រាជធានីភ្នំពេញ ៖ ជនអនាថា ចំនួន៤នាក់ ត្រូវបានកម្លាំងគណៈបញ្ជាការឯកភាពខណ្ឌទួលគោក ឃាត់ខ្លួននៅក្នុងការចុះត្រួតពិនិត្យរដ្ឋបាលនៅផ្ទះវីឡាទុកចោលមួយកន្លែង ខណៈពេលដែលពួកគេប្រមូលផ្ដុំគ្នា ប្រើប្រាស់គ្រឿងញៀន ។
ការចុះរដ្ឋបាលឃាត់ជនអនាថានេះ ធ្វើឡើងកាលពីវេលាម៉ោង១០និង៣០នាទីព្រឹកថៃ្ងទី១៦ ខែកក្កដា ឆាំ្ន២០២៦ នៅចំណុចវិឡា៥៦ ក្រុម៣១ ភូមិ៧សង្កាត់បឹងកក់ទី២ ខណ្ឌទួលគោក រាជធានីភ្នំពេញ ។
ជនសង្ស័យ ដែលត្រូវឃាត់ខ្លួន ៖
១-ឈ្មោះ ផឹម ជីវ័ន្ត ភេទប្រុសអាយុ៤៩ឆ្នាំ ជនជាតិខ្មែរ មុខរបរនិងស្នាក់នៅមិនពិតប្រាកដ
២-ឈ្មោះ ណង វិបុល ភេទប្រុសអាយុ ៥២ឆ្នាំមុខរបរ និងស្នាក់នៅមិនពិតប្រាកដ
៣-ឈ្មោះ សាន វិបុល ភេទប្រុស អាយុ ៤១ ឆ្នាំ មុខរបរ និងស្នាក់នៅមិនពិតប្រាកដ
និង៤-ឈ្មោះ លឹម សៅ ភេទ ប្រុសអាយុ ៤១ ឆ្នាំមុខរបរនិងស្នាក់នៅមិនពិតប្រាកដ ។
បើតាមគណៈបញ្ជាការឯកភាពខណ្ឌទួលគោក បានឲ្យដឹងថា ក្រោយពីមានការបង្ហោះព័ត៌មាននៅក្នុងបណ្ដាញសង្គមពីសកម្មភាពរបស់ជនអនាថា ដែលបានប្រមូលផ្ដុំគ្នា ប្រើប្រាស់គ្រឿងញៀននៅក្នុងផ្ទះវិឡាទុកចោលខាងលើ គណៈបញ្ជាការឯកភាពខណ្ឌទួលគោក ក្រោមការបញ្ជាផ្ទាល់របស់លោក ឃួង ស្រេង អភិបាល នៃគណៈអភិបាលរាជធានីភ្នំពេញ បានចុះត្រួតពិនិត្យរដ្ឋបាល និងឆែកឆេរ ដោយឃាតខ្លួនជនសង្ស័យជាជនអនាថា ចំនួន៤នាក់ ។
ជនសង្ស័យ ត្រូវបានគណៈបញ្ជាការឯកភាពបញ្ជូនទៅសាលាខណ្ឌទួលគោក ដើម្បីសាកសួរ រួចបញ្ចូនទៅកាន់
មន្ទីរសង្គមកិច្ច បញ្ជូនទៅមណ្ឌលកែប្រែកណ្តាលស្ទឹង ។
គួរបញ្ជាក់ថា ទីតាំងវីឡាទុកចោលខាងលើ ត្រូវបានជនអនាថា យកធ្វើជាទីជម្រក ប្រមូលផ្ដុំគ្នាប្រើប្រាស់គ្រឿងញៀន ហើយកន្លងមក ត្រូវបានគណៈបញ្ជាការឯកភាពខណ្ឌទួលគោក ក៏ដូចជាគណបញ្ជាការឯកភាពសង្កាត់បឹងកក់ទី២ ដឹកនាំកម្លាំងនគរបាលចុះត្រួតពិនិត្យឆែកឆេរ និងឃាត់ខ្លួនជនសង្ស័យជាបន្តបន្ទាប់ ៕
ចែករំលែកព័តមាននេះ