ពលរដ្ឋលើកគ្នាតវ៉ានៅមុខស្នងការនគរបាលខេត្តប៉ៃលិន ក្រោយឃើញស្ត្រីម្តាយនិងកូន ត្រូវនគរបាលខេត្តកំពតមកចាប់ដល់ផ្ទះ ដោយមិនដឹងមូលហេតុ លុះក្រោយមកទើបដឹងសាច់រឿង
- ភ្នំពេញ
ខេត្តប៉ៃលិន៖ ស្ត្រី២នាក់ម្តាយនិងកូន ត្រូវបានក្រុមនគរបាលពន្លៀតដែនដីមកពីខេត្តកំពត សហការជាមួយនឹងនគរបាល
ខេត្តប៉ៃលិន ចុះចាប់ឃាត់ខ្លួនបញ្ជូនទៅខេត្តកំពតភ្លាមៗ ។ លុះសាច់ញាតិតាយាយ ពូ មីង និងប្រជាពលរដ្ឋក្មេងចាស់ប្រុសស្រីប្រមាណ១៥នាក់ មិនដឹងរឿង និងមិនអស់ចិត្តក៏លើកគ្នាទៅតវ៉ានៅមុខស្នងការនគរបាលខេត្តប៉ៃលិន ដើម្បីចង់ដឹងមូលហេតុ ។ ក្រោយមក ទើបនគរបាលអ្នកនាំពាក្យស្នងការបានបង្ហើបប្រាប់អ្នកសារព័ត៌មានថា ជាករណីពាក់ព័ន្ធទៅនឹងរឿងឆបោកតាមគណនេយ្យធនាគារ ដោយឱ្យគេវេរលុយចូលគណនេយ្យក្មេងស្រីខាងលើជិត២០លានរៀល ។
ហេតុការណ៍ប្រជាពលរដ្ឋក្មេងចាស់ប្រុសស្រី ជាសាច់ញាតិរបស់ស្ត្រីទាំងពីរនាក់ លើកគ្នាទៅតវ៉ានៅមុខស្នងការនគរបាលខេត្តប៉ៃលិន បានធ្វើឡើងកាលពីវេលាមោង៣ និង៣០នាទីរសៀលថ្ងៃទី១៧ ខែកក្កដា ឆ្នាំ២០២៦ ស្ថិតនៅក្នុងភូមិវត្ត សង្កាត់ប៉ៃលិន ក្រុងប៉ៃលិន ខេត្តប៉ៃលិន ។ ស្ត្រីម្តាយនិងកូនទាំង២នាក់ ត្រូវបាននគរបាលចាប់ឃាត់ខ្លួន កាលពីវេលាម៉ោង១០ និង៣០នាទីព្រឹកថ្ងៃទី១៦ កក្កដា ឆ្នាំ២០២៦ នៅក្នុងភូមិទឹកថ្លា សង្កាត់ប៉ៃលិន ក្រុងប៉ៃលិន ខេត្តប៉ៃលិន ខណៈកំពុងតែធ្វើបុណ្យសពម្តាយបង្កើតរបស់ខ្លួន ។
ប្រភពព័ត៌មានបានឱ្យដឹងថា ស្ត្រីពីរនាក់ម្តាយកូន ដែលនគរបាលចាប់ខ្លួន ទី១-ឈ្មោះ សួរ សុខន អាយុ៣៦ឆ្នាំ បច្ចុប្បន្ន រស់នៅខេត្តកំពង់ឆ្នាំង ត្រូវជាម្តាយ ទី២-ឈ្មោះ សុំ សុខា អាយុ១៧ឆ្នាំ ត្រូវជាកូន រស់នៅជាមួយតាយាយក្នុងភូមិទឹកថ្លា សង្កាត់ប៉ៃលិន ក្រុងប៉ៃលិន ខេត្តប៉ៃលិន ។
បើតាមប្រភពព័ត៌មានពីស្ត្រីម្នាក់ ឈ្មោះ សួន លាវ អាយុ៤៦ឆ្នាំ ត្រូវជាបងថ្លៃ និងជាអ៊ុំរបស់ក្មេងស្រីខាងលើ បានឱ្យអ្នកសារព័ត៌មានដឹងថា ក្មួយស្រីគាត់ មិនធ្លាប់ចេញទៅធ្វើការរកស៊ីនៅខេត្តណាផ្សេងទៀតក្នុងប្រទេសកម្ពុជាឡើយ ដោយនាងជាអតីតសិស្សរៀនថ្នាក់ទី៨នៃអនុវិទ្យាល័យភ្នំយ៉ាត ។ ក្រោយមក ដោយសារតែជីវភាពគ្រួសារខ្វះខាត ទើបនាងសម្រេចចិត្តសុំលោកតា លោកយាយ លាឈប់រៀន ហើយក៏ចូលទៅធ្វើការរត់តុនៅក្នុងហាងមួយកន្លែងក្នុងក្រុងប៉ៃលិន ដើម្បីបង្កើនប្រាក់ចំណូលជួយគ្រួសារ គឺទើបតែធ្វើការបានត្រឹមតែរយៈពេល២ទៅ៣ខែប៉ុណ្ណោះ ក៏ស្រាប់តែពេលនេះមានរឿងកើតឡើង ។
ប្រភពបន្តទៀតថា មុនដំបូងកាលពីពាក់កណ្តាលខែមិថុនា គាត់បានស្តាប់ឮក្មួយស្រី និយាយជាមួយម្តាយរបស់នាងថា សូមកុំឱ្យមករញ៉េរញ៉ៃរឿងឃ្យូអកូត (QR code) ក្នុងទូរស័ព្ទផ្ទាល់ខ្លួនទៀត ព្រោះអាចនឹងកើតមានបញ្ហា ហើយម្តាយក៏ប្រាប់ថា កូនឯងកុំល្ងង់ពេក ចាំម្តាយទិញទូរស័ព្ទឱ្យ១គ្រឿងតម្លៃ៧០០ដុល្លារ រួចក៏ស្ងាត់ឈប់និយាយគ្នាទៀត ហើយចេញទៅធ្វើការងាររៀងៗខ្លួន។
ស្ត្រីរូបនេះ បានបញ្ជាក់ទៀតថា គាត់ដឹងរឿងត្រឹមតែប៉ុណ្ណឹងទេ តែក៏សង្ស័យថា ម្តាយរបស់នាងជាប់ពាក់ព័ន្ធនឹងរឿងរ៉ាវខ្ចីលុយកាក់អ្នកដទៃច្រើន ហើយម្ចាស់គេទារវិញ អត់មានលុយសងជំពាក់គេ ឬក៏ចាញ់ល្បួងគេរឿងករណីឆបោកណាមួយ ព្រោះម្តាយរបស់នាងអត់ចេះអក្សរ១តួនោះទេ ។
បើតាមប្រភពព័ត៌មានពីលោក សែន ត្រូវជាបងបង្កើតស្ត្រី និងជាអ៊ុំប្រុសរបស់ក្មេងស្រីខាងលើបានឱ្យដឹងដែរថា ៖ តាមគាត់ដឹងប្រហែលជាម្តាយ និងកូន ចាញ់សេចក្តីល្បួងរបស់គេ ដោយគេជាជនឆបោក បានវេរលុយចូលក្នុងអាខោនរបស់កូនស្រីនាង ដែលបានមកពីការបោកបញ្ឆោតអ្នកដទៃ ។ លោកបន្តទៀតថា ម្តាយរបស់ក្មួយស្រីរបស់គាត់ អត់មានអត្តសញ្ញាណប័ណ្ណទេ ទើបមកល្បួងលួងលោមកូនស្រីរបស់ខ្លួនឱ្យគេវេលុយចូលក្នុងគណនេយ្យ លុះនគរបាលស៊ើបអង្កេតឃើញ ក៏តាមមកចាប់ឃាត់ខ្លួនបែបនេះតែម្តង។ លោកបន្តទៀតថា ការចាប់ឃាត់ខ្លួននេះ ខាងលោកក៏ដូចជាសាច់ញាតិបងប្អូនអត់ដឹងរឿងនោះទេ ទើបនាំគ្នាឆោឡោទៅតវ៉ាសួរនាំនៅមុខស្នងការ ដើម្បីឱ្យដឹងរឿងហេតុ ។
លោកបញ្ជាក់ថា ក្មួយស្រីរបស់ខ្លួនមិនមែនជាមនុស្សអាក្រក់នោះទេ ដោយសារតែជារៀងរាល់ថ្ងៃ នាងចេញពីផ្ទះទៅរៀន លុះក្រោយមកក៏ឈប់រៀន ទើបតែប៉ុន្មានខែ ដោយសារតែជីវភាពខ្វះខាត លោកក៏បានលើកទឹកចិត្តឱ្យនាងទៅរៀនវិញដែរ តែនាងប្រាប់ថា រៀនលែងចូលហើយ ព្រោះឃើញជីវភាពគ្រួសារមានការខ្វះខាតខ្លាំង ។
ពាក់ព័ន្ធទៅនឹងបញ្ហានេះ លោក ឡាំ សារិទ្ធ អ្នកនាំពាក្យនៃស្នងការនគរបាលខេត្តប៉ៃលិន បានប្រាប់អ្នកសារព័ត៌មានឱ្យដឹងថា សមត្ថកិច្ចនគរបាលខេត្តកំពត បានពន្លាតដែនដីរបស់ខ្លួន មកចាប់ឃាត់ខ្លួនជនសង្ស័យ២នាក់ ពាក់ព័ន្ធនឹងករណីការឆបោកតាមគណនេយ្យធនាគារមួយ ដោយសារនគរបាលបានស្រាវជ្រាវឃើញមានការបន្លំធ្វើជាគណនេយ្យរបស់បងប្អូនគេ ឱ្យវេរលុយចូលក្នុងគណនេយ្យនាង ។
លោកបន្តទៀតថា ករណីនេះ ជាការឆបោកតាមប្រព័ន្ធបច្ចេកវិទ្យា ដោយការបោកប្រាសនេះ មានចំនួនប្រហែល២ដង សរុបទឹកប្រាក់ ជិត២០លានរៀល។ លោកបញ្ជាក់ទៀតថា ពេលនេះ នគរបាលខេត្តប៉ៃលិន បានសហការជាមួយនគរបាលខេត្តកំពត ចាប់បញ្ជូនជនសង្ស័យទាំង២នាក់ម្តាយកូនទៅខេត្តកំពតហើយ ៕
ចែករំលែកព័តមាននេះ