យោងតាមក្រុមប្រឹក្សាកីឡាអូឡាំពិកជាតិសិង្ហបុរី (SNOC) ឱ្យដឹងថា ប្រទេសនេះគ្រោងនឹងបញ្ជូនអត្តពលិករបស់ខ្លួនប្រមាណជា៧០នាក់ទៅចូលរួមក្នុងព្រឹត្តិការណ៍កីឡា Commonwealth Games ប្រចាំឆ្នាំ២០១៤ ដែលនឹងរៀបចំធ្វើនៅក្រុង Glasgow ប្រទេសស្កុតឡែននាខែកក្កដាខាងមុខ ។ SNOC ឱ្យដឹងទៀតថា បញ្ជីឈ្មោះអត្តពលិកចូលរួមចុងក្រោយនឹងត្រូវបង្ហាញជាផ្លូវការនៅខែមិថុនាខាងមុខ ។
សម្រាប់ការចូលរួមលើកនេះ សិង្ហបុរីផ្តោតជាសំខាន់លើកីឡា៦ប្រភេទ ក្នុងនោះមានដូចជា អត្តពលកម្ម វាយសី បាញ់កាំភ្លើង ហែលទឹក វាយកូនឃ្លីលើតុ និងកាយសម្ព័ន្ធ ។ SNOCបញ្ជាក់យ៉ាងច្បាស់ថា រាល់អត្តពលិកដែលជាប់ឈ្មោះទៅចូលរួម គឺមិនមែនទៅដើម្បីយកបទពិសោធន៍ ឬលំហែកាយនោះឡើយ ពួកគេចាំបាច់ត្រូវប្រកួតឱ្យអស់ពីសមត្ថភាពដណ្តើមយកជ័យជម្នះឱ្យខាងតែបាន ។ រាល់អត្តពលិកដែលត្រូវបានជ្រើសរើសគឺសុទ្ធតែជាអ្នកពូកែផ្តាច់គេក្នុងវិញ្ញាសាអាជីពរបស់ខ្លួន ។
អនុប្រធាន SNOC លោក Low Teo Pingថ្លែងថា ៖ «នេះពិតជាពេលវេលាដ៏ពិសេសមួយដែលបណ្តាអត្តពលិកត្រូវបានផ្តល់ជូននូវឱកាសបង្ហាញពីសមត្ថភាពផ្ទាល់ខ្លួន ។ យើងសង្ឃឹមថា ការចូលរួមលើកនេះនឹងពិតជាអាចលត់ដំពួកគេឱ្យក្លាយជាអត្តពលិកដែលពូកែលើលោក»។ យ៉ាងណាក៏ដោយ មកទល់នឹងពេលនេះ SNOC នៅមិនទាន់បានដាក់ចេញចំនួនមេដាយដែលរំពឹងថា អត្តពលិករបស់ខ្លួនត្រូវដណ្តើមបាននោះទេ ។ ប៉ុន្តែកាលពីចូលរួមកីឡា Commonwealth Games នេះនៅប្រទេសឥណ្ឌាឆ្នាំ២០១០ ក្រុមសិង្ហបុរីបានយកឈ្នះមេដាយសរុប៣១គ្រឿង ក្នុងនោះមាស១១គ្រឿង ប្រាក់១១គ្រឿងនិង សំរឹទ្ធិ៩គ្រឿង ៕
ចែករំលែកព័តមាននេះ