រាជធានីភ្នំពេញ ៖ បុរសម្នាក់ដែលជាប្រធានក្រុមហ៊ុនIBCបានជិះម៉ូតូក្នុងល្បឿនលឿនជ្រុលទៅបុកបង្គោលភ្លើងបំភ្លឺផ្លូវ បណ្ដាលឲ្យជនរងគ្រោះដួលបោកក្បាលហូរឈាមស្លាប់នៅនឹងកន្លែងកើតហេតុភ្លាមៗតែម្តង ។
ហេតុការណ៍ខាងលើនេះដែរបានកើតឡើងកាលពីវេលាម៉ោង៤និង៣០នាទីទៀបភ្លឺថ្ងៃទី២២ ខែសីហា ឆ្នាំ២០១៩ ទល់មុខវិទ្យាល័យជាស៊ីមសាមគ្គី តាមបណ្តោយផ្លូវ២៧១ ស្ថិតក្នុងភូមិ១ សង្កាត់ស្ទឹងមានជ័យ១ ខណ្ឌមានជ័យ ។
ជនរងគ្រោះដែលស្លាប់ឈ្មោះ មាស រដ្ឋា ភេទប្រុស អាយុ៣៤ឆ្នាំ ជាអគ្គនាយកក្រុមហ៊ុនឯកជន IBC ស្នាក់នៅភូមិត្រពាំងល្វា សង្កាត់កាកាប ខណ្ឌពោធិ៍សែនជ័យ មានស្រុកកំណើត ផ្ទះលេខ ៨៦បេ ផ្លូវ៦៣ សង្កាត់ស្រះចក ខណ្ឌដូនពេញ ជាអ្នកបើកបរម៉ូតូមួយគ្រឿងម៉ាកភីស៊ីអិច (CPX) ពណ៌ក្រហម ពាក់ស្លាកលេខ ភ្នំពេញ ១GU-៩៥១៩ ។
តាមប្រភពព័ត៌មានពីកន្លែងកើតហេតុបានអោយដឹងថា មុនពេលកើតហេតុ គេបានឃើញបុរសរងគ្រោះខាងលើមិនថាគោលបំណងធ្វើដំណើរទៅណានោះទេ គឺបានបើកបរម៉ូតូមួយគ្រឿងធ្វើដំណើរតាមផ្លូវ ២៧១ ក្នុងទិសដៅពីត្បូងទៅជើង ក្នុងល្បឿនលឿន លុះមកដល់ចំណុចកើតហេតុដែលជាផ្លូវកោង ក៏ស្រាប់តែរេចង្កូតឡើងលើចិញ្ចើមផ្លូវជ្រុលទៅបុកបង្គោលភ្លើងបំភ្លឺផ្លូវ បណ្ដាលឲ្យជនរងគ្រោះដួលបោកក្បាលហូរឈាមស្លាប់យ៉ាងអាណោចអាធ័មនៅនឹងកន្លែងកើតហេតុតែម្តង ។ ភ្លាមៗនោះដែរ គេឃើញមានកម្លាំងសមត្ថកិច្ចមូលដ្ឋានបានចុះមកកន្លែងកើតហេតុ រួចហើយក៏បានទាក់ទងហៅសាច់ញាតិជនរងគ្រោះ អោយមកមើលនៅកន្លែងកើតហេតុផងដែរ ។
ក្រោយពេលកើតហេតុ សពជនរងគ្រោះត្រូវបានសមត្ថកិច្ចប្រគល់អោយសាច់ញាតិយកទៅតម្កល់ទុកធ្វើបុណ្យតាមប្រពៃណី ។ ចំណែកម៉ូតូរបស់ជនរងគ្រោះត្រូវបានសមត្ថកិច្ចយកទៅរក្សាទុកនៅអធិការដ្ឋានខណ្ឌមានជ័យ រង់ចាំប្រគល់អោយសាច់ញាតិរបស់ជនរងគ្រោះវិញ ៕ (កែសម្រួលដោយ ៖ ធីតា)
ចែករំលែកព័តមាននេះ