រាជធានីភ្នំពេញ ៖ ទីបំផុតឆាយ មាស មកពីក្លិបសំរោងកោងកីឡាខេត្តបាត់ដំបង មានឱកាសរកបាន៣ពិន្ទុបន្ថែមទៀត បន្ទាប់ពីបានប្រើស្នៀតកែងវាយចូលសៀតផ្កា ជ័យ ប៊ុនសង់ មកពីក្លិបខេមរិន្ទមានរិទ្ធ យ៉ាងពេញទំហឹងបណ្តាលឱ្យដួលសន្លប់ក្រោកលែងរួចនៅទឹកទី៤ នៅលើសង្វៀនCTN កាលពីថ្ងៃសៅរ៍ទី១ មីនា កន្លងមកនេះ ។ ចំណែកសុខ សុវណ្ណ មកពីក្លិបកងពលតូចលេខ
រាជធានីភ្នំពេញ ៖ ទីបំផុតឆាយ មាស មកពីក្លិបសំរោងកោងកីឡាខេត្តបាត់ដំបង មានឱកាសរកបាន៣ពិន្ទុបន្ថែមទៀត បន្ទាប់ពីបានប្រើស្នៀតកែងវាយចូលសៀតផ្កា ជ័យ ប៊ុនសង់ មកពីក្លិបខេមរិន្ទមានរិទ្ធ យ៉ាងពេញទំហឹងបណ្តាលឱ្យដួលសន្លប់ក្រោកលែងរួចនៅទឹកទី៤ នៅលើសង្វៀនCTN កាលពីថ្ងៃសៅរ៍ទី១ មីនា កន្លងមកនេះ ។ ចំណែកសុខ សុវណ្ណ មកពីក្លិបកងពលតូចលេខ៣១ បញ្ជាការដ្ឋានកងទ័ពជើងទឹក បានយកឈ្នះ យស់ សំអាល់ មកពីក្លិបឃ្លាំងមឿងកីឡាខេត្តពោធិ៍សាត់ ដោយពិន្ទុ ក្នុងជំនួបប្រកួតវគ្គជម្រុះវិលជុំឈានទៅដណ្តើមខ្សែក្រវាត់ជើងឯកស្រាបៀរលីអូ ក្នុងប្រភេទទម្ងន់៦០គីឡូក្រាម ។
ឆាយ មាស ពេលនេះគេមាន៤ពិន្ទុដោយប្រកួតបាន២លើក ឈ្នះ១ និងចាញ់១ ចំណែកឯជ័យ ប៊ុនសង់ វិញ ទើបតែរកបាន២ពិន្ទុប៉ុណ្ណោះ ដោយប្រកួតបាន២លើក នៅមិនទាន់ស្គាល់ឈ្នះម្តងណាឡើយ ។ ជ័យ ប៊ុនសង់ កាលពីជុំទី១ គេធ្លាប់ចាញ់សន្លប់ក្រោមស្នៀតជើង យស់ សំអាល់ នៅក្នុងទឹកទី១ រួចម្តងមកហើយ ចំណែកឯលើកនេះគ្រាន់បើបន្តិច គេអាចតស៊ូប្រកួតបានដល់ទឹកទី៤ ។ ទឹកទី១ និងទឹកទី២ ជ័យ ប៊ុនសង់ មានឱកាសវាយបកសងទៅលើឆាម មាស បានយ៉ាងល្អបំផុត ជាមួយនឹងការប្រើស្នៀតជើងទាត់និងធាក់ចេញធ្វើឱ្យឆាយ មាស មិនសូវមានឱកាសចូលកៀកបានឡើយ ។ ជាពិសេសរាល់ការព្យាយាមចូលកៀកដើម្បីម៉ាត់សងទៅលើផ្ទៃមុខ ប៊ុនសង់ នោះគឺមិនសូវបានសម្រេចឡើយ ។ រហូតដល់ទឹកទី៣ ប៊ុនសង់ហាក់មិនបីដូចជាមានប្រៀបជាងឆាយ មាស បន្តិច ដោយគេអាចវាយចូលមុខនិងទាត់ចេញបានច្រើនជាង ប៉ុន្តែចូលដល់ទឹកទី៤ ខណៈពេលដែលប៊ុនសង់ ព្យាយាមសម្រុកចូលកៀក ដោយខ្វះការប្រុងប្រយ័ត្ន នោះក៏ត្រូវ ឆាយ មាស បុកមួយកែងចូលសៀតផ្កាយ៉ាងពេញទំហឹងបណ្តាលឱ្យដួលសន្លប់ស្តូកស្តឹង បើទោះជាអាជ្ញាកណ្តាលលោកសុខ វិជ័យ រាប់ដល់៨ទៅហើយ ក៏គេនៅតែមិនអាចក្រោយរួចដែរ ។
ចំណែកឯ សុខ សុវណ្ណ វិញ នោះពេលនេះគេរកបាន៦ពិន្ទុ ហើយសម្រាប់ការប្រកួតទាំង២លើករបស់គេ ដោយឈ្នះទាំង២លើកជាប់គ្នាតែម្តង ។ រីឯយស់ សំអាល់ វិញ នោះគេទើបតែរកបាន៤ពិន្ទុប៉ុណ្ណោះ ព្រោះតែការប្រកួតទាំង២លើករបស់គេមកនេះឈ្នះម្តង ចាញ់ម្តង ។
រវាងគូនេះគឺចាប់តាំងពីនៅក្នុងទឹកទី១ មកម៉្លេះ គេបានវាយបកសងរកគ្នាយ៉ាងសាហាវបំផុត ព្រោះទាំងសងខាងសុទ្ធតែមានបំណងប្រជែងរក៣ពិន្ទុម្នាក់បន្ថែមទៀតដូចគ្នា ។ សំអាល់ បានព្យាយាម ម៉ាត់ចេញសំដៅមុខ សុវណ្ណ និងទាត់យ៉ាងសន្ធាប់ ប៉ុន្តែត្រូវគូប្រកួតច្រាស់សងមកវិញភា្លមៗ ធ្វើឱ្យស្ថានការណ៍ប្រកួតរវាងពួកគេទាំង២ឡើងកំដៅ ប៉ុន្តែរាល់ការដើរចូលដោយខ្វះការប្រុងប្រយ័ត្នរបស់សំអាល់ មិនខុសពីផ្ទាំងស៊ីបរបស់សុវណ្ណឡើយ ។ទោះបីយ៉ាងណាសំអាល់ គេមិនរាថយឡើយ គឺគេនៅតែដើរចូលវាយនិងទាត់សងទៅលើសុវណ្ណវិញ តែដោយសារតែគេមានដៃខ្លី និងជើងខ្លីជាងនោះ គឺរាល់ការវាយនិងទាត់ចេញរបស់គេ មិនសូវជាទទួលបានផលល្អឡើយ ។ ចូលដល់ចុងទឹកទី៤និងទឹកទី៥ ទោះបីកម្លាំងសុវណ្ណហាក់បីដូចជាស្រុតចុះបន្តិចមែន តែរាល់ការវាយនិងទាត់ចេញរបស់គេនៅតែទទួលបានផលល្អជាងសំអាល់ដដែល ទើបគេឈ្នះពិន្ទុ ប៉ុន្តែមុននឹងយកឈ្នះសំអាល់ គេក៏វេទនា មិនតិចដែរ ៕
ចែករំលែកព័តមាននេះ