រាជធានីភ្នំពេញ៖ក្នុងរយៈពេល៣ឆ្នាំនៃការបង្កើតក្រុមយុវជនល្ខោនខោលកម្ពុជា ក្នុងគោលបំណងផ្សព្វផ្សាយល្ខោនខោលខ្មែរ ឲ្យកាន់តែទូលំទូលាយទៅកាន់មហាជនគ្រប់គ្រប់ស្រទាប់វណ្ណៈ ក្រុមមួយនេះបានរៀបចំការសម្តែងល្ខោនខោល និងព្រឹត្តិការណ៍សម្តែងសិល្បៈចម្រុះជាមួយការតាំងពិព័រណ៍សិល្បៈ ធំៗ ចំនួន៤ ។
បើយោងតាមការប្រកាសរបស់ក្រុមយុវជនល្ខោនខោលកម្ពុជាកាលពីពេល ថ្មីនេះបានឲ្យដឹងថា ព្រឹត្តិការណ៍ដែលខ្លួនរៀបចំទាំង៤លើក ធំៗនោះរួមមាន លើកទី១ គឺការសម្តែងល្ខោនខោលឈុតថតលតយ័ន្ត នៅសាលមហោស្រពនៃសាលាមធ្យមវិចិត្រសិល្បៈ ក្រោមព្រះរាជវត្តមានរបស់សម្តេច ព្រះរៀមនរោត្តម បុប្ផាទេវី និងលោកសោម សុគន្ធ រដ្ឋលេខាធិការក្រសួងវប្បធម៌ និងវិចិត្រសិល្បៈ ព្រមទាំងភ្ញៀវជាតិ និងអន្តរជាតិចូលរួមយ៉ាងច្រើនកុះករ ។
ការសម្តែងទី២ គឺព្រឹត្តិការណ៍ផ្ទះសិល្បៈ សម្តែងសិល្បៈចម្រុះ និងតាំងពិព័រណ៍ នៅសាលាមធ្យមវិចិត្រសិល្បៈ ក្រោមអធិបតីភាពរបស់ លោកជំទាវ ភឿង សកុណា រដ្ឋមន្ត្រីក្រសួងវប្បធម៌ និងវិចិត្រសិល្បៈ ព្រមទាំងលោកហ៊ុន ម៉ានី ប្រធានសហភាពសហព័ន្ធយុវជនកម្ពុជា ។
ចំណែកទី៣ គឺការសម្តែង ល្ខោនខោល ឈុតចម្បាំងសត្វតាឡុង នៅសាកលវិទ្យាល័យប៊ែលធីអន្តរជាតិ ក្រោមអធិបតីភាពលោកសរ សុពុត្រា អភិបាលរងខេត្តកំពង់ស្ពឺ និងជាប្រធានកិត្តិយសក្រុមយុវជនល្ខោនខោលកម្ពុជា និងលោកលី ណាវុឌ្ឍ សាកលវិទ្យាធិការរងនៃសាកលវិទ្យាល័យប៊ែលធីអន្តរជាតិ ។
ទី៤គឺព្រឹត្តិការណ៍ ផ្ទះសិល្បៈលើកទី២ នៅសាលាមធ្យមវិចិត្រសិល្បៈ ក្រោមព្រះរាជវត្តមានរបស់សម្តចព្រះរៀមនរោត្តម បុប្ផាទេវី និងលោកជំទាវភឿង សកុណា រដ្ឋមន្ត្រីក្រសួងវប្បធម៌ និងវិចិត្រសិល្បៈ ព្រមទាំងយុវជន យុវនារី ចូលរួមយ៉ាងច្រើន និងទស្សនាសិល្បៈ ទាំង៣ពេល គឺព្រឹក រសៀល និងពេលយប់ ។
ក្នុងនាមយុវជនល្ខោនខោលកម្ពុជា មានសេចក្តីសប្បាយរីរាយជាខ្លាំងក្នុងកិច្ចការចូលរួមផ្សព្វផ្សាយសិល្បៈខ្មែរជូនប្រជាជនឲ្យបានស្គាល់នូវអ្វីដែលជាមរតកវប្បធម៌ដ៏មហាសាលដែលបុព្វបុរសយើងបានបន្សល់ទុក ៕ (កែសម្រួលដោយ ៖ បុប្ផា)
ចែករំលែកព័តមាននេះ