រាជធានីភ្នំពេញ ៖ ក្មេងប្រុសជំទង់សិស្សសាលាម្នាក់ បានជិះម៉ូតូ១គ្រឿងទាក់ដៃចង្កូត ជាមួយម៉ូតូអ្នកដំណើរ១គ្រឿងទៀត បណ្ដាលឲ្យដួលខ្ទាតទៅកណ្ដាលផ្លូវ ស្របពេលនោះមានរថយន្តទ្រុងឃ្លុប ១គ្រឿង បើកលឿនទៅពីក្រោយ កិនអូសប្រមាណ៥ម៉ែត្ររងរបួសធ្ងន់ធ្ងរ។…
រាជធានីភ្នំពេញ ៖ ក្មេងប្រុសជំទង់សិស្សសាលាម្នាក់ បានជិះម៉ូតូ១គ្រឿងទាក់ដៃចង្កូត ជាមួយម៉ូតូអ្នកដំណើរ១គ្រឿងទៀត បណ្ដាលឲ្យដួលខ្ទាតទៅកណ្ដាលផ្លូវ ស្របពេលនោះមានរថយន្តទ្រុងឃ្លុប ១គ្រឿង បើកលឿនទៅពីក្រោយ កិនអូសប្រមាណ៥ម៉ែត្ររងរបួសធ្ងន់ធ្ងរ។ បន្ទាប់មក ភាគីអ្នកដំណើរ ដែលជិះម៉ូតូទាក់ដៃចង្កូតគ្នាជាមួយម៉ូតូជនរងគ្រោះខាងលើនោះ ក៏បានជិះម៉ូតូគេចខ្លួនបាត់ រីឯរថយន្តទ្រុងឃ្លុបដឹកអីវាន់រោងចក្រ ដែលកិនជនរងគ្រោះបានឈប់នៅនឹងកន្លែងកើតហេតុ ហើយអ្នកបើកបរ ត្រូវបាននគរបាលឃាត់ខ្លួន ។
ឧប្បត្តិហេតុគ្រោះថ្នាក់ចរាចរណ៍ខាងលើនោះ បានកើតឡើងកាលពីវេលាម៉ោង១និង៤០នាទីរសៀលថ្ងៃទី៥ ខែមីនា ឆ្នាំ២០២៦ នៅតាមមហាវិថីឈ្នះឈ្នះ ត្រង់ចំណុចមុខផ្សារបឹងបៃតង ស្ថិតនៅក្នុងភូមិត្រពាំងទា សង្កាត់ត្រពាំងក្រសាំង ខណ្ឌពោធិ៍សែនជ័យ រាជធានីភ្នំពេញ ។
បុរសអ្នករត់ម៉ូតូកង់បីម្នាក់ បាននិយាយថា នៅមុនពេលកើតហេតុ ខណៈដែលគាត់កំពុងឈប់ចាំម៉ូយ នៅជិតនោះ គាត់បានឃើញក្មេងប្រុសជំទង់រងគ្រោះជិះម៉ូតូ ១គ្រឿង ម៉ាកហុងដាស្កូបពីពណ៍ស ពាក់ស្លាកលេខភ្នំពេញ 1HI-4722 ។ ធ្វើដំណើរតាមមហាវិថីឈ្នះឈ្នះ ក្នុងទិសដៅពីត្បូងទៅជើង លុះពេលទៅដល់ត្រង់ចំណុចកើតហេតុ ក៏ស្រាប់តែទាក់ដៃចង្កូតគ្នា ជាមួយម៉ូតូមិនចាំម៉ាក ១គ្រឿងទៀត ដែលបើកស្របគ្នាដែរ បណ្ដាលឲ្យជនរងគ្រោះដួលខ្ទាតទៅកណ្ដាលថ្នល់ ។
បុរសនោះ បាននិយាយបន្តទៀតថា ពេលនោះក្មេងប្រុសរងគ្រោះ មិនទាន់ទាំងងើបរួចផង ហើយអ្នកនៅជិតនោះ ក៏មិនទាន់បានចូលទៅជួយលើកផង ស្រាប់តែមានរថយន្តទ្រុងឃ្លុប ១គ្រឿងពណ៌ស ពាក់ស្លាកលេខភ្នំពេញ 3D-9600 ។ បើកបរស្របទិសគ្នាទៅដល់ល្មម រួចកិននិងអូសជនរងគ្រោះជាច្រើនម៉ែត្រ បណ្ដាលឲ្យរងរបួសធ្ងន់តែម្ដង បន្ទាប់មករថយន្តបានឈប់ ហើយអ្នកបើកបរ ត្រូវបាននគរបាលឃាត់ខ្លួន ។ ចំណែកឯអ្នកជិះម៉ូតូទាក់ដៃចង្កូតម៉ូតូជនរងគ្រោះ បានជិះម៉ូតូគេចខ្លួនបាត់ ។
នគរបាលបានប្រាប់ថា ក្រោយពេលកើតហេតុក្មេងប្រុសរងគ្រោះខាងលើនោះត្រូវបានក្រុមគ្រួសារបញ្ជូនតាមម៉ូតូកង់បីទៅសង្គ្រោះបន្ទាន់នៅមន្ទីពេទ្យជាតិតេជោសន្តិភាព ។ បន្ទាប់មកទៀតនគរបាលប៉ុស្តិ៍ត្រពាំងក្រសាំង និងនគរបាលខណ្ឌពោធិ៍សែនជ័យ បានចុះទៅធ្វើការវាស់វែង និងនាំយករថយន្តព្រមទាំងម៉ូតូជនរងគ្រោះទៅរក្សាទុករង់ចាំការដោះស្រាយនៅពេលក្រាយ ៕
ចែករំលែកព័តមាននេះ