រាជធានីភ្នំពេញ ៖ ឯកឧត្តម ជា វ៉ាន់ដេត រដ្ឋមន្ត្រីក្រសួងប្រៃសណីយ៍ និងទូរគមនាគមន៍ បានមានប្រសាសន៍ឱ្យដឹងថា ថ្នាល verify…
រាជធានីភ្នំពេញ ៖ ឯកឧត្តម ជា វ៉ាន់ដេត រដ្ឋមន្ត្រីក្រសួងប្រៃសណីយ៍ និងទូរគមនាគមន៍ បានមានប្រសាសន៍ឱ្យដឹងថា ថ្នាល verify របស់កម្ពុជា ត្រូវបានរដ្ឋាភិបាលហ្វីលីពីន យកទៅប្រើប្រាស់លើអត្តសញ្ញាណឌីជីថល ជូនប្រជាជនជាង ៩០លាននាក់ ។ ថ្លែងក្នុងពិធីបើកវេទិការដ្ឋាភិបាលឌីជីថល ឆ្នាំ ២០២៥ និងពិព័រណ៍បច្ចេកវិទ្យាឌីជីថល កាលពីថ្ងៃទី ៥ ខែធ្នូ ២០២៥ ឯកឧត្តម ជា វ៉ាន់ដេត បានមានប្រសាសន៍ថា «ក្រៅពីជោគជ័យក្នុងប្រទេស ថ្នាល verify បានក្លាយជាឧត្តមានុវត្តន៍ដែលត្រូវបានប្រទេសជាមិត្តក្នុងតំបន់ដកពិសោធ ។ ជាក់ស្តែង ខ្ញុំបានទទួលព័ត៌មានពីអនុរដ្ឋមន្ត្រីហ្វីលីពីន ថា ហ្វីលីពីន បានដាក់ឱ្យប្រើនិម្មាបនកម្មរបស់ថ្នាល verify លើអត្តសញ្ញាណឌីជីថល ជូនប្រជាជនជាង ៩០លាននាក់ និងមានប្រតិបត្តិការជាង ១៦៤លានដង ក្នុងរយៈពេលដ៏ខ្លី ដែលបង្ហាញពីសក្តានុពលយ៉ាងធំសម្បើមនៃបច្ចេកវិទ្យារបស់កម្ពុជា» ។
ឯកឧត្តម ជា វ៉ាន់ដេត បានឱ្យដឹងបន្ថែមថា ក្នុងរយៈពេល ១ឆ្នាំមកនេះ ថ្នាល verify.gov.kh ដែលជាថ្នាលផ្ទៀងផ្ទាត់ឯកសាររបស់រាជរដ្ឋាភិបាល បានពង្រីកវិសាលភាពនៃការប្រើប្រាស់យ៉ាងទូលំទូលាយ ។ គិតមកដល់ពេលនេះថ្នាល verify ត្រូវបានប្រើប្រាស់ក្នុងក្រសួង ស្ថាប័នចំនួន ១៦ និងគ្រឹះស្ថានអប់រំចំនួន ៣១ ដែលមានឯកសារសរុបជាង ៤ លាន ។
ឯកឧត្តម បានឱ្យដឹងទៀតថា ក្រសួង ក៏បានដាក់ឱ្យប្រើប្រាស់ថ្នាល និងកម្មវិធីរដ្ឋាភិបាលឌីជីថលមួយចំនួនទៀតផងដែរ ដូចជាកម្មវិធី DG SuperApp ថ្នាលផ្ទុកឯកសារសាធារណៈ go.gov.kh ផ្ទាលបញ្ជូនសារ nomsa.gov.kh ផ្ទាលបង្កើតទម្រង់បែបបទ form.gov.kh កម្មវិធីបញ្ញាសិប្បនិម្មិតបំប្លែងអត្ថបទជាសម្លេងសារិកា SARIKA ។
សូមបញ្ជាក់ផងដែរថា ថ្នាលផ្ទៀងផ្ទាត់ឯកសារ verify.gov.kh (http://verify.gov.kh/) គឺជាថ្នាលរបស់រាជរដ្ឋាភិបាល ដែលអភិវឌ្ឍដោយក្រសួងប្រៃសណីយ៍និងទូរគមនាគមន៍ និងត្រូវបានដាក់ឱ្យប្រើក្នុងគោលបំណងលុបបំបាត់ការក្លែងបន្លំឯកសារ ផ្តល់ភាពងាយស្រួលក្នុងការប្រើ និងផ្ទៀងផ្ទាត់ភាពត្រឹមត្រូវនៃឯកសារ ផ្តល់ទំនុកចិត្ត ចំណេញពេលវេលា និងកាត់បន្ថយចំណាយនានា ព្រមទាំងជំរុញការធ្វើបរិវត្តកម្មឌីជីថល ស្របតាមឧត្តមានុវត្តជាអន្តរជាតិ ។ ការផ្ទៀងផ្ទាត់ឯកសារនៅលើថ្នាល verify.gov.kh ត្រូវធ្វើឡើងតាមរយៈការដាក់បញ្ចូល QR Code ស្តង់ដា ដោយប្រើបច្ចេកវិទ្យាប្លុកឆេន (Blockchain) ដែលមានសុវត្ថិភាពខ្ពស់នៅលើសន្លឹកនៃឯកសារនីមួយៗ ។ ទន្ទឹមនឹងនេះ ការប្រើឯកសារដែលមានដាក់បញ្ចូល QR Code ស្តង់ដានេះ មិនតម្រូវឱ្យមានការធ្វើនីត្យានុកូលកម្ម លើឯកសារថតចម្លងក្នុងទម្រង់ជាក្រដាសឡើយ ៕
ចែករំលែកព័តមាននេះ