រាជធានីភ្នំពេញ ៖ បន្ទាប់ពីពលរដ្ឋខ្មែរឥស្លាម និងអ្នកកាន់សាសនាឥស្លាមបានផ្ទុះប្រតិកម្មនៅក្នុងបណ្តាញសង្គម ដោយខឹងសម្បារលោកអាចារ្យ និងអ្នកសម្តែងមួយក្រុម ដែលបានធ្វើត្រាប់ការថ្វាយបង្គំរបស់សាសនាឥស្លាមដោយពុំសមរម្យ គ្មានសីលធម៌នោះ ឯកឧត្តមបណ្ឌិត ទេសរដ្ឋមន្ដ្រី…
រាជធានីភ្នំពេញ ៖ បន្ទាប់ពីពលរដ្ឋខ្មែរឥស្លាម និងអ្នកកាន់សាសនាឥស្លាមបានផ្ទុះប្រតិកម្មនៅក្នុងបណ្តាញសង្គម ដោយខឹងសម្បារលោកអាចារ្យ និងអ្នកសម្តែងមួយក្រុម ដែលបានធ្វើត្រាប់ការថ្វាយបង្គំរបស់សាសនាឥស្លាមដោយពុំសមរម្យ គ្មានសីលធម៌នោះ ឯកឧត្តមបណ្ឌិត ទេសរដ្ឋមន្ដ្រី អូស្មាន ហាស្សាន់ និងជាប្រធានគណៈចលនាសាសនិកឥស្លាមកម្ពុជា ក៏បានបង្ហោះសារនៅក្នុងបណ្ដាញសង្គមរបស់ខ្លួន កាលពីយប់ថ្ងៃទី០៥ ខែធ្នូ ឆ្នាំ២០២៥ ដោយទទួចសូមបងប្អូនបន្ធូរអារម្មណ៍ យោគយល់ និងរក្សាភាពស្ងប់ស្ងាត់ជាធម្មតា ដើម្បីរក្សាការសាមគ្គីភាពដ៏រឹងមាំក្នុងពេលដែលយើងកំពុងសស្រាក់សស្រាំនឹងគ្នា ដើម្បីរក្សាការពារទឹកដីជាមួយកងទ័ពយើងចំពោះមុខ
សត្រូវឈ្លានពាន ។
ឯកឧត្តមបណ្ឌិត ទេសរដ្ឋមន្ដ្រី អូស្មាន ហាស្សាន់ ក៏បានអោយដឹងទៀតថា ថ្ងៃនេះ មានរឿងគួរឱ្យសោកស្ដាយណាស់ ដែលមានលោកអាចារ្យ និងអ្នកសម្តែងមួយក្រុម បានបង្កើតនូវភាពកំប្លែងដែលមិនត្រឹមត្រូវ មានលក្ខណៈដូចមើលងាយ ដោយបានយកត្រាប់នៃការធ្វើការគោរពថ្វាយបង្គំរបស់សាសនិកឥស្លាមទូទាំងសាកលលោក មកធ្វើការការលេងសើចសប្បាយរីករាយ ដែលវាជាកាយវិការ ប្រាស់ចាកពីសិលធម៌ស្អាតស្អំរបស់យើងដែល មានសាសនារៀងៗខ្លួន ដោយមិនសមហេតុសមផល ដែលធ្វើឲ្យប៉ះពាល់ដល់អារម្មណ៍របស់អ្នកកាន់សាសនាឥស្លាម ទប់ចិត្តមិនបានហើយមានការខឹងសម្បារបញ្ចេញមតិកំហឹង។
ទង្វើខាងលើនេះ វាខ្វះនូវសេចក្ដីថ្លៃថ្នូរ ក្នុងពេលដែលប្រជាជនកម្ពុជាយើងទាំងអស់គ្នា កំពុងទទួលបាននូវភាពសុខដុមនីយកម្ម ជាតិសាសន៍ និងសាសនាដែលប្រជាជនកម្ពុជាទាំងមូលទទួលបាន នៅក្រោមការដឹកនាំរបស់រាជរដ្ឋាភិបាលតាំងពីក្រលំបាកដែលមានសម្ដេចតេជោអតីតនាយករដ្ឋមន្ត្រី និងបន្តមកសម្ដេចធិបតីនាយរដ្ឋមន្ត្រី ។
ឯកឧត្តមបណ្ឌិត ទេសរដ្ឋមន្ដ្រី អូស្មាន ហាស្សាន់ ក៏បានអោយដឹងទៀតថា បន្ទាប់ពីឃើញនូវវីដេអូរូបភាពនេះបង្ហោះភ្លាម ឯកឧត្តមបានប្រាប់បន្ទាន់ទៅអាជ្ញាធរខេត្តត្បូងឃ្មុំ និងឯកឧត្ដមសមត្ថកិច្ចក្រសួងវប្បធម៌ ដើម្បីធ្វើការអប់រំណែនាំពួកគាត់នូវទង្វើខុសឆ្គងប្រាស់ចាកទាំងនោះ ហើយបុគ្គល សាមីខ្លួនដែលបានប្រព្រឹត្តទាំងនោះ ក៏បានចេញមុខវីដេអូទទួលកំហុសរួមទាំងការសោកស្ដាយ និងបានសុំទោសដល់បងប្អូនឥស្លាមជាសាធារណៈរួចហើយ ។
ដូចនេះ សូមបងប្អូនបន្ធូរអារម្មណ៍ យោគយល់ និងរក្សាភាពស្ងប់ស្ងាត់ជាធម្មតាដើម្បីរក្សាការសាមគ្គីភាពដ៏រឹងមាំក្នុងពេលដែលយើងកំពុងសស្រាក់សស្រាំនឹងគ្នា ដើម្បីរក្សាការពារទឹកដីជាមួយកងទ័ពយើងចំពោះមុខសត្រូវឈ្លានពាន។
គួរបញ្ជាក់ថា កាលពីថ្ងៃទី២៩ ខែវិច្ឆិកា ឆ្នាំ២០២៥ ក្នុងពិធីមង្គលការមួយក្នុងស្រុកពញ្ញាក្រែក ខេត្តត្បូងឃ្មុំ មានអ្នកសិល្បៈមួយក្រុម បានរៀបចំពិធីបុកលក្ខ ដោយប្រើកាយកាយវិការពុំសមរម្យបែបលេងសើចដោយយកជើងទៅធាត់សាសនិកអ៊ិស្លាមដែលថ្វាយបង្គំនៅក្នុងពិធី ។
ទន្ទឹមទាំងនោះ លោកតាអាចារ្យពិលាអិន ប៊ុនធឿន ក៏បានយកមកបង្ហោះនៅក្នុងបណ្តាញ សង្គម របស់ខ្លួនក៏ផ្ទុះប្រតិកម្មពីពលរដ្ឋខ្មែរឥស្លាម និងអ្នកកាន់អ៊ីស្លាមសាសនា ដោយមើលឃើញនូវកំហុសរបស់ខ្លួន ។
លោកតាអាចារ្យ ពិលាអិន ប៊ុនធឿន ព្រមទាំងលោកម៉ុក ចូក ដែលជាអ្នករៀបចំពិពីបុកលក្ខនិងសម្តែង គាត់បានចេញមុខមកសុំទោសជាសាធារណៈដល់បងប្អូនខ្មែរឥស្លាម និងអ្នកកាន់សាសនាអ៊ីស្លាមទាំងអស់ ដោយគាត់គ្មានចេតនាមើលងាយដល់សាសនាឥស្លាមនោះទេ ៕
ចែករំលែកព័តមាននេះ