រាជធានីភ្នំពេញ ៖ ការប្រកួតបាល់ទះយុវជន សិស្សវិទ្យាល័យរាជធានីភ្នំពេញ ពានរង្វាន់សាកលវិទ្យាល័យវេស្ទើនប្រចាំឆ្នាំ២០១៤ ដែលរៀបចំឡើងក្រោមកិច្ចសហការរវាងសាកលវិទ្យាល័យវេស្ទើន និងក្រសួងអប់រំ យុវជន និងកីឡា ដែលបានចាប់ផ្ដើមតាំងពីថ្ងៃទី៩ មករា មកនោះបានបិទការប្រកួតហើយកាលពីរសៀលថ្ងៃទី២៨ កុម្ភៈ ឆ្នាំ២០១៤ នៅសាលបាល់ទះក្នុងពហុកីឡដ្ឋានជាតិ ។
កម្មវិធីនេះមានការចូលរួមផ្ដល់រង្វាន់ដល់ជ័យលាភីពីសំណាក់លោក មិល កាដូ អគ្គនាយករងកីឡានៃក្រសួងអប់រំ យុវជន និងកីឡា តំណាងលោករដ្ឋលេខាធិការក្រសួងអប់រំ យុវជន និងកីឡា ស៊ាន បូរ៉ាត ,លោក តែ ឡូរិន ទីប្រឹក្សាអមទីស្ដីការគណៈរដ្ឋមន្ដ្រី និងជាសាកលវិទ្យាធិការនៃសាកលវិទ្យាល័យវេស្ទើន ព្រមទាំងមន្ដ្រីកីឡា និងសិស្សានុសិស្សយ៉ាងច្រើនកុះករ ។
មានប្រសាសន៍នាឱកាសនោះ លោកមិល កាដូ បានថ្លែងថា ការប្រកួតកីឡាបាល់ទះយុវជន សិស្សវិទ្យាល័យពានរង្វាន់សាកលវិទ្យាល័យវេស្ទើននេះជាការឆ្លើយតបនឹងយុទ្ធសាស្រ្ដចតុកោណរបស់រាជរដ្ឋាភិបាល និងយុទ្ធសាស្រ្ដក្រសួងអប់រំ យុវជន និងកីឡា ក្នុងការពង្រីកវិស័យកីឡា និងការអភិវឌ្ឍធនធានមនុស្សនៅកម្ពុជា ។ លោកបានផ្ដាំផ្ញើដល់ក្មួយៗទាំងអស់ សូមយកចិត្ដទុកដាក់ខ្ពស់ចូលរួមក្នុងការសិក្សានិងការហ្វឹកហាត់បន្ថែមទៀតតាមលក្ខណៈបច្ចេកទេស រក្សាឱ្យបាននូវកម្រិតបច្ចេកទេសប្រកាន់យុត្ដិធម៌ សីលធម៌ មានឆន្ទៈមុតមាំ និងគោរពគ្នាទៅវិញទៅមក ។
លោក តែ ឡូរិន មានប្រសាសន៍ទាក់ទងនឹងសាលារបស់លោកថា ក្រៅពីជួយលើកស្ទួយវិស័យអប់រំនៅក្នុងប្រទេសកម្ពុជា សាកលវិទ្យាល័យវេស្ទើនបានចូលរួមយ៉ាងសកម្មក្នុងសកម្មភាពសង្គម និងកីឡាផងដែរ ។ ជាក់ស្ដែង ដូចជាការរៀបចំកម្មវិធីនេះគឺធ្វើឡើងក្នុងគោលបំណងដើម្បីរឹតចំណងមិត្ដភាពរវាងយុវជនកម្ពុជាពីវិទ្យាល័យមួយទៅវិទ្យាល័យមួយ និងជួយជំរុញលើកទឹកចិត្ដដល់យុវជនខ្មែរឱ្យនាំគ្នាចូលរួមលេងកីឡាដើម្បីសុខភាព មិត្ដភាព ប្រាជ្ញាឈ្លាសវៃ និងជាពិសេសចៀសវាងការបណ្ដោយខ្លួនឱ្យធ្លាក់ក្នុងការប្រើប្រាស់គ្រឿងញៀន ធ្វើឱ្យប៉ះពាល់ដល់យុវជនខ្មែរយើង និងសង្គមជាតិ ។
ចំពោះលទ្ធផលចំណាត់ថ្នាក់ជ័យលាភីដែលទទួលបានគឺ ចំណាត់ថ្នាក់លេខ១ បានទៅសមាគមកីឡាសិស្សវិទ្យាល័យហ៊ុនសែនភ្នំពេញថ្មី ទទួលបានពានរង្វាន់១ ថវិកា ៦លានរៀល ព្រមទាំងអាហារូបករណ៍៥០ភាគរយ ។ លេខ២ បានទៅសមាគមកីឡាសិស្សវិទ្យាល័យទួលទំពូង ទទួលបានទឹកប្រាក់ ៤លានរៀល អាហារូបករណ៍ ៥០ភាគរយ ។ លេខ៣ បានទៅសមាគមកីឡាសិស្សវិទ្យាល័យជម្ពូវ័ន ទទួលបានទឹកប្រាក់ ៣លានរៀល អាហារូបករណ៍៥០ភាគរយ និងលេខ៤ បានទៅសមាគមកីឡាសិស្សវិទ្យាល័យទួលអំពិល ទទួលបានទឹកប្រាក់ ២លានរៀល អាហារូបករណ៍ ៥០ភាគរយ ។
ក្រៅពីនេះ ក្រុមហ៊ុនភេសជ្ជៈ M-150 បានឧបត្ថម្ភដល់ចំណាត់ថ្នាក់លេខ១ នូវទឹកប្រាក់ចំនួន ២៨០ដុល្លារ ,ភេសជ្ជៈ M-150 ចំនួន២កេស និងអាវយឺតចំនួន ១៥ ។ លេខ២ ទឹកប្រាក់ ១៨០ដុល្លារ ,ភេសជ្ជៈ M-150 ចំនួន២កេស និងអាវយឺតចំនួន ១៥ ។ លេខ៣ ទឹកប្រាក់ ១៣០ដុល្លារ ,ភេសជ្ជៈ M-150 ចំនួន២កេស និងអាវយឺតចំនួន ១៥ និងលេខ៤ ទឹកប្រាក់ ១០០ដុល្លារ ,ភេសជ្ជៈ M-150 ចំនួន២កេស និងអាវយឺតចំនួន ១៥ ។
សូមបញ្ជាក់ថា ការប្រកួតដែលមានរយៈពេលជាង១ខែនេះ គឺធ្វើឡើងរៀងរាល់ថ្ងៃព្រហស្បតិ៍-សុក្រ-សៅរ៍ និង ប្រកួតលើទីលានចំនួន៧វិទ្យាល័យ ហើយមានចំនួន២៧ក្រុមចូលរួម និងចែកចេញជា២ពូល គឺពូល A មានសមាគមកីឡាសិស្សវិទ្យាល័យជាស៊ីម ចំរើនរដ្ឋ ,ព្រែកលៀប ,ទួលអំពិល ,សំរោង ,ទួលទំពូង ,ព្រែកកំពឹស ,កោះដាច់ ,វត្ដភ្នំ ,ជាស៊ីមជ្រោយចង្វា ,ឥន្ទ្រទេវី ,ផ្សារដើមថ្កូវ ,សន្ធរម៉ុក និងវិទ្យាល័យឫស្សីកែវ។ ពូល B មានវិទ្យាល័យអរុណវត្ដី ,ពងទឹក ,ច្បារអំពៅ ,ជាស៊ីមបឹងកេងកង ,ហ៊ុនសែនភ្នំពេញថ្មី ,ជាស៊ីមឈូកវ៉ា ,ហ៊ុនសែនបុរី១០០ខ្នង ,ទួលប្រាសាទសែនសុខ ,ព្រែកឯង,ព្រះស៊ីសុវត្ថិ ,បឹងត្របែក ,ជម្ពូវ័ន ,ចាក់អង្រែ និងវិទ្យាល័យជាស៊ីមសាមគ្គី ៕
ចែករំលែកព័តមាននេះ