រាជធានីភ្នំពេញ ៖ លែងឱ្យជិះបង្ហើរសំឡេងរំខានពលរដ្ឋទៀតហើយ ! កម្លាំងអធិការដ្ឋាននគរបាលខណ្ឌកំបូល បានបើកប្រតិបត្តិការក្តៅ ឃាត់ម៉ូតូប្រើប្រាស់បំពង់ស៊ីម៉ាំងកែច្នៃចំនួន ០៤គ្រឿង ដើម្បីយកមកដោះដូរចេញ ។ នេះបើយោងតាមផេក ក្រុមការងារព័ត៌មាន និងប្រតិកម្មរហ័ស នៃស្នងការដ្ឋាននគរបាលរាជធានីភ្នំពេញ បានប្រកាសនាថ្ងៃទី១៧ ខែកក្កដានេះ ។
ដោយអនុវត្តតាមអនុសាសន៍ដឹកនាំដ៏ខ្ពង់ខ្ពស់របស់ ឯកឧត្តម នាយឧត្តមសេនីយ៍ ស ថេត អគ្គស្នងការនគរបាលជាតិ និងអនុវត្តតាមបទបញ្ជាផ្ទាល់ពីឯកឧត្តម ឧត្តមសេនីយ៍ឯក ជួន ណារិន្ទ អគ្គស្នងការរង និងជាស្នងការនគរបាលរាជធានីភ្នំពេញ នាថ្ងៃទី១៦ ខែកក្កដា ឆ្នាំ២០២៦ កម្លាំងអធិការដ្ឋាននគរបាលខណ្ឌកំបូល បានឃាត់ម៉ូតូប្រើប្រាស់បំពង់ស៊ីមុំាង កៃច្នៃខុសលក្ខណៈបច្ចេកទេស ចំនួន០៤គ្រឿង ដែលបង្កជាសំឡេងបំពងរំខានដល់អ្នកដទៃ និងធ្វើឱ្យបាត់បង់សណ្តាប់ធ្នាប់សាធារណៈ ។
ក្រុមការងារព័ត៌មាន និងប្រតិកម្មរហ័ស នៃស្នងការដ្ឋាននគរបាលរាជធានីភ្នំពេញ បានបន្តថា សមត្ថកិច្ចបានណែនាំអប់រំ និងធ្វើកិច្ចសន្យាដល់អ្នកបើបរម៉ូតូ និងតម្រូវឱ្យម្ចាស់ម៉ូតូយកបំពង់ស៊ីម៉ាំងដើមមកដោះដូរ ដើម្បីប្រគល់ម៉ូតូឱ្យត្រឡប់ទៅផ្ទះវិញ ៕
ចែករំលែកព័តមាននេះ