រាជធានីភ្នំពេញ ៖ រថយន្តទ្រុងឃ្លុប ១គ្រឿង ខណៈដឹកទំនិញ បើកចេញពីតំបន់សេដ្ឋកិច្ចពិសេសភ្នំពេញ(កំបូល) ឆ្ពោះទៅកាន់ខេត្តកំពុងចាម ស្រាប់តែរេចង្កូតជ្រុលទៅបុករះយានយន្តនៅខាងមុខជាបន្តបន្ទាប់ ដែលយានយន្តខ្លះកំពុងបើកបរស្របគ្នា និងខ្លះទៀតកំពុងឈប់ស្ងៀម…
រាជធានីភ្នំពេញ ៖ រថយន្តទ្រុងឃ្លុប ១គ្រឿង ខណៈដឹកទំនិញ បើកចេញពីតំបន់សេដ្ឋកិច្ចពិសេសភ្នំពេញ(កំបូល) ឆ្ពោះទៅកាន់ខេត្តកំពុងចាម ស្រាប់តែរេចង្កូតជ្រុលទៅបុករះយានយន្តនៅខាងមុខជាបន្តបន្ទាប់ ដែលយានយន្តខ្លះកំពុងបើកបរស្របគ្នា និងខ្លះទៀតកំពុងឈប់ស្ងៀម បណ្ដាលឲ្យរថយន្តទ្រុងឃ្លុបខាងលើខ្ទេចកាប៊ីន ហើយអ្នកបើកបរម្នាក់ និងព្រូ២នាក់ទៀតរងរបួសធ្ងន់ រីឯអ្នកបើកបរម៉ូតូកង់បីម្នាក់របួសស្រាល ចំណែកអ្នកបើកបររថយន្ត បង្កបាននិយាយថា ការបុករះនេះ បណ្ដាលមកពីរថយន្តដាច់ហ្វ្រាំង ។
ឧប្បត្តិហេតុគ្រោះថ្នាក់ចរាចរណ៍ខាងលើនោះ បានកើតឡើងនៅវេលាម៉ោង១១ព្រឹកថ្ងៃទី៥ ខែធ្នូ ឆ្នាំ២០២៥ នៅលើមហាវិថីឈ្នះ-ឈ្នះ ត្រង់ចំណុចផ្លូវរថភ្លើងខ្សែភ្នំពេញ-កំពត មុខវត្តត្រពាំងឈូក ស្ថិតនៅក្នុងភូមិចែងម៉ែង សង្កាត់សំរោងក្រោម ខណ្ឌពោធិ៍សែនជ័យ រាជធានីភ្នំពេញ ។
រថយន្តបង្ក១គ្រឿងខាងលើនោះ ម៉ាកហ៊ីយ៉ាន់ដាយ ពណ៌ស ពាក់ស្លាកលេខព្រះសីហនុ 3A-6226 ជាប្រភេទរថយន្តទ្រុងឃ្លុប ដឹកអីវាន់ជិះគ្នា៣នាក់ រួមមានអ្នកបើកបរ និងព្រូ២នាក់ ហើយអ្នកទាំង៣រងរបួសធ្ងន់ទាំងអស់គ្នា។ រថយន្តនេះបានបុករះយានយន្តចំនួន៣គ្រឿងទៀត រួមមាន ៖
១.ម៉ូតូកង់បី ១គ្រឿង ម៉ាក BAJAJ MAXIMA ពណ៍ស ពាក់ស្លាកលេខភ្នំពេញ1HV-1239 បណ្ដាលឲ្យអ្នកបើកបររងរបួសស្រាល។
២.រថយន្តធុនធំ មិនចាំម៉ាក ហើយរថយន្តនេះដាច់សន្ទះគូទក្រោយ និងបានបន្តដំណើរដំណើរទៅមុខបាត់ អត់ទាំងរើសសន្ទះយកទៅផងទេ ព្រោះខ្ជិលមានរឿងវែងឆ្ងាយ ។
៣.រថយន្តរថយន្ត ១គ្រឿងទៀត ម៉ាកSTERLiNG ពណ៍បៃតង ពាក់ស្លាកលេខភ្នំពេញ3C-3320 ដឹកកុងតឺន័រ ខណៈដែលរថយន្តនេះកំពុងចតស្ងៀមនៅលើផ្លូវ ។
សមត្ថកិច្ច បានប្រាប់ឲ្យដឹងថា នៅមុនពេលកើតហេតុរថយន្តទ្រុងឃ្លុបខាងលើ បានដឹកទំនិញចេញពីតំបន់សេដ្ឋកិច្ចភ្នំពេញ (កំបូល) ឆ្ពោះទៅកាន់ខេត្តកំពង់ចាម លុះពេលទៅដល់ត្រង់ចំណុចកើតហេតុ បានជ្រុលទៅបុកពីក្រោយម៉ូតូកង់បី បណ្ដាលឲ្យអ្នកបើកបរម៉ូតូកង់រងរបួសស្រាល។ បន្ទាប់មករថយន្តបង្កនេះបានជ្រុលបន្តទៅបុកពីក្រោយរថយន្តធុនធំ មិនចាំម៉ាក ១គ្រឿងទៀត បណ្ដាលឲ្យរថយន្តមិនចាំម៉ាកនោះដាច់សន្ទះក្រោយ ពេលនោះរថយន្តបង្កនៅតែមិនទាន់អស់ល្បឿននៅឡើយ ។
សមត្ថកិច្ច បានប្រាប់ទៀតថា ចំណែក បន្ទាប់មកក៏ជ្រុលទៅបុកពីក្រោយកន្ទុយរ៉ឺម៉ករថយន្តម៉ាក STERLiNG ដឹកកុងតឺន័រដែលកំពុងឈប់ចតស្ងៀមពេញទំហឹង បណ្ដាលឲ្យគាបជាប់ និងខ្ទេចកាប៊ីនគាបអ្នកបើកបរម្នាក់ និងព្រូ២នាក់ទៀត បានរងរបួសធ្ងន់ធ្ងរ។ ក្រោយពេលកើតហេតុ អ្នកបើកបររថយន្តនេះបាននិយាយថា រថយន្តដាច់ហ្វ្រាំង ទើបជួបគ្រោះថ្នាក់បែបនេះ អ្នករងរបួសធ្ងន់ទាំង៣នាក់ ត្រូវបានក្រុមសង្គ្រោះអង្គភាព៧១១ ដឹកយកទៅកាន់មន្ទីរពេទ្យ ។
ដោយឡែករថយន្តធុនធំ មិនស្គាល់ម៉ាកវិញដោយខ្ជិលវែងឆ្ងាយ រថយន្តនោះមិនបានឈប់ទេ ក៏បន្តដំណើរទៅមុខបាត់ស្រមោលចោលសន្ទះក្រោយនៅកន្លែងកើតហេតុ ។
បន្ទាប់មក នគរបាលចរាចរណ៍ខណ្ឌពោធិ៍សែនជ័យ បានចុះទៅធ្វើការវាស់វែង និងនាំយករថយន្តបង្ក ព្រមទាំងរថយន្តកុងតឺន័រ និងម៉ូតូកង់បី ទៅរក្សាទុករង់ចាំការដោះស្រាយគ្នា នៅពេលក្រោយ ៕
ចែករំលែកព័តមាននេះ