ទីក្រុងបាងកក ៖ ច្បាប់គ្រប់គ្រងការទទួលទានគ្រឿងស្រវឹងថ្មីរបស់ប្រទេសថៃ ទទួលរងការរិះគន់ និងបង្កឱ្យមានប្រតិកម្មខ្លាំងៗពីបណ្តាអ្នកទេសចរ និងប្រតិបត្តិករនៅក្នុងវិស័យទេសចរណ៍ផ្ទាល់ ជាមួយការលើកឡើងថា ច្បាប់ថ្មីនេះ នឹងគំរាមកំហែងដល់អាជីវកម្មនៅពេលយប់របស់ប្រទេស។ នេះបើតាមប្រភពពីសារព័ត៌មាន…
ទីក្រុងបាងកក ៖ ច្បាប់គ្រប់គ្រងការទទួលទានគ្រឿងស្រវឹងថ្មីរបស់ប្រទេសថៃ ទទួលរងការរិះគន់ និងបង្កឱ្យមានប្រតិកម្មខ្លាំងៗពីបណ្តាអ្នកទេសចរ និងប្រតិបត្តិករនៅក្នុងវិស័យទេសចរណ៍ផ្ទាល់ ជាមួយការលើកឡើងថា ច្បាប់ថ្មីនេះ នឹងគំរាមកំហែងដល់អាជីវកម្មនៅពេលយប់របស់ប្រទេស។ នេះបើតាមប្រភពពីសារព័ត៌មាន VnExpress ចេញផ្សាយនៅថ្ងៃទី១៤ ខែវិច្ឆិកា ឆ្នាំ២០២៥។
ច្បាប់គ្រប់គ្រងគ្រឿងស្រវឹងថ្មី ដែលបានចូលជាធរមាននៅថ្ងៃទី៨ ខែវិច្ឆិកា ឆ្នាំ២០២៥ ដោយហាមឃាត់ការទទួលទានគ្រឿងស្រវឹងចន្លោះពីពាក់កណ្តាលអធ្រាត្រ ដល់ម៉ោង ១១ព្រឹក និងចាប់ពីម៉ោង ២ រសៀល ដល់ម៉ោង ៥ ល្ងាច។ អ្នកល្មើសនឹងរងការផាកពិន័យជាទឹកប្រាក់ចំនួន ១០ ០០០ បាត ឬ ៣០០ ដុល្លារអាមេរិក។
បើយោងតាមការចុះផ្សាយពីកាសែតបាងកកប៉ុស្តិ៍បានឱ្យដឹងថា ក្រោយការប្រកាសច្បាប់ថ្មីនេះ បណ្តាអ្នកទេសចរបរទេសបាននាំគ្នាចូលទៅកាន់បណ្តាញសង្គមជាមួយការរិះគន់ច្បាប់ថ្មីនេះថា មិនសមហេតុផល និងរឹតត្បិតខ្លាំងពេក។ អ្នកខ្លះលើកឡើងថា ពួកគេនឹងជៀសវាងទៅកម្សាន្តប្រទេសថៃ ហើយជំនួសវិញ ទៅកាន់ប្រទេសផ្សេងទៀតនៅក្បែរនោះ ដែលមានច្បាប់គ្រប់គ្រងគ្រឿងស្រវឹងធូរស្រាលជាងនេះ។
ម្ចាស់គណនីម្នាក់បានបញ្ចេញមតិថា ប្រទេសថៃនិយាយថា ខ្លួនត្រូវការអ្នកទេសចរបន្ថែមទៀត ប៉ុន្តែគោលនយោបាយថ្មីនេះ នឹងមានផលប៉ះពាល់ផ្ទុយពីនេះ វាផ្តល់ឱ្យអ្នកទេសចរនូវហេតុផលជាច្រើន ដើម្បីជ្រើសរើសប្រទេសអាស៊ីអាគ្នេយ៍ផ្សេងទៀត។ មតិមួយទៀតបានលើកឡើងថា នៅពេលអ្នកទេសចរដឹងថា ពួកគេមិនអាចផឹកស្រាបៀរត្រជាក់ៗ លើឆ្នេរនៅពេលថ្ងៃក្តៅបំផុតបានទេ ពួកគេនឹងមិនគិតពីប្រទេសថៃឡើយ។ មតិមួយទៀតក៏បានលើកឡើងដែរថា អ្នកទេសចរកំពុងសម្រុកទៅប្រទេសវៀតណាមរួចទៅហើយ។
ច្បាប់ថ្មីនេះកើតឡើង នៅពេលដែលប្រទេសថៃ ដែលសេដ្ឋកិច្ចពឹងផ្អែកយ៉ាងខ្លាំងទៅលើវិស័យទេសចរណ៍នោះ មើលឃើញការធ្លាក់ចុះចំនួនភ្ញៀងទេសចរ ដោយប្រទេសនេះបានស្វាគមន៍ភ្ញៀវទេសចរបរទេសបានត្រឹម ២៦.២ លាននាក់នៅឆ្នាំនេះ ដែលជាការធ្លាក់ចុះ ៧,២៥% បើធៀបនឹងឆ្នាំមុន។ នេះបើតាមរបាយការណ៍ពីទីភ្នាក់ងារសារព័ត៌មាន Reuters។
អ្នកជំនាញនៅក្នុងឧស្សាហកម្មទេសចរណ៍បានព្រមានថា គោលនយោបាយនេះ អាចធ្វើឱ្យការធ្លាក់ចុះភ្ញៀវទេសចរកាន់តែធ្ងន់ធ្ងរឡើង ថែមទាំងជំរុញឱ្យវិស័យទេសចរណ៍ធ្លាក់ដល់គែមនៃវិបត្តិទៀតផង។ តាមប្រភពពីកាសែតថៃ The Nation បានឱ្យដឹងថា លោក Sorathep Rojpotjanaruch ប្រធានសមាគមអាជីវកម្មភោជនីយដ្ឋានថៃ ក៏បានរិះគន់ច្បាប់ថ្មីនេះផងដែរ ដោយលើកឡើងថា វាមិនច្បាស់ថាច្បាប់នេះមានគោលបំណងអ្វីនោះទេ។ អ្នកដែលបានចុះហត្ថលេខាលើវាប្រហែលជាមិនដឹងថាវានឹងបង្កការខូចខាតប៉ុន្មានដល់សេដ្ឋកិច្ចទេសចរណ៍ និងសេវាកម្មរបស់ប្រទេសនោះទេ។
លោក Sanga Ruangwattanakul ប្រធានសមាគមអាជីវកម្មផ្លូវខាវសាន (Khaosan) នៃទីក្រុងបាងកក បានព្រមានថា បទប្បញ្ញត្តិមិនច្បាស់លាស់របស់ច្បាប់នេះ អាចរារាំងភ្ញៀវទេសចរក្នុងរដូវទេសចរណ៍ទាក់ទាញខ្លាំងនៅខាងមុខនេះ។
ក្រៅពីនោះ បណ្តាអ្នកជំនាញក្នុងវិស័យទេសចរណ៍ថៃ ក៏បានបញ្ចេញប្រតិកម្មថា គោលនយោបាយថ្មីនេះ ប្រឈមនឹងការធ្វើឱ្យខូចខាតដល់ការប្រកួតប្រជែងផ្នែកទេសចរណ៍របស់ប្រទេសថៃ ជាពិសេសនៅក្នុងតំបន់កម្សាន្តពេលរាត្រី និងក្នុងចំណោមភ្ញៀវទេសចរអឺរ៉ុប ដែលជាធម្មតានិយមផឹកស្រារហូតដល់យប់ជ្រៅ។
ប្រទេសជាច្រើនបានចេញសេចក្តីណែនាំអំពីការធ្វើដំណើរទៅកាន់ប្រទេសថៃរួចហើយ ដោយព្រមានពលរដ្ឋពួកគេអំពីការពិន័យជាប្រាក់ចំនួន ១០ ០០០ បាត ចំពោះការផឹកស្រា បន្ទាប់ពីពាក់កណ្តាលអធ្រាត្រ។ សមាគមភោជនីយដ្ឋាន និងក្លិបរាត្រីរបស់ថៃបានជួបប្រជុំគ្នា កាលពីថ្ងៃទី១២ ខែវិច្ឆិកា កន្លងទៅ ដើម្បីដាក់ញត្តិទៅកាន់នាយករដ្ឋមន្ត្រីថៃ លោក អានុទីន ឆានវីរៈគុល (Anutin Charnvirakul) ដើម្បីស្នើសុំការកែប្រែច្បាប់ថ្មីនេះ។
ជាមួយគ្នានោះ បណ្តាថ្នាក់ដឹកនាំធុរកិច្ចបានបញ្ជាក់ថា ច្បាប់ច្បាស់លាស់ និងការធ្វើវិសោធនកម្មណាមួយ គឺត្រូវការជាចាំបាច់ ដើម្បីការពារទីកន្លែងដែលមានអាជ្ញាប័ណ្ណ និងរក្សាភាពប្រកួតប្រជែងរបស់ប្រទេសថៃក្នុងវិស័យទេសចរណ៍ និងក្លិបកម្សាន្តរាត្រី៕
ចែករំលែកព័តមាននេះ