រាជធានីភ្នំពេញ៖ ក្រសួងទេសចរណ៍ និងស្ថានទូតបារាំងប្រចាំកម្ពុជា បានប្តេជ្ញាពង្រឹងកិច្ចសហប្រតិបត្តិការដើម្បីលើកកម្ពស់វិស័យទេសចរណ៍ និងការបណ្តុះបណ្តាលវិជ្ជាជីវៈទេសចរណ៍ឲ្យឈានដល់ស្តង់ដាអន្តរជាតិ។ យោងតាមការផ្សាយរបស់ក្រសួងទេសចរណ៍ នៅថ្ងៃទី០៥ ខែធ្នូនេះ បានឱ្យដឹងថាក្នុងជំនួបការងារដ៏សំខាន់នៅស្ថានទូតបារាំងប្រចាំកម្ពុជា…
រាជធានីភ្នំពេញ៖ ក្រសួងទេសចរណ៍ និងស្ថានទូតបារាំងប្រចាំកម្ពុជា បានប្តេជ្ញាពង្រឹងកិច្ចសហប្រតិបត្តិការដើម្បីលើកកម្ពស់វិស័យទេសចរណ៍ និងការបណ្តុះបណ្តាលវិជ្ជាជីវៈទេសចរណ៍ឲ្យឈានដល់ស្តង់ដាអន្តរជាតិ។
យោងតាមការផ្សាយរបស់ក្រសួងទេសចរណ៍ នៅថ្ងៃទី០៥ ខែធ្នូនេះ បានឱ្យដឹងថាក្នុងជំនួបការងារដ៏សំខាន់នៅស្ថានទូតបារាំងប្រចាំកម្ពុជា លោក ហួត ហាក់ រដ្ឋមន្ត្រីក្រសួងទេសចរណ៍ បានពិភាក្សាជាមួយលោក Oliver Richard ឯកអគ្គរដ្ឋទូតបារាំង ប្រចាំកម្ពុជា ស្តីពីយុទ្ធសាស្ត្រពង្រឹងកិច្ចសហប្រតិបត្តិការវិស័យទេសចរណ៍។
លោកឯកអគ្គរដ្ឋទូតបារាំង បានគូសបញ្ជាក់អំពីការចូលរួមដ៏សំខាន់របស់ប្រទេសបារាំងក្នុងការអភិវឌ្ឍវិស័យទេសចរណ៍កម្ពុជាជាយូរមកហើយ តាមរយៈគម្រោងសហប្រតិបត្តិការជាច្រើន។ ទន្ទឹមនឹងនេះ បារាំងបានសន្យាបន្តជួយគាំទ្របន្ថែមទៀតទាំងក្នុងវិស័យទេសចរណ៍ និងបដិសណ្ឋារកិច្ច។
ជាកិច្ចឆ្លើយតប លោករដ្ឋមន្ត្រីហួត ហាក់ បានថ្លែងអំណរគុណ និងវាយតម្លៃខ្ពស់យ៉ាងជ្រាលជ្រៅចំពោះរដ្ឋាភិបាល ប្រជាជន និងស្ថានទូតបារាំង ដែលបានជួយឧបត្ថម្ភ និងគាំទ្រដល់កម្ពុជាលើគ្រប់វិស័យ ជាពិសេសការអភិវឌ្ឍទេសចរណ៍។
លោករដ្ឋមន្ត្រីក៏បានសម្តែងការដឹងគុណដល់ស្ថានទូតបារាំងចំពោះការជួយផ្សព្វផ្សាយព័ត៌មានពិតពីសក្តានុពលទេសចរណ៍ កាលានុវត្តភាពវិនិយោគ និងសភាពការណ៍ដ៏ល្អប្រសើរពីនយោបាយ សុខសន្តិភាព សុវត្ថិភាព និងសណ្តាប់ធ្នាប់សាធារណៈ នៅកម្ពុជាទៅដល់វិនិយោគិន និងប្រជាជនបារាំង។
កិច្ចសហប្រតិបត្តិការដ៏ល្អនេះ បានធ្វើឲ្យចំនួនភ្ញៀវទេសចរបារាំងមកទស្សនាកម្ពុជាកើនឡើងជារៀងរាល់ឆ្នាំ ហើយបារាំងបានក្លាយជាទីផ្សារធំទាំង ១០របស់កម្ពុជា៕
ចែករំលែកព័តមាននេះ