ទីក្រុងតេអេរ៉ង់៖ ថ្ងៃនេះ អាមេរិកបន្តយុទ្ធនាការទម្លាក់គ្រាប់បែកទៅលើប្រទេសអ៊ីរ៉ង់ ដោយផ្ដោតសំខាន់ទៅលើស្ពាន និងព្រលានយន្តហោះ។ ចំណែកអ៊ីរ៉ង់ក៏មិននៅស្ងៀមដែរ អ៊ីរ៉ង់បានវាយប្រហារមូលដ្ឋានយោធារបស់អាមេរិកនៅទូទាំងតំបន់មជ្ឈិមបូព៌ា។ កងទ័ពម៉ារីនអាមេរិកបានឡើងទៅលើកប៉ាល់ដឹកប្រេងមួយគ្រឿង ខណៈដែលកប៉ាល់មួយគ្រឿងទៀតរងការវាយប្រហារពីមីស៊ីលរបស់អ៊ីរ៉ង់។ លោកត្រាំព្រមានថានឹងវាយប្រហារហេដ្ឋារចនាសម្ព័ន្ធរបស់អ៊ីរ៉ង់ ហើយក៏មិនបដិសេធលទ្ធភាពនៃការបញ្ជូនកងទ័ពជើងគោកវាយលុកចូលឆ្នេរសមុទ្ររបស់អ៊ីរ៉ង់នោះដែរ។ មន្ត្រីរដ្ឋាភិបាលអាមេរិកថ្លែងថាលទ្ធភាពនៃការវាយលុកចូលប្រទេសអ៊ីរ៉ង់ភាគខាងត្បូងជាជម្រើសដែលលោកត្រាំអាចនឹងពិចារណា។
ទោះជាយ៉ាងណាក្ដី ប្រសិនបើអាមេរិកហ៊ានធ្វើដល់ថ្នាក់ហ្នឹង អ៊ីរ៉ង់អាចនឹងបង្កើនការវាយប្រហារទៅលើហេដ្ឋារចនាសម្ព័ន្ធរបស់បណ្ដាប្រទេសជិតខាងដែលមានមូលដ្ឋានរបស់អាមេរិកតាំងនៅ ហើយអ៊ីរ៉ង់នឹងរំខានសង្វាក់ផ្គត់ផ្គង់ថាមពលទៅកាន់ទីផ្សារពិភពលោកដោយប្រាប់ឱ្យក្រុមឧទ្ទាមហ៊ូទីនៅប្រទេសយេម៉េនបិទសមុទ្រក្រហម និងវាយប្រហារកប៉ាល់ណាដែលហ៊ានឆ្លងកាត់ទីនោះ។ បញ្ជាការដ្ឋានកណ្ដាលយោធាអាមេរិកបានដាក់បញ្ចូលហេដ្ឋារចនាសម្ព័ន្ធភ័ស្តុភាររបស់អ៊ីរ៉ងនៅក្នុងបញ្ជីដែលត្រូវវាយប្រហារ។ សម្រាប់ពេលបច្ចុប្បន្ននេះ ការវាយប្រហាររបស់អាមេរិកលើអ៊ីរ៉ង់ច្រើនផ្ដោតសំខាន់តែទៅលើតំបន់ឆ្នេរសមុទ្រខាងត្បូងប៉ុណ្ណោះ។ ទីនោះរងការវាយប្រហារយ៉ាងរន្ថើននារយៈពេលប៉ុន្មានថ្ងៃចុងក្រោយ។
សារព័ត៌មានរបស់រដ្ឋអ៊ីរ៉ង់ផ្សាយថាស្ពានយ៉ាងតិច៥កន្លែងនៅភាគខាងត្បូងត្រូវយោធាអាមេរិកវាយកម្ទេច។ មនុស្សយ៉ាងតិច៧នាក់បានស្លាប់នៅពេលមីស៊ីលវាយប្រហារស្ពានជាច្រើនកន្លែងនៅកំពង់ផែបានដា ខាមៀ (Bandar Khamir) និងវាយប្រហារស្ថានីយរថភ្លើងមួយកន្លែង។ ព្រលានយន្តហោះមួយកន្លែងក៏រងការវាយប្រហារផងដែរនៅភាគខាងកើតឆ្នេរសុទ្រអ៊ីរ៉ានសា (Iranshahr) ដែលស្ថិតនៅខេត្តមួយជាប់នឹងព្រំដែនប្រទេសប៉ាគីស្ថាន។ មានសេចក្ដីរាយការណ៍ថាស្ត្រីម្នាក់បានស្លាប់ និងកូនប្រុសរបស់គាត់ម្នាក់រងរបួសនៅក្នុងការវាយប្រហារទៅលើកំពង់ផែបាន់ដា អាបាស់ (Bandar Abbas)។
អ៊ីរ៉ង់អះអាងថាខ្លួនវាយប្រហារមូលដ្ឋានយោធាអាមេរិកនៅគូវែត និងបារ៉េន និងវាយប្រហារទីតាំងរ៉ាដារបស់អាមេរិកនៅប្រទេសអូម៉ង់។ នៅរដ្ឋធានីដូហា ប្រទេសកាតា គេក៏ស្ដាប់ឮសំឡេងផ្ទុះគ្រាប់កាំភ្លើងយ៉ាងកងរំពងផងដែរ។ ក្រសួងមហាផ្ទៃអះអាងថាកុមារម្នាក់រងរបួសដោយសារអំបែងគ្រាប់បែក។ អ៊ីរ៉ង់ប្រកាសថាខ្លួនបានបាញ់មីស៊ីលចូលប្រទេសស៊ីរីដើម្បីវាយប្រហារមូលដ្ឋានរបស់កងកម្លាំងពិសេសអាមេរិកនៅតំបន់ថាន់ (Tanf)។ ប៉ុន្តែស៊ីរីថ្លែងថាទីនោះគ្មាននៅសេសសល់ទាហានអាមេរិកតទៅទៀតទេព្រោះពួកគេបានចាកចេញតាំងពីដើមឆ្នាំនេះមកម៉្លេះ។ គ្រាប់មីស៊ីលរបស់អ៊ីរ៉ងគ្រាន់តែធ្លាក់នៅក្បែរមូលដ្ឋាននោះប៉ុណ្ណោះ ដូច្នេះមិនបានបង្កការខូចខាតសម្ភារៈ ឬស្លាប់ និងរបួសមនុស្សទេ៕ ប្រភព៖ Reuters
ចែករំលែកព័តមាននេះ