រាជធានីភ្នំពេញ ៖ នៅទីបំផុត ការកាត់ក្តីនៅលើសង្វៀនទូរទស្សន៍បាយ័នស្ទឹងមានជ័យ ក្នុងរយៈពេល២ថ្ងៃបន្តបន្ទាប់គ្នា បានបង្ហាញយ៉ាងច្បាស់ថា កីឡាករឯម ខ្លឹមខ្មៅ មកពីក្លិបឫទ្ធិពោធិសែនជ័យ ដែលបានប្រកាសយកឈ្នះឱ្យខាងតែបានលើ សូយ យក្សតឿ មកពីក្លិបពោធិជ័យកីឡា បានក្លាយជាការពិត ។ ប៉ុន្តែសម្រាប់កីឡាករវ៉ោយ សុធន មកពីក្លិបរាជសីហ៍ខេត្តបន្ទាយមាន
រាជធានីភ្នំពេញ ៖ នៅទីបំផុត ការកាត់ក្តីនៅលើសង្វៀនទូរទស្សន៍បាយ័នស្ទឹងមានជ័យ ក្នុងរយៈពេល២ថ្ងៃបន្តបន្ទាប់គ្នា បានបង្ហាញយ៉ាងច្បាស់ថា កីឡាករឯម ខ្លឹមខ្មៅ មកពីក្លិបឫទ្ធិពោធិសែនជ័យ ដែលបានប្រកាសយកឈ្នះឱ្យខាងតែបានលើ សូយ យក្សតឿ មកពីក្លិបពោធិជ័យកីឡា បានក្លាយជាការពិត ។ ប៉ុន្តែសម្រាប់កីឡាករវ៉ោយ សុធន មកពីក្លិបរាជសីហ៍ខេត្តបន្ទាយមានជ័យ ដែលបានប្រកាសយកឈ្នះដូចគ្នាទៅលើ ឌុន រដ្ឋា មកពីក្លិបអេភូថេងកីឡានោះ បានខាតដើមខាតចុងឡើងធ្ងន់កតែម្តង ។
ការប្រកួតកាលពីថ្ងៃសុក្រ ទី២៨ កុម្ភៈ នៅលើសង្វៀនទូរទស្សន៍ស្ទឹងមានជ័យ កីឡាករវ៉ោយ សុធន បានសន្លប់នៅលើរេញស្ទើរមិនគួរឱ្យជឿ ក្រោមដៃរបស់កីឡាករឌុន រដ្ឋា ដែលត្រូវគេមើលឃើញថា មានកម្រិតប្រកួតស្ទើរជាង និងមានប្រវត្តិប្រកួតតិចតួចជាងនៅក្នុងពិភពប្រដាល់ ។ ក្នុងទឹកទី១ កីឡាករបង្គោលខៀវ វ៉ោយ សុធន មានសន្ទុះឈ្នះប្រៀបទៅលើកីឡាករឌុន រដ្ឋា បង្គោលក្រហម ។ សន្ទុះជោគជ័យដែលគេសម្រេចនាពេលនោះមានការជឿជាក់យ៉ាងខ្លាំងថា ឌុន រដ្ឋា មិនអាចសងសឹកដូចការចង់បានឡើយ បើទោះជាគេបង្ហាញនូវអំនួតថាត្រូវតែឈ្នះក្តី ។ ក្នុងទឹកទី២ បង្គោលខៀវដែលជាជើងចាស់នៅតែនាំមុខក្នុងការវាយកែង ទាត់ផុតក្បាល និងម៉ាត់ចំកណ្តាលមុខទៅលើកីឡាករឌុន រដ្ឋា ។ ទោះយ៉ាងណា អ្វីដែលអ្នកទស្សនារំពឹងទុក និងការជឿជាក់របស់កីឡាករវ៉ោយ សុធន បានជារឿងមិនគួរកើត បន្ទាប់ពីចុងទឹកទី២ កីឡាករដែលមានប្រៀបនៅខាងដើមទី បែរជាមកទទួលមេរៀន និងត្រូវគូភាគីម្ខាងទៀតវាយតបតយ៉ាងចាស់ដៃ ដែលប៊ិះនឹងធ្វើឱ្យគេអស់ផ្លូវ ។ បើកុំតែពេលនោះស្នូរជួងបន្លឺឱ្យសម្រាកទាន់ កុំអីប្រហែលជា វ៉ោយ សុធន បង្គោលខៀវរងការអាម៉ាស់បាត់ទៅហើយនៅក្នុងទឹកនោះ ។ ក្រុមអ្នកទស្សនា និងអ្នកគាំទ្រមានការរំភើបចិត្តជាខ្លាំងក្នុងពេលដែល វ៉ោយ សុធន ដែលត្រូវពេញដោយកណ្តាប់ដៃ និងរន្ទះកែងពី ឌុន រដ្ឋា ស្រាប់តែទប់ជំហរ ហើយមិនសន្លប់ត្រូវចំម៉ោងឱ្យទឹក ។ ឈានដល់ទឹកទី៣ មានការរំពឹងយ៉ាងខ្លាំងថា កីឡាករវ៉ោយ សុធន ដែលទន់ដៃទន់ជើងក្នុងទឹកទី២ នឹងមានថាមពលមួយផ្នែកមកវិញបន្ទាប់ពីបានកម្លាំងពីអ្នកឱ្យទឹក។ ប៉ុន្តែគ្រាន់តែស្នូរជួងបន្លឺភ្លាម ឌុន រដ្ឋា ស្ទុះចូលភ្លាមតែម្តងដើម្បីសងសឹក ដោយស្ទើរតែធ្វើឱ្យ វ៉ោយ សុធន បង្គោលខៀវត្រៀមខ្លួនមិនទាន់។ នៅទីបំផុត កណ្តាប់ដៃ និងឱកាសវាយលុករបស់ ឌុន រដ្ឋា បានបំបែកភាពខ្លាំងរបស់គូប្រកួតបានដូចការចង់បាន ដោយអាចធ្វើឱ្យបង្គោលខៀវ វ៉ោយ សុធន ដួលខ្ពោកនៅលើរេញ ហើយត្រឡប់មកកាន់ភាពតតាំងដូចដើមមិនបាននៅទឹកទី៣ ។
លទ្ធផលសន្លប់របស់ វ៉ោយ សុធន បានក្លាយជារឿងដ៏អាម៉ាស់ ផ្ទុយពីអ្វីដែលគេជឿជាក់ ហើយក៏មានន័យថា ឌុន រដ្ឋា មានការរីកចម្រើនជាងមុននោះដែរ ទើបអាចបំបាក់មុខសិស្សច្បងឱ្យសន្លប់ក្នុងទឹកទី៣ នេះបាន ។ នៅក្នុងសង្វៀននោះ កីឡាកររឿង ប៊ុនរ៉ា មកពីក្លិបសំរោងកោងខេត្តបាត់ដំបង បានវាយឈ្នះកីឡាករកែវ ប៊ុនឈឿន មកពីក្លិបដំបងគ្រញូងកីឡាខេត្តបាត់ដំបងដោយពិន្ទុ ។
កីឡាការិនីអេ យ៉ានុត ដែលប្តូរទៅមជ្ឈមណ្ឌលកីឡាខេមរភូមិន្ទ បានវាយឈ្នះកីឡាការិនី វី ស្រីឆាយ មកពីក្លិបនាគមានជ័យដោយពិន្ទុ។ កីឡាករវីវ៉ា សាមីត មកពីក្លិបមហិទ្ធិឫទ្ធិតាដំបងដែក បានវាយកីឡាករសូយ សែនខ្មៅ មកពីក្លិបពោធិជ័យកីឡាឱ្យសន្លប់ក្នុងទឹកទី៣ និងកីឡាករស៊ឹម ប៊ុនឆៃ មកពីក្លិបព្រៃទទឹងបង្ក្រាបគ្រឿងញៀនខេត្តបាត់ដំបង វាយឈ្នះកីឡាករឯម សាវឿន មកពីក្លិបឫទ្ធិពោធិសែនជ័យដោយពិន្ទុ ។
ងាកមកកាន់សង្វៀនស្ទឹងមានជ័យដដែល តែនៅល្ងាចថ្ងៃសៅរ៍ ទី១ មីនា បន្ទាប់គ្នានោះវិញ កីឡាករឯម ខ្លឹមខ្មៅ ដែលបានប្រកាសថា មិនឱ្យកីឡាករសូយ យក្សតឿ សងសឹកបានសម្រេចបានក្លាយជាការពិត ។ តាំងពីទឹកទី១ រហូតដល់ទឹកទី៤ កីឡាករទាំងពីរត្រូវគេមើលឃើញថា មានសន្ទុះវាយលុកបានល្អម្យ៉ាងម្នាក់ ខណៈដែលក្នុងទឹកខ្លះកីឡាករបង្គោលខៀវ ឯម ខ្លឹមខ្មៅ ត្រូវកីឡាករបង្គោលក្រហម សូយ យក្សតឿ វាយឡើងចង់ទ្រមខ្លួនផងក៏មាន ពិសេសក្នុងពេលដែល សូយ យក្សតឿ ស្ទុះវាយសម្រុកដោយកំរោលដោយមិនចុះញ៉ម ។ រហូតដល់ទឹកទី៤ ទើបគេឃើញកីឡាករឯម ខ្លឹមខ្មៅ ចាប់ផ្តើមមានសន្ទុះ ហើយលេចចេញនូវឱកាសវាយឈ្នះទៅលើគូប្រកួត ខណៈដែលលទ្ថផលមួយនេះគឺមានលំនាំស្ទើរស្រដៀងគ្នានឹងការប្រកួតរបស់ពួកគេកាលពីលើកទី១ ដូច្នោះដែរ ។ រំលឹកដល់ការប៉ះគ្នាកាលពីលើកដំបូង ឯម ខ្លឹមខ្មៅ ប៊ិះមិនមានសំណាងឈ្នះពិន្ទុទៅលើ សូយ យក្សតឿ ដោយសារតែអំឡុង៤ទឹកបើកឆាក គឺពួកគេមានសន្ទុះវាយលុកស៊ីគ្នា២ទឹកម្នាក់ៗ បែងចែកមិនដាច់ថា អ្នកណាជាជើងខ្លាំង ។ ពោលគឺរហូតដល់ទឹកចុងក្រោយដូចគ្នានេះ ទើបគេឃើញកីឡាករឯម ខ្លឹមខ្មៅ បានទទួលជោគជ័យ និងឈ្នះពិន្ទុទៅលើ សូយ យក្សតឿ ។ ជ័យជម្នះដោយពិន្ទុជាលើកទី២ របស់ ឯម ខ្លឹមខ្មៅ ត្រូវគេមើលឃើញថា មានភាពប្រផិតប្រផើយដូចមុន បើធៀបនឹងការប៉ះគ្នាពីរលើករបស់គូនេះ ។ ប៉ុន្តែក៏មានន័យថា គេនៅរក្សាក្រេឌីតយកឈ្នះ សូយ យក្សតឿ និងមិនទាន់របូតឱកាសឱ្យកីឡាករសូយ យក្សតឿ អាចសងសឹកបាននោះដែរ ។
នៅលើសង្វៀនដដែលនោះ កីឡាករឡៅ ផានាថ មកពីក្លិបរស្មីកុមារកំព្រា វាយចាញ់កីឡាករអ៊ុំ ចំរើន មកពីក្លិបតាឡីដំរីមានឫទ្ធិ ដែលមកប្រកួតជំនួសកីឡាករកន ចន្ថា មកពីក្លិបក្រសួងការពារជាតិដោយពិន្ទុ ។ កីឡាករតូច ទូ មកពីក្លិបមជ្ឈមណ្ឌលកីឡាខេមរភូមិន្ទ វាយឱ្យកីឡាករចក់ ចាន់ មកពីក្លិបរាជសីហ៍បង្ក្រាបគ្រឿងញៀនខេត្តរតនគិរី ឱ្យសន្លប់ក្នុងទឹកទី២ និងកីឡាករឯម ស៊ីថុង មកពីក្លិបឫទ្ធីពោធិសែនជ័យ វាយឈ្នះកីឡាករហេង វាសនា មកពីក្លិបព្រៃទទឹងខេត្តបាត់ដំបងដោយពិន្ទុ ៕
ចែករំលែកព័តមាននេះ