់ត្រាច្រើនជាងខ្ញុំទេ»។
គួរបញ្ជាក់ផងដែរថា Ronaldo បានជួយក្លិបសេះបង្កង់ Juventus ឱ្យឈ្នះពាន Serie A កាលពីរដូវកាលមុន ដោយរកគ្រាប់បាល់ជូនក្លិប២៨គ្រាប់ ក្នុងការប្រកួត៤៣ដង ។ ខ្សែប្រយុទ្ធរូបនេះ កំពុងតែកាន់កំណត់ត្រាស្មើគ្នាជាមួយនឹង Messi ត្រង់ថា មានពាន Ballon d’Or ចំនួន៥ដូចគ្នា ដែលរកបាន៤នៅ Real Madrid និង ១ នៅ Manchester United ៕
ប្រភព ៖ khaleejtimes , កែសម្រួលដោយ ៖ សំណាង
ចែករំលែកព័តមាននេះ