ប្រធានាធិបតីរុស្ស៊ី លោកវ៉្លាឌីមៀរពូទីន កាលពីថ្ងៃទី១ មីនា បានទទួលការអនុញ្ញាតពីសភា និងព្រឹទ្ធសភារុស្ស៊ី ដែលយល់ព្រមតាមសំណើលោកបញ្ជូនកងទ័ពទៅកាន់អ៊ុយក្រែន ខណៈពួកជនប្រដាប់អាវុធបានដណ្តើមកាន់កា.ប់ឧបទ្វីបគ្រីមេ និងខណៈបាតុកម្មហិ.ង្សានានាមានការកើននៅភាគខាងកើតប្រទេស ។
ប្រធានាធិបតីរុស្ស៊ី លោកវ៉្លាឌីមៀរពូទីន កាលពីថ្ងៃទី១ មីនា បានទទួលការអនុញ្ញាតពីសភា និងព្រឹទ្ធសភារុស្ស៊ី ដែលយល់ព្រមតាមសំណើលោកបញ្ជូនកងទ័ពទៅកាន់អ៊ុយក្រែន ខណៈពួកជនប្រដាប់អាវុធបានដណ្តើមកាន់កាប់ឧបទ្វីបគ្រីមេ និងខណៈបាតុកម្មហិង្សានានាមានការកើននៅភាគខាងកើតប្រទេស ។
ដោយប្រកាសពីសិទ្ធិធ្វើអន្តរាគមន៍ដោយយោធាក្នុងអតីតសាធារណរដ្ឋសូវៀតនោះ ដែលក្រុងមូស្គូចាត់ទុកថា ជាតំបន់ស្ថិតក្រោមឥទ្ធិពលរបស់ខ្លួននោះ លោកពូទីន បានបង្ហាញចំពោះពួកលោកខាងលិចពីកណ្តាប់ដៃដែកមួយពុំធ្លាប់មានចាប់តាំងពីសង្គ្រាមត្រជាក់មក ។
ការសម្រេចចិត្តនេះធ្វើឡើងបន្ទាប់ពីរយៈពេលជាច្រើនថ្ងៃដែលសហរដ្ឋអាមេរិកតាមរយៈសម្តីលោកបារ៉ាក់ អូបាម៉ា និងបណ្តាប្រទេសអឺរ៉ុបព្រមានក្រុងមូស្គូប្រឆាំងនឹងការប៉ុនប៉ងធ្វើអន្តរាគមន៍យោធាមួយមក ។
ភ្លាមៗលោកពូទីន ទទួលបានការគាំទ្រពីក្រុមប្រឹក្សាសហព័ន្ធ (ព្រឹទ្ធសភារុស្ស៊ី) ដែលអនុញ្ញាតឱ្យប្រើកម្លាំងទ័ពនៅក្នុងដែនដីអ៊ុយក្រែន ដើម្បីការពារសន្តិសុខជនជាតិរុស្ស៊ីរស់នៅទីនោះ ។ នេះក៏ជាមូលហេតុដែលរុស្ស៊ីធ្លាប់លើកឡើងពេលធ្វើអន្តរាគមន៍យោធានៅហ្ស៊កហ្ស៊ីកាលពីឆ្នាំ២០០៨ ដែរ ។
លោកពូទីន លើកហេតុផលពីសំណើប្រើកងទ័ពដោយសារសភាពការណ៍វិសាមញ្ញនៅអ៊ុយក្រែន ការគំរាមកំហែងដល់អាយុជីវិតពលរដ្ឋសហព័ន្ធរុស្ស៊ី ព្រមទាំងដើម្បីការពារកងកម្លាំងនាវាចរណ៍រុស្ស៊ីដែលមានមូលដ្ឋាននៅតំបន់គ្រីមេផងដែរ ។ ព្រឹទ្ធសភារុស្ស៊ីដែលអនុញ្ញាតឱ្យប្រើកម្លាំងនោះគ្រោងថា កងទ័ពនឹងអាចប្រើប្រាស់រហូតដល់សភាពការណ៍សង្គម-នយោបាយនៅអ៊ុយក្រែនវិលមកមានប្រក្រតីភាពឡើងវិញ ។
លោកពូទីន ដែលពេលនេះមានមធ្យោបាយយោធាដើម្បីដោះស្រាយសភាពការណ៍ បើយោងតាមអ្នកនាំពាក្យលោកថា នៅពុំទាន់ធ្វើការសម្រេចចិត្តទាក់ទិននឹងការដាក់ពង្រាយកងទ័ពនៅអ៊ុយក្រែននៅឡើយ ។ ច្បាស់ណាស់ថា កងទ័ពរុស្ស៊ីបានឈរជើងនៅតំបន់គ្រីមេ ជាដែនដីនៅភាគខាងត្បូងអុ៊យក្រែនរួចហើយដោយនៅតំបន់គ្រីមេនោះ រុស្ស៊ីមានមូលដ្ឋាននាវាចរណ៍នៅក្រុងសេបាស្ត្រូប៉ូល គឺជាកងនាវាចរណ៍សមុទ្រខាងជើង ។ សម្រាប់ពេលនេះការឈរជើងកាន់កាប់នោះធ្វើឡើងដោយពុំទាន់មានការបង្ហូរឈាមនៅឡើយ ព្រោះរដ្ឋាភិបាលថ្មីក្រុងគៀវហាក់ពុំមានសមត្ថភាពបញ្ចេញប្រតិកម្មតបតបាន ។
ការប៉ះទង្គិចគ្នានានាកើតមាននៅភាគខាងកើត និងភាគខាងត្បូងអុ៊យក្រែន ដែលនៅទីនោះមានសហគមន៍រុស្ស៊ីភាគច្រើន ។ ការប៉ះទង្គិចគ្នាកើតមានរវាងពួកអ្នកគាំទ្រប្រធានាធិបតីត្រូវផ្តួលរំលំលោកវិកទ័រ អុីយ៉ានូកូវីត និងពួកអ្នកការពាររដ្ឋអំណាចថ្មីនៅក្រុងគៀវ ។ នៅខាគៀវ មនុស្សជាច្រើននាក់ត្រូវរបួសពេលពួកសកម្មជនស្និទ្ធរុស្ស៊ី បានលុកចូលកាន់កាប់បណ្តាអគាររដ្ឋាភិបាល តំបន់ ហើយប៉ះគ្នាជាមួយពួកអ្នកគាំទ្រអាជ្ញាធរបណ្តោះអាសន្ន ។ ពេលរាត្រីកាលមកដល់ ពួកបាតុករបាននាំគ្នាទម្លាក់ទង់ជាតិអ៊ុយក្រែនចេញពីអគាររដ្ឋទាំងឡាយ ហើយដាក់ជំនួសវិញដោយទង់ជាតិរុស្ស៊ីនៅតំបន់ខាគៀវ DONETSK អូដេសា និង DNIPROPETROVSK ។ នៅ DONETSK ជាតំបន់កំណើតរបស់លោកអីុយ៉ានូកូវីត បណ្តាសមាជិកសភាមូលដ្ឋាននិយាយថា ពុំទទួលស្គាល់ភាពស្របច្បាប់របស់រដ្ឋអំណាចកណ្តាលថ្មី ហើយអំពាវនាវឱ្យមានការបោះប្រជាមតិមួយស្តីពីអនាគតតំបន់នោះ ។
ប្រធានសភារុស្ស៊ីបានព្រមានបណ្តាមេដឹកនាំអ៊ុយក្រែនថា រុស្ស៊ីនឹងឆ្លើយតបដោយយោធា ប្រសិនបើកម្លាំងត្រូវបានប្រើប្រឆាំងពួកបាតុករដោយសន្តិវិធីនៅភាគខាងកើត និងភាគខាងត្បូងប្រទេស ។
ប្រធានាធិបតីស្តីទីអ៊ុយក្រែន លោកអូឡេកសាន់ឌ័រតួកឈីណូវ ដែលកោះប្រជុំបណ្តាប្រមុខភ្នាក់ងារសន្តិសុខយល់ថា ក្រុងមូស្គូបុ៉នប៉ងបង្កអស្ថេរភាពទាំងស្រុងនៅអ៊ុយក្រែន ។ ចំណែកអតីតមេខ្លោងបាតុកម្មប្រឆាំង លោកវិតាលី គ្លីតស្តូ អំពាវនាវឱ្យមានការកេណ្ឌប្រមូលកម្លាំងជាទូទៅមួយ ។ ម៉្យាងទៀត ក្រុងគៀវចាត់ទុកថា ខុសច្បាប់ការតែងតាំងលោកស័រហ្គេយ អាក់ស៊ីយ៉ូណូវ ជាឥស្សរជនស្និទ្ធរុស្ស៊ីម្នាក់ជានាយករដ្ឋមន្ត្រីគ្រីមេ។
លោកអាក់ស៊ីយ៉ូណូវ បានស្នើដល់លោកពូទីន ឱ្យជួយលោកធានាសន្តិភាព និងភាពស្ងប់ស្ងាត់នៅឯព្រលានយន្តហោះអន្តរជាតិក្រុងស៊ីមហ្វេ រ៉ូប៉ូល រដ្ឋធានីគ្រីមេ ប្រកាសបិទដែនអាកាសតំបន់ ហើយផ្អាកបណ្តោះអាសន្នរាល់ការហោះហើរចេញចូលទីក្រុងនោះ ។
ពុំមានការសង្ស័យឡើយដែលនៅតាមចំណុចសំខាន់ៗ ពិសេសនៅរដ្ឋធានីស៊ីមហ្វេ រ៉ូបូល ត្រូវត្រួតត្រាដោយកងទ័ពរុស្ស៊ី ពិសេសកងទាហានឆត្រយោង ។ ទាហានរុស្ស៊ីជាង៦.០០០នាក់ត្រួតត្រាតំបន់នោះដែលកាត់ផ្តាច់ពីផ្នែកឯទៀតៗរបស់ប្រទេស ។
អ៊ុយក្រែនប្រកាសកាលពីយប់ថ្ងៃទី១ មីនា ដាក់កងទ័ពរបស់ខ្លួនឱ្យស្ថិតក្នុងស្ថានភាពប្រកាសអាសន្នពេញបន្ទុក ហើយត្រៀមប្រយុទ្ធ ហើយបញ្ជាក់ថា អន្តរាគមន៍យោធារបស់រុស្ស៊ីលើដែនដីរបស់ខ្លួន នឹងនាំទៅរកសង្គ្រាមមួយ ។
បន្ទាប់ពីប្រជុំរយៈពេល៣ម៉ោងជាមួយបណ្តាប្រមុខភ្នាក់ងារសន្តិសុខមក ប្រធានាធិបតីស្តីទីអ៊ុយក្រែនលោកតួកឈីណូវ អះអាងថា អន្តរាគមន៍យោធារុស្ស៊ី គឺជាការឈ្លានពានមួយប្រឆាំងប្រទេសលោក ចំណែកនាយករដ្ឋមន្ត្រីថ្មីអ៊ុយក្រែនវិញគូសបញ្ជាក់ថា លោកបានស្នើឱ្យកងទាហានរុស្ស៊ីវិលត្រឡប់ចូលបន្ទាយពួកគេវិញ ពេលលោកទាក់ទងតាមទូរស័ព្ទជាមួយសមភាគីរុស្ស៊ីលោកឌ្រីមីទ្រី ម៉េដវេដេវ ។ នាយករដ្ឋមន្ត្រីរូបនោះលោកអាសឺនី អីុយ៉ាតសឺនីអ៊ុក គូសបញ្ជាក់ថា អន្តរាគមន៍យោធាមួយនឹងកំណត់ពីការចាប់ផ្តើមសង្គ្រាម និងបញ្ចប់ទំនាក់ទំនងរវាងអ៊ុយក្រែន និងរុស្ស៊ី ៕
ចែករំលែកព័តមាននេះ