បង្ហោះម៉ូតូតាមផ្លូវសាធារណៈ និងថតបង្ហោះលើបណ្ដាញសង្គម ឃាត់ខ្លួន៤នាក់ កោរសក់ ដកហូតម៉ូតូទុក៣ខែ
- កំពង់ស្ពឺ
ខេត្តកំពង់ស្ពឺ៖ ក្រុមក្មេងទំនើងចំនួន៤នាក់ ត្រូវបានកម្លាំងនគរបាលស្រុកបរសេដ្ឋធ្វើការ ស្រាវជ្រាវហ៊ានទៅដល់ធ្វើការឃាត់ខ្លួន ខណៈដែលក្មេងទំនើងបានបង្ហោះម៉ូតូនៅលើផ្លូវសាធារណៈ ហើយថតបង្ហោះតាមបណ្ដាញសង្គម ហ្វេសប៊ុក ចែករំលែកយ៉ាងណាធិបតេយ្យ ធ្វើឱ្យប៉ះពាល់ ដល់សណ្ដាប់ធ្នាប់សង្គម កោសក់ និងដកហូតម៉ូតូ រក្សាទុកចំនួន៣ខែ ។ស
ការឃាត់ខ្លួនក្រុមក្មេងទំនើងបង្ហោះម៉ូតូតាមផ្លូវសាធារណៈយ៉ាងអនាធិបតេយ្យ÷ អនុវត្តតាមបទបញ្ជាដ៏ខ្ពង់ខ្ពស់ពីលោកឧត្តមសេនីយ៍ទោ ឃឹម សុកខៃ ស្នងការនគរបាលខេត្តកំពង់ស្ពឺ។ យោងតាមអាខោនហ្វេសប៊ុកមួយបានផុសក្នុងបណ្តាញសង្គមពីសកម្មភាពក្រុមក្មេងទំនើង១ក្រុមបង្ហោះម៉ូតូ តាមបណ្តោយផ្លូវជាតិលេខ៣ ពីទិសខាងជើងទៅទិសខាងត្បូង ចន្លោះបង្គោលគីឡូម៉ែត្រលេខ៥៩ ទៅលេខ៦០ ក្នុងភូមិព្រៃស្រូល ឃុំពោធិអង្គ្រង ស្រុកបសេដ្ឋ ខេត្តកំពង់ស្ពឺ កាលពីថ្ងៃទី១១ ខែកក្កដា ឆ្នាំ២០២៦ កន្លងទៅ ។
នគរបាលខេត្តកំពង់ស្ពឺបាននិយាយឲ្យដឹងថា ក្រោយពីទទួលបានព័ត៌មានខាងលើ កម្លាំងជំនាញព្រហ្មទណ្ឌ នៃអធិការដ្ឋាននគរបាលស្រុកបសេដ្ឋ ដឹកនាំដោយលោកវរសេនីយ៍ឯក ចន សុភិត អធិការនគរបាលស្រុក សហការជាមួយកម្លាំងព្រហ្ម នៃអធិការដ្ឋាននគរបាលស្រុកត្រាំកក់ ខេត្តតាកែវ ធ្វើការស្រាវជ្រាវករណីក្មេងទំនើងបង្ហោះម៉ូតូតាមដងផ្លូវសាធារណៈ បង្ករភាពអសន្តិសុខក្នុងសង្គម និងអាចបង្កគ្រោះថ្នាក់ជាយថាហេតុដល់បងប្អូនប្រជាពលរដ្ឋ ដែលកំពុងធ្វើដំណើរស្របជាមួយគ្នាលើដងផ្លូវ ។
នគរបាលខេត្តកំពង់ស្ពឺបានបន្តឲ្យដឹងទៀតថា ជាលទ្ធផលសមត្ថកិច្ចស្រាវជ្រាវរកឃើញ និងឃាត់ខ្លួនក្រុមក្មេងទំនើង បានចំនួន៤នាក់ ៖
ទី១/-ឈ្មោះឡេង វីរៈ ភេទប្រុស អាយុ២២ឆ្នាំ (ជាអ្នកជួយលើកកាងម៉ូតូជំនួយក្នុងកាបង្ហោះ) រស់នៅភូមិតាសួន ឃុំត្រពាំងធំខាងជើង ស្រុកត្រាំកក់ ខេត្តតាកែវ ។
ទី២/-ឈ្មោះង៉ែត វត្តនា ភេទប្រុស អាយុ១៨ឆ្នាំ (ជាអ្នកបង្ហោះ) រស់នៅភូមិវៈពោះ ឃុំខ្វាវ ស្រុកសំរោង ខេត្តតាកែវ ។
ទី៣/-ឈ្មោះហោ ហាន ភេទប្រុស អាយុ១៦ឆ្នាំ (ជាអ្នកបង្ហោះ) រស់នៅភូមិត្រពាំងអង្គ ឃុំក្រាំងលាវ ស្រុកបាទី ខេត្តកំពង់កែវ ។
និងទី៤/-ឈ្មោះផាន រស្មី ភេទប្រុស អាយុ១៩ឆ្នាំ (ជាអ្នកបង្ហោះ) រស់នៅភូមិព្រៃជ័រ ឃុំខ្វាវ ស្រុកសំរោង ខេត្តតាកែវ ។
ក្រោយឃាត់ខ្លួនក្រុមក្មេងទំនើងនគរបាលបានដកហូតវត្ថុតាង(ម៉ូតូ) ជិះធ្វើសកម្មភាពបង្ហោះ បានចំនួន២គ្រឿងម៉ាកហុងដាសេ១២៥ ពណ៌ខ្មៅ ដូរក្បាំងពណ៌ស ស៊េរីឆ្នាំ២០២៤ ដូរសេរីឆ្នាំ២០២៣ ពាក់ផ្លាកលេខតាកែវ1AD-8168 និង១គ្រឿងទៀត ម៉ាកហុងដាសេ១២៥ ស៊េរីឆ្នាំ២០២៤ បិទតែមឡើងស៊េរីឆ្នាំ២០២៦ ពណ៌ខ្មៅ គ្មានផ្លាកលេខ ។ ចំពោះមុខសញ្ញាក្មេងទំនើងខាងលើ បានឆ្លើយសារភាពថា ពួកខ្លួនពិតជាបានធ្វើសកម្មភាពបង្ហោះម៉ូតូ ប្រាកដមែន ។
នគរបាលខេត្តកំពង់ស្ពឺបានបញ្ជាក់ឲ្យដឹងថា កម្លាំងជំនាញបានធ្វើកិច្ចសន្យាអប់រំ ប្រគល់ឱ្យអាណាព្យាបាលធានាយកទៅអប់រំបន្ត និងកោរសក់ឱ្យត្រលប់ទៅមូលដ្ឋានវិញ ចំណែកវត្ថុតាងម៉ូតូរក្សាទុកចំនួន៣ខែ ឬស្មើនឹង៩០ថ្ងៃ ដើម្បីយកឯកសារមកផ្ទៀងផ្ទាត់ទើបប្រគល់ឱ្យយកទៅប្រើប្រាស់វិញ៕
ចែករំលែកព័តមាននេះ