Post Views: 1 ខេត្តកំពង់ឆ្នាំង ៖ សិប្បកម្មកែច្នៃលៀសមួយកន្លែង ដែលមានទីតាំងនៅភូមិព្រៃលាក់នាង ឃុំជ្រៃបាក់ ស្រុករលាប្អៀរ ត្រូវបានសមត្ថកិច្ចចម្រុះចុះបិទផ្អាកមិនឲ្យដំណើរការ…
ខេត្តកំពង់ឆ្នាំង ៖ សិប្បកម្មកែច្នៃលៀសមួយកន្លែង ដែលមានទីតាំងនៅភូមិព្រៃលាក់នាង ឃុំជ្រៃបាក់ ស្រុករលាប្អៀរ ត្រូវបានសមត្ថកិច្ចចម្រុះចុះបិទផ្អាកមិនឲ្យដំណើរការ ដោយសារតែគ្មានច្បាប់អនុញ្ញាតពីមន្ត្រីជំនាញ ។
កិច្ចប្រតិបត្តិការបង្ក្រាបនេះ បានធ្វើឡើងនៅថ្ងៃទី៥ ខែធ្នូ ឆ្នាំ ២០២៥ ដែលដឹកនាំដោយលោកស្រី ស្រ៊ីម ស៊ាងភាជ ព្រះរាជអាជ្ញារង អមសាលាដំបូងខេត្តកំពង់ឆ្នាំង ដោយមានការចូលរួមពីអធិការដ្ឋានខាងត្បូងបឹងទន្លេសាប ខណ្ឌរដ្ឋបាលជលផលកំពង់ឆ្នាំង នគរបាលប្រឆាំងបទល្មើសសេដ្ឋកិច្ចនៃស្នងការដ្ឋាននគរបាលខេត្ត ព្រមទាំងកម្លាំងអធិការដ្ឋាននគរបាលស្រុករលាប្អៀរ សរុបចំនួន១៩នាក់ ។
តាមការបញ្ជាក់ពីមន្ត្រីខណ្ឌរដ្ឋបាលជលផលនៃមន្ទីរកសិកម្មរុក្ខាប្រមាញ់ និងនេសាទខេត្តកំពង់ឆ្នាំងបានឲ្យដឹងថា ទីតាំងសហគ្រាសខាងលើ មានឈ្មោះ ជេវ៉ាង អេហ្គ្រីខលឆីរ័ល អេនសាយឡាយ ប្រដាក់ ប្រីសេស៊ីង ឯ.ក បានបើកការកែច្នៃលៀសដោយខុសច្បាប់ ដែលមានអ្នកគ្រប់គ្រងជនជាតិចិនឈ្មោះ Wang Liangcao ។
បន្ទាប់ពីត្រួតពិនិត្យជាក់ស្ដែង ឃើញនូវលិខិតបទដ្ឋានពាក់ព័ន្ធ ក្នុងការបង្កើតទីតាំងកែច្នៃនេះឃើញថា សហគ្រាសខាងលើ ទទួលបានការអនុញ្ញាតពីក្រសួងឧស្សាហកម្ម វិទ្យាសាស្ត្របច្ចេកទេស និងនវានុវត្តន៍ លេខ 826 ឧវបន សកម ប្រ,ក និងមានឯកសារពាក់ព័ន្ធមួយចំនួនទៀត របស់ក្រសួងពាណិជ្ជកម្មអគ្គនាយកដ្ឋានពន្ធដារ ក៏ប៉ុន្តែមិនមានលិខិតអនុញ្ញាតពីក្រសួងកសិកម្ម រុក្ខាប្រមាញ់ និងនេសាទឡើយ។
ដូច្នេះឃើញថា សំណុំឯកសារដែលមិនទាន់មានលក្ខណៈគ្រប់គ្រាន់សម្រាប់ដំណើរការការកែច្នៃ ផលផលិតផល ជលផល នៅឡើយ។ ក្រុមការងារបានសម្រេចបិទបញ្ឈប់សកម្មភាពរបស់សហគ្រាសនេះមិនឲ្យដំណើរការបន្តទៀតឡើយ និងបានណែនាំឲ្យម្ចាស់សហគ្រាសធ្វើលិខិតសុំអនុញ្ញាតពីក្រសួងកសិកម្មរុក្ខាប្រមាញ់ និងនេសាទដើម្បីទទួលបានសិទ្ធិស្របច្បាប់ ។
ចែករំលែកព័តមាននេះ