រាជធានីភ្នំពេញ ៖ បើតាមបុរសជាឪពុករបស់យុវតីដែលស្លាប់បានរៀបរាបទាំងរន្ធត់ចិត្តថា នៅមុន
ពេលកើតហេតុ គាត់ក៏បានឱ្យកូនរៀបចំអីវ៉ាន់មានទាំងផ្លែឈើ ចំណីចំណុក ហើយបានដឹកកូនស្រីទៅកាន់មណ្ឌលប្រឡងបាក់ឌុបនៅក្រុងតាខ្មៅ ខេត្តកណ្តាល ព្រោះនៅថ្ងៃទី១៩ សីហានេះ ជាសម័យប្រឡងហើយ មិននឹកស្មានថា ពេលកំពុងតែឈប់ស្តុប ក៏ត្រូវរថយន្តមកបុកទាំងកំរោលពីក្រោយឆក់ជីវិតកូនស្រីគាត់ឱ្យស្លាប់យ៉ាងអាណោចអាធ័មទាំងបែបនេះ ។ តាមព័ត៌មានឱ្យដឹងទៀតថា យុវសិស្សរូបនេះ គឺជាសិស្សរៀនពូកែសង្ឃឹមថា នឹងប្រឡងបាននិទ្ទេសល្អថែមទៀត តែគ្រោះអកុសលតាមផ្តន្ទាជីវិតនាងឱ្យបញ្ចប់តែត្រឹមនេះ។
សូមរំលឹកថា យុវតីបេក្ខជនប្រឡងសញ្ញាបត្រមធ្យមសិក្សាទុតិយភូមិ(បាក់ឌុប)ម្នាក់ ត្រូវរថយន្តដឹកឥដ្ឋបុកស្លាប់យ៉ាងអាណោចអាធ័ម និងឪពុករងរបួសយ៉ាងដំណំ ខណៈដែលជិះម៉ូតូម៉ាកហុងដាមួយគ្រឿង
រួមទាំងសម្ភារហូបចុកមួយចំនួន ធ្វើដំណើរទៅត្រៀមប្រឡងនៅមណ្ឌលក្រុងតាខ្មៅ ខេត្តកណ្តាលពេលព្រឹកដែលមានរយៈពេល២ថ្ងៃ ។ គ្រោះអកុសលនេះបានកើតឡើងកាលពីវេលាម៉ោង១២និង៥នាទី ថ្ងៃត្រង់ទី១៨ សីហា នៅចំណុចស្តុបផ្លូវជាតិលេខ៦ កែងមហាវិថីឈ្នះ ឈ្នះ ក្នុងភូមិបាក់ខែង សង្កាត់បាក់ខែង ខណ្ឌជ្រោយចង្វា រាជធានីភ្នំពេញ ។
យុវតីរងគ្រោះដែលត្រូវរថយន្តបុកស្លាប់ឈ្មោះ អ៊ុយ លីលី អាយុ១៨ឆ្នាំ ជាសិស្សវិទ្យាល័យសិរីមង្គលរកាកោង មានលំនៅភូមិរកាកោង១ ឃុំរកាកោង ស្រុកមុខកំពូល ខេត្តកណ្តាល ។ ចំណែកបុរសជាឪពុកឈ្មោះ អ៊ុយ ឌីស៊ុន អាយុ៦០ឆ្នាំ ជាអាជីវករ និងជូនកូនស្រីមកប្រឡង បានរងរបួសមិនធ្ងន់ធ្ងរពេកទេ ។ តាមនគរបាលឱ្យដឹងថា គ្រោះថ្នាក់ចរាចរណ៍នេះបង្កឡើងដោយរថយន្តដឹកឥដ្ឋម៉ាកហ៊ីយ៉ាន់ដាយ ពណ៌ខៀវ បើកបរដោយបុរសម្នាក់ឈ្មោះ អេង ទិត្យ អាយុ២២ឆ្នាំ មានលំនៅភូមិព្រៃស្បូវ ឃុំនរាយ ស្រុកឈូក ខេត្តកំពត ត្រូវនគរបាលឃាត់ខ្លួនភ្លាមៗ ។
តាមសាក្សីឱ្យដឹងថា នៅមុនពេលកើតហេតុ គេឃើញជនរងគ្រោះ២នាក់ឪពុកនិងកូនស្រីបានជិះម៉ូតូម៉ាកហុងដា ធុនសេ១២៥ ពណ៌ខ្មៅពាកស្លាក់លេខ ភ្នំពេញ១AQ-៧០៧០មួយគ្រឿង ធ្វើដំណើរតាមផ្លូវជាតិលេខ៦ ក្នុងទិសដៅពីកើតទៅលិច ។ នៅពេលមកដល់កន្លែងកើតហេតុ បានឈប់ស្តុប ស្រាប់តែ រថយន្តដឹកឥដ្ឋធ្វើដំណើរស្របទិសគ្នាពីក្រោយ អត់ឈប់ស្តុបទេមកបុកពីក្រោយពេញទំហឹង ប៉ើងចេញជាច្រើនម៉ែត្រនឹងកិនបណ្តាលឱ្យយុវតីបេក្ខជនប្រឡងស្លាប់នៅនឹងកន្លែង ហើយឪពុករងរបួស ។
នៅក្នុងគ្រោះថ្នាក់ជាមួយគ្នានេះ រថយន្តដឹកឥដ្ឋបានបើកបុកម៉ូតូ២គ្រឿង តែមួយគ្រឿងទៀតរងរបួសស្រាលក៏បានបន្តដំណើរបាត់ទៅ ។ បន្ទាប់ពីបង្កគ្រោះថ្នាក់ អ្នកបើកបរបានឈប់រថយន្តប្រុងរត់គេចខ្លួន តែត្រូវកម្លាំងនគរបាលនិងប្រជាពលរដ្ឋឃើញទាន់នាំគ្នាឃាត់ខ្លួន ។តាមអ្នកបើកបរបានឱ្យដឹងថា មូលហេតុ ដែលកើតមានគ្រោះថ្នាក់ដោយសារតែរថយន្តដាច់ហ្វ្រាំងជាន់មិនស៊ី ។ តាមចម្លើយនេះ មិនដឹងជាការដោះសារឬបែបណាទេ ។ (សម្រួលដោយ៖ ស្រីណា)
ចែករំលែកព័តមាននេះ