រាជធានីភ្នំពេញ ៖ កម្ពុជា-ចិន បង្ហាញពីទំនាក់ទំនងការទូត និងកិច្ចសហប្រតិបត្តិការកាន់តែស៊ីជម្រៅ ដោយចិនចាត់ទុកទំនាក់ទំនងជាមួយកម្ពុជា ជាអាទិភាព នៃការទូតរបស់ខ្លួន ។
ថ្លែងក្នុងសន្នីសីទសារព័ត៌មាន នាព្រឹកថ្ងៃទី១៧ ខែកក្តដា ឆ្នាំ២០២៦ ឯកឧត្តម ប៉ែន បូណា អ្នកនាំពាក្យរាជរដ្ឋាភិបាល
បានលើកឡើងថា ចិន និងកម្ពុជា តែងតែផ្លាស់ប្តូរទស្សនកិច្ចគ្នាញឹកញាប់ និងផ្លាស់ប្តូរយោបល់គ្នាយ៉ាងសកម្ម នៅគ្រប់កម្រិត និងគ្រប់វិស័យ ដែលឆ្លុះបញ្ចាំងអំពីភាពរឹងមាំ នៃទំនាក់ទំនង និងការបន្តបោះជំហានទៅមុខ នៃកិច្ចសហប្រតិបត្តិការរវាងប្រទេសទាំងពីរ ។
អ្នកនាំពាក្យថា នេះជាប្រសាសន៍គូសបញ្ជាក់របស់ឯកឧត្តម លី ឈាង នាយករដ្ឋមន្ត្រីចិន ក្នុងឱកាសជួបពិភាក្សាការងារទ្វេភាគីជាមួយសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា នៅថ្ងៃទី១៦ ខែកក្កដា ឆ្នាំ២០២៦ នាឱកាស ដែលសម្តេចអញ្ជើញបំពេញទស្សនកិច្ចការងារ និងចូលរួមសន្និសីទពិភពលោក ស្តីពីបញ្ញាសិប្បនិម្មិត នៅសាធារណរដ្ឋប្រជាមានិតចិន ។
ប្រមុខរដ្ឋាភិបាលចិន បានសង្កត់ធ្ងន់ទៀតថា ចិន និងកម្ពុជា មានទំនាក់ទំនងជិតស្និទ្ធ ជាមិត្តដែកថែប ហើយប្រទេសទាំងពីរ នឹងបន្តកិច្ចសហការ និងការគាំទ្រគ្នាទៅវិញទៅមក ដើម្បីជំរុញទំនើបកម្មរៀងៗខ្លួន និងចូលរួមដោះស្រាយភាពមិនច្បាស់លាស់របស់ពិភពលោក ។
ជាការឆ្លើយតប សម្តេចធិបតី នាយករដ្ឋមន្ត្រីកម្ពុជា បានវាយតម្លៃខ្ពស់ចំពោះវឌ្ឍនភាព នៃទំនាក់ទំនងកម្ពុជា-ចិន ហើយប្រទេសទាំងពីរ ជាដៃគូយុទ្ធសាស្ត្រគ្រប់ជ្រុងជ្រោយ ជាមិត្តដែកថែប ដែលកំពុងរួមគ្នាកសាង «សហគមន៍វាសនារួមកម្ពុជា-ចិន គ្រប់រដូវកាល ក្នុងយុគសម័យថ្មី» ។
សម្តេចធិបតី បានគូសបញ្ជាក់ជាថ្មីប្រាប់សមភាគីចិនថា កម្ពុជាបន្តប្រកាន់ខ្ជាប់ឥតងាករេ នូវគោលការណ៍ចិនមួយ ដោយចាត់ទុកបញ្ហាតៃវ៉ាន់ ហុងកុង ស៊ីចាំង និងស៊ីនជាំង គឺជាកិច្ចការផ្ទៃក្នុងរបស់ចិន ។
ប្រមុខរដ្ឋាភិបាល នៃប្រទេសទាំងពីរ ក៏បានពិភាក្សា និងផ្លាស់ប្ដូរយោបល់អំពីគំនិតផ្តួចផ្តើម និងទិសដៅបន្តមួយចំនួន សំដៅបន្តពង្រឹង និងពង្រីកវិស័យគន្លឹះ នៃកិច្ចសហប្រតិបត្តិការឱ្យកាន់តែស៊ីជម្រៅរួមមាន ៖ វិស័យនយោបាយ-ការទូត សេដ្ឋកិច្ចនិងពាណិជ្ជកម្ម ហេដ្ឋារចនាសម្ព័ន្ធតភ្ជាប់ ថាមពលបៃតង កសិកម្ម ការពារជាតិនិងសន្តិសុខ ព្រមទាំងការផ្លាស់ប្ដូររវាងប្រជាជន និងប្រជាជន ជាពិសេស ទេសចរណ៍និងអប់រំ ។
ដោយឡែក ស្ថានការណ៍វិវត្តថ្មីៗនៅឯព្រំដែនកម្ពុជា-ថៃ ក៏ត្រូវបានសម្តេចធិបតី នាយករដ្ឋមន្ត្រី ជម្រាបជូនសមភាគីចិន ដោយបានសង្កត់ធ្ងន់លើការប្ដេជ្ញាចិត្ត និងជំហររបស់កម្ពុជាក្នុងការដោះស្រាយបញ្ហាព្រំដែនដោយ សន្តិវិធី និងផ្អែកលើច្បាប់អន្តរជាតិ ដោយអនុលោមតាមអនុសញ្ញា សន្ធិសញ្ញា និងកិច្ចព្រមព្រៀង ដែលមានស្រាប់រវាងប្រទេសទាំងពីរ ៕
ចែករំលែកព័តមាននេះ