ការលែងលះមានតម្លៃថ្លៃបំផុតនៅក្នុងប្រវត្តិសាស្ត្រកីឡា
អន្តរជាតិ ៖ អតីតអ្នកកីឡាកាស Hulk Hogan អតីតកីឡាករបាល់ទាត់ Thierry Henry អតីតកីឡាបាល់បោះ Michael…
អន្តរជាតិ ៖ អតីតអ្នកកីឡាកាស Hulk Hogan អតីតកីឡាករបាល់ទាត់ Thierry Henry អតីតកីឡាបាល់បោះ Michael Jordan ព្រមទាំងកីឡាករវាយកូនគោល Tiger Woods សុទ្ធតែស្ថិតក្នុងចំណោមអត្តពលិកល្បីដ៏លំដាប់ពិភពលោក ដែលបានឆ្លងកាត់ការលែងលះដែលមានតម្លៃថ្លៃបំផុតក្នុងប្រវត្តិសាស្ត្រកីឡា។
លោក Hulk Hogan និងអ្នកស្រី Linda Claridge ៖ ១៣លានដុល្លារ
វីរបុរសកីឡាកាស Hulk Hogan ដែលទើបតែទទួលអនិច្ចកម្ម កាលថ្ងៃទី២៤ ខែកក្កដា ឆ្នាំ២០២៥ ក្នុងវ័យ៧១ឆ្នាំនោះ បានរៀបការជាមួយតារាម៉ូដែល Linda Claridge ក្នុងឆ្នាំ១៩៨៣ ដែលជាភរិយាទី១របស់លោក ដោយប្តីប្រពន្ធ១គូនេះមានចំណងដៃកូនពីរនាក់ជាមួយគ្នា។ ជីវិតប្តីប្រពន្ធអ្នកពីរបានបញ្ចប់នៅឆ្នាំ២០០៧ នៅពេលអ្នកស្រី Linda បានដាក់ពាក្យសុំលែងលះ ដោយចោទប្រកាន់លោក Hogan ពីភាពមិនស្មោះត្រង់ ហើយបន្ទាប់ពីតតាំងគ្នាតាមផ្លូវច្បាប់ចប់សព្វគ្រប់ Linda បានទទួលចំណែក ៧០% នៃទ្រព្យសម្បត្តិប្តីប្រពន្ធ ក៏ដូចជា ៤០% ពីផលប្រយោជន៍ក្រុមហ៊ុនរបស់អតីតស្វាមី និងប្រហែល ៣លានដុល្លារជាសាច់ប្រាក់ផ្សេងទៀត ដែលសរុបស្មើនឹងប្រហែល១៣លានដុល្លារ។
លោក Thierry Henry អ្នកស្រី Claire Merry ៖ ១៦លានដុល្លារ
អតីតកីឡាករបាល់ទាត់ឆ្នើមសញ្ជាតិបារាំងវ័យ៤៧ឆ្នាំរូបនេះ បានរៀបការជាមួយតារាម៉ូដែល Claire Merry ក្នុងឆ្នាំ២០០៣ ដោយបង្កើតបានកូនស្រីម្នាក់។ បន្ទាប់ពី Henry បានផ្លាស់ទៅចូលរួមជាមួយក្លិប Barcelona នៅឆ្នាំ២០០៧ ពាក្យចចាមអារ៉ាមអំពីភាពមិនស្មោះត្រង់ក៏កើតឡើង ជាលទ្ធផលប្តីប្រពន្ធ១គូនេះ បានលែងលះគ្នាក្នុងឆ្នាំ២០០៨ ដោយអ្នកស្រី Claire បានទទួលចំណែកទ្រព្យសម្បត្តិប្រហែល១៦លានដុល្លារ។
លោក Ryan Giggs អ្នកស្រី Stacey Cooke ៖ ៣១លានដុល្លារ
អតីតកីឡាករបាល់ទាត់ឆ្នើមសញ្ជាតិវែលស៍វ័យ៥១ឆ្នាំរូបនេះ បានរៀបការជាមួយអ្នកស្រី Stacey Cooke ក្នុងឆ្នាំ២០០៧ និងមានកូនបីនាក់ជាមួយគ្នា។ ចំណងអាពាហ៍ពិពាហ៍អ្នកពីរបានប្រះឆាដោយសាររឿងអាស្រូវបោកប្រាស់ជាច្រើន ពិសេសទំនាក់ទំនងរបស់ Giggs ជាមួយប្រពន្ធរបស់បងប្រុសកីឡាកររូបនេះ។ ជាលទ្ធផលនាំការលែងលះក្នុងឆ្នាំ២០១៧ អ្នកស្រី Stacey បានទទួលប្រាក់សំណង៣១លានដុល្លារ ស្ទើរតែពាក់កណ្តាលនៃទ្រព្យសម្បត្តិរបស់ Giggs នៅពេលនោះ។
លោក Shaquille O’Neal អ្នកស្រី Shaunie O’Neal ៖ ៣៣លានដុល្លារ
វីរបុរសរបស់បាល់បោះអាមេរិកវ័យ៥៣ឆ្នាំរូបនេះ បានរៀបការជាមួយ Shaunie ក្នុងឆ្នាំ២០០២ ដោយមានកូន៤នាក់។ Shaunie បានទទួលប្រាក់ចំនួន ៣៣លានដុល្លារពីការលែងលះក្នុងឆ្នា២០០៩។ ទោះយ៉ាងណាក៏ដោយ ក្រោយមកអ្នកទាំងពីរបានរក្សាទំនាក់ទំនងល្អជាមួយគ្នា និងរួមគ្នាចិញ្ចឹមបីបាច់កូនៗ។
លោក Tiger Woods អ្នកស្រី Elin Nordegren ៖ ១០០លានដុល្លារ
អតីតកីឡាករវាយកូនគោលលេខ១ពិភពលោក សញ្ជាតិអាមេរិកវ័យ៤៩ឆ្នាំរូបនេះ បានរៀបការជាមួយតារាម៉ូដែលសញ្ជាតិស៊ុយអែត Elin Nordegren ក្នុងឆ្នាំ២០០៤ ដោយមានកូនពីរនាក់ជាមួយគ្នា។ អាពាហ៍ពិពាហ៍អ្នកទាំងពីរបានបញ្ចប់ក្នុងឆ្នាំ២០១០ បន្ទាប់ពីមានរឿងអាស្រូវផិតក្បត់របស់ Tiger Woods ដ៏កក្រើកពិភពកីឡា។ ជាលទ្ធផល Elin បានទទួលប្រាក់ចំនួន ១០០លានដុល្លារ និងសិទ្ធិមើលថែកូន។ ទោះយ៉ាងណា ក្រោយមកអ្នកទាំងពីរនៅតែរាប់អានគ្នាជាមិត្តភ័ក្តិ និងជាឪពុកម្តាយកូនៗ។
លោក Greg Norma អ្នកស្រី Laura Andrassy ៖ ១០៣លានដុល្លារ
អតីតកីឡាករវាយកូនគោលឆ្នើមសញ្ជាតិអូស្ត្រាលីរូបនេះ បានរៀបការជាមួយ Laura Andrassy ក្នុងឆ្នាំ១៩៨១ ដោយមានកូនពីរនាក់ជាមួយគ្នា។ បន្ទាប់ពីរៀបការបាន២៥ឆ្នាំ អ្នកទាំងពីរបានលែងលះគ្នាក្នុងឆ្នាំ២០០៦ ដោយអ្នកស្រី Laura បានទទួលប្រាក់សំណងប្រហែល ១០៣លានដុល្លារ។
លោក Andre Agassi អ្នកស្រី Brooke Shields ៖ ១៣០លានដុល្លារ
អតីតកីឡាករវាយតេន្នីសឆ្នើមសញ្ជាតិអាមេរិករូបនេះ បានរៀបការជាមួយតារាសម្តែង Brooke Shields ក្នុងឆ្នាំ១៩៩៧ ប៉ុន្តែរួមរស់ជាមួយគ្នាបានត្រឹម២ឆ្នាំប៉ុណ្ណោះ ដោយគ្មានកូនជាមួយគ្នា។ គូស្នេហ៍១គូនេះ ត្រូវបានរាយការណ៍ថាបានបែងចែកទ្រព្យសម្បត្តិដែលមានតម្លៃដល់ ១៣០លានដុល្លារ។
លោក Michael Jordan អ្នកស្រី Juanita Vanoy ៖ ១៦៨លានដុល្លារ
វីរបុរសបាល់បោះអាមេរិកវ័យ៦២ឆ្នាំរូបនេះ បានរៀបការជាមួយអ្នកស្រី Juanita Vanoy ក្នុងឆ្នាំ១៩៨៩ ដោយមានកូន៣នាក់ជាមួយគ្នា។ បន្ទាប់ពីរួមរស់ជាមួយគ្នាអស់រយៈពេល ១៧ឆ្នាំ ប្តីប្រពន្ធ១គូនេះបានលែងលះគ្នា ដោយ Juanita ទទួលបានសំណង១៦៨លានដុល្លារ។ ទោះបីជាបែកបាក់គ្នាក៏ពិតមែន ក៏អ្នកទាំងពីរនៅតែប្រកាន់ជំហរល្អដើម្បីចិញ្ចឹមបីបាច់កូនៗ។ ហើយរហូតមកទល់ពេលនេះ វានៅតែជាការលែងលះមានតម្លៃថ្លៃបំផុតក្នុងប្រវត្តិសាស្ត្រកីឡា៕ ប្រភព ៖ VnExpress
ចែករំលែកព័តមាននេះ