ក្នុងរយៈពេលប៉ុន្មានថ្ងៃនេះ! ឈើអារ និងមធ្យោបាយដឹកជញ្ជូនក្នុងបទល្មើសព្រៃឈើ២ករណី ត្រូវសមត្ថកិច្ចខេត្តព្រះវិហារបង្ក្រាបបានជាបន្តបន្ទាប់
- ព្រះវិហារ
ខេត្តព្រះវិហារ ៖ បទល្មើសព្រៃឈើចំនួន២ករណីផ្សេងគ្នា ត្រូវបានកម្លាំងជំនាញរដ្ឋបាលព្រៃឈើ និងមន្ត្រីបរិស្ថានខេត្តព្រះវិហារ ធ្វើការបង្ក្រាបបានជាបន្តបន្ទាប់ក្នុងរយៈពេលប៉ុន្មានថ្ងៃនេះ ដើម្បីចាត់ការទៅតាមនីតិវិធីច្បាប់ ។
យោងតាមប្រភពព័ត៌មានបានឱ្យដឹងថា ករណីទី១ បានកើតឡើងនៅព្រឹកព្រលឹម ថ្ងៃទី១៨ ខែក្កដា ឆ្នាំ២០២៦ វេលាម៉ោង ៦ និង៣០នាទីព្រឹក។ លោកនាយផ្នែករដ្ឋបាលព្រៃឈើរវៀង បានដឹកនាំមន្ត្រីសង្កាត់រដ្ឋបាលព្រៃឈើរវៀងផ្ទាល់ ចុះស្ទាក់ និងឃាត់ចាប់បានរថយន្តចំនួន១គ្រឿង ម៉ាកសាំយុង (SsangYong) ពណ៌ស គ្មានស្លាកលេខ ដែលកំពុងធ្វើសកម្មភាពដឹកជញ្ជូនផល អនុផលព្រៃឈើដោយគ្មានលិខិតអនុញ្ញាត។
ប្រតិបត្តិការនេះ ធ្វើឡើងនៅលើផ្លូវជាតិលេខ៦២ ត្រង់ចំណុចគីឡូម៉ែត្រលេខ៧៥ ស្ថិតក្នុងភូមិត្រពាំងទន្ទឹម ឃុំរមទម ស្រុករវៀង ខេត្តព្រះវិហារ ។ បច្ចុប្បន្ន វត្ថុតាងទាំងអស់ត្រូវបានយកមកប្រគល់ និងរក្សាទុកនៅស្នាក់ការផ្នែករដ្ឋបាលព្រៃឈើរវៀង ដើម្បីចាត់ការបន្តតាមនីតិវិធី។
ដោយឡែក ករណីទី២ មុននោះបន្តិច គឺនៅវេលាម៉ោង១រសៀល ថ្ងៃទី១៥ ខែកក្កដា ឆ្នាំ២០២៦ កម្លាំងជំនាញបរិស្ថានប្រចាំការនៅតំបន់ឧទ្យានរាជបណ្ឌិត្យសភាកម្ពុជា តេជោសែន ឫស្សីត្រឹប បានចុះបង្ក្រាបករណីលួចកាប់អារ និងដឹកជញ្ជូនផល អនុផលព្រៃឈើដោយខុសច្បាប់ នៅក្នុងតំបន់ឧទ្យាន។
ក្នុងការចុះពិនិត្យជាក់ស្តែងនៅទីតាំងនោះ សមត្ថកិច្ចរកឃើញមានគោយន្តកន្ត្រៃដឹកឈើចំនួន២គ្រឿង ប៉ុន្តែគោយន្ត១គ្រឿងទៀត បានបើករត់គេចខ្លួនបាត់ស្រមោល ។ បើតាមប្រភពពីសមត្ថកិច្ចអ្នកបើកបរគោយន្តដែលរត់គេចខ្លួននោះ គឺជាអ្នករស់នៅក្នុងតំបន់ឧទ្យាននេះផ្ទាល់តែម្តង ហើយកម្លាំងជំនាញក៏មានរូបថតច្បាស់លាស់ទុកជាភស្តុតាង ដើម្បីកំណត់មុខសញ្ញារួចរាល់ហើយដែរ ។
នៅក្នុងប្រតិបត្តិការនៅតំបន់ឧទ្យានឫស្សីត្រឹបនេះ មន្ត្រីបរិស្ថានចំនួន៣នាក់ បានសហការគ្នាយ៉ាងល្អជាមួយមន្ទីរបរិស្ថានខេត្តព្រះវិហារ ក្នុងការនាំយកវត្ថុតាងដែលបង្ក្រាបបាន រួមមាន ឈើអាចំនួន៦០សន្លឹក និងគោយន្តកន្ត្រៃ១គ្រឿង មកកាន់ស្នាក់ការ ដើម្បីធ្វើកំណត់ហេតុប្រគល់-ទទួល និងកសាងសំណុំរឿង បញ្ជូនទៅកាន់តុលាការចាត់ការតាមនីតិវិធីច្បាប់ជាធរមាន ៕
ចែករំលែកព័តមាននេះ