ខេត្តសៀមរាប ៖ តាមរបាយការណ៍ពីលោក ម៉ក់ ប្រុស អភិបាលស្រុកសូទ្រនិគមបានប្រាប់ឱ្យដឹងកាលពីថ្ងៃទី១៨ ខែសីហា ឆ្នាំ២០១៩ កន្លងទៅនេះថា ប្រជាពលរដ្ឋមួយគ្រួសារដែលមានជីវភាពក្រីក្រ…
ខេត្តសៀមរាប ៖ តាមរបាយការណ៍ពីលោក ម៉ក់ ប្រុស អភិបាលស្រុកសូទ្រនិគមបានប្រាប់ឱ្យដឹងកាលពីថ្ងៃទី១៨ ខែសីហា ឆ្នាំ២០១៩ កន្លងទៅនេះថា ប្រជាពលរដ្ឋមួយគ្រួសារដែលមានជីវភាពក្រីក្រ ហើយបានសម្រាលកូនភ្លោះប្រុសស្រីចំនួន៣នាក់ កាលពីវេលាម៉ោង៩ព្រឹកថ្ងៃទី១៤ សីហា ឆ្នាំ២០១៩។
លោកអភិបាលស្រុកសូទ្រនិគមបានបញ្ជាក់ថា គ្រួសារខាងលើនេះមានប្តីឈ្មោះ អៀម មាន អាយុ៣១ឆ្នាំ ទៅធ្វើការនៅប្រទេសថៃ ចំណែកប្រពន្ធឈ្មោះ ស្ងួន ឆេង អាយុ៣៤ឆ្នាំ និងមានកូនប្រុសម្នាក់អាយុ៤ឆ្នាំ ។ គ្រួសារនេះមានទីលំនៅផ្ទះលេខ ០៦៤ ក្រុមទី១ ភូមិតាពៀម ឃុំកំពង់ក្តី ស្រុកជីក្រែង ខេត្តសៀមរាប ។ គ្រួសារខាងលើនេះក៏មានប័ណ្ណក្រីក្រផងដែរ ។
លោកអភិបាស្រុកសូទ្រនិគមបានបញ្ជាក់ថា កាលពីវេលាម៉ោង៩ព្រឹកថ្ងៃទី១៤ ខែសីហា ឆ្នាំ២០១៩ គ្រួសារខាងលើនេះបានមកសម្រាលកូនភ្លោះនៅមណ្ឌលសុខភាពកំពង់ក្តី ដោយកូនប្រុសទី១សម្រាលមកមានទំងន់១,៨គីឡូក្រាម ដោយសារស្ថានភាពមិនអំណោយផល ទើបមណ្ឌលសុខភាពកំពង់ក្តី បានបញ្ជូនទាំងម្តាយនិងកូន បន្តមកមន្ទីរពេទ្យបង្អែកសូទ្រនិគម ដើម្បីជួយសង្គ្រោះ ។ លុះនៅវេលាម៉ោង៩និង៣០ព្រឹកថ្ងៃដដែលកូនប្រុសទី២បានសម្រាលនៅមន្ទីរពេទ្យសូទ្រនិគម មានទំងន់១,៧២គីឡូក្រាម ហើយនៅវេលាម៉ោង៩និង៤០នាទីព្រឹក ថ្ងៃដដែលកូនស្រីទី៣បានសម្រាលមកមានទំងន់១,៥០គីឡូក្រាម ។
ក្រោយពេលសម្រាលរួច ម្តាយកំពុងសំរាក និងទទួលការថែទាំនៅក្នុងមន្ទីរពេទ្យសូទ្រនិគម ចំណែកទារកនិងទារិកាភ្លោះទាំង៣នាក់ដែលមានសុខភាពមិនសូវល្អ ត្រូវបានបញ្ជូនបន្តទៅថែទាំនៅមន្ទីរពេទ្យកុមារអង្គរសៀមរាប នៅល្ងាចថ្ងៃដដែល ដើម្បីឱ្យក្រុមគ្រូពេទ្យជំនាញជួយសង្គ្រោះជាបន្តទៀត ៕ (កែសម្រួលដោយ ៖ ធីតា)
ចែករំលែកព័តមាននេះ