ប្រទេស​អ៊ី​តា​លី ៖ ក្រុម Paris Saint-Germain បាន​គ្រង​ជើងពាន​រង្វាន់ UEFA Super Cup ឆ្នាំ​២០២៥ កាលពី​ថ្ងៃ​ទី​១៣ ខែសីហា កន្លង​ទៅ ក្រោយ​យកឈ្នះ​ក្រុម​មាន់​ខ្នាយ​មាស Tottenham Hotspur ទាំង​លំបាក ដោយ​ការ​ទាត់​បាល់​ប៉េ​ណា​ល់​ទី​កាត់សេចក្តី​។ ទោះ​យ៉ាងណា​ក៏​ដោយ លោក Luis Enrique គ្រូបង្វឹក​ក្រុម​រហស្សនាម «​សេដ្ឋី​បារាំង​» បាន​និយាយ​ថា ក្រុម​របស់​លោក​មិន​សម​នឹង​ឈ្នះ​ជើងឯក​ពានរង្វាន់​នេះ​សោះ​។ នេះ​បើ​យោង​តាម​ប្រភព​ពី​សារព័ត៌មាន ESPN បាន​ចេញផ្សាយ​។

ការ​ប្រកួត​ដណ្តើម​ពានរង្វាន់ UEFA Super Cup ឆ្នាំ​២០២៥ រវាង​PSG ក្រុម​ជើងឯក UEFA Champion League រដូវ​កាល ២០២៤-២៥ និង Tottenham ក្រុម​ជើងឯក UEFA Europa League រដូវ​កាល ២០២៤-២៥ ធ្វើ​ឡើង​នៅ​កីឡដ្ឋាន Friuli ទីក្រុង Udine ប្រទេស​អ៊ី​តា​លី​។

Tottenham ក្រោម​ការ​ដឹកនាំ​របស់​គ្រូបង្វឹក​សញ្ជាតិ​ដា​ណឺ​ម៉ាក លោក Thomas Frank បាន​បើក​ការ​នាំមុខ​មុន​ដល់​ទៅ ២ គ្រាប់ នៅ​ចុង​តង់​ទី​១ និង​ដើម​តង់​ទី​២ មុន​ពេល PSG វាយបក​តាម​ស្មើ​មក​វិញ នៅ​នាទី​ចុង​ក្រោយ​នៃ​តង់​ទី​២ ពោល​នៅ​នាទី ៨៥ និង ៩០+៤ មុន​ពេល​ដែល​អាជ្ញាកណ្តាល​ផ្លុំ​កញ្ចែ​បញ្ចប់​ការ​ប្រកួត ដោយ​គ្មាន​ការ​បន្ថែម ១៥​នាទី ២​ដង​ឡើយ​។ អ្វី​ៗ​បាន​បញ្ចប់​សព្វគ្រប់​នៅ​ពេល​ដែល PSG យកឈ្នះ Tottenham ដោយ​ការ​ទាត់​បាល់​ប៉េ​ណា​ល់​ទី​កាត់សេចក្តី​លទ្ធផល ៤​ទល់​នឹង​៣ ដើម្បី​គ្រង​ជើងឯក​ពានរង្វាន់ រង្វាន់ UEFA Super Cup ឆ្នាំ​២០២៥ និង​ជា​លើក​ដំបូង​របស់​ខ្លួន​។ មិន​ត្រឹមតែ​ប៉ុណ្ណោះ PSG ក៏​ក្លាយជា​ក្លិប​បារាំង​ដំបូង​គេ​ផង​ដែរ ដែល​ឈ្នះ​ពានរង្វាន់​នេះ ដ្បិត Tottenham ខកខាន​ឱកាស​ស្គាល់​រសជាតិ​ឈ្នះ​ជើងឯក​ជា​លើក​ដំបូង​។

បើ​ទោះជា​បង្កើត​ប្រវត្តិសាស្ត្រ​ឈ្នះ​ជើងឯក​ក៏​ពិតមែន ប៉ុន្តែ​គ្រូបង្វឹក​ក្រុម PSG លោក Luis Enrique បាន​និយាយ​ថា ក្រុម​របស់​លោក​មិន​សម​នឹង​ទទួល​បានការ​ឈ្នះ​ពានរង្វាន់ UEFA Super Cup ដោយសារ​តែ​ពួក​គេ​មាន​ពេល​តិច​ណាស់ ដើម្បី​ប្រមូលផ្តុំ​ហ្វឹកហាត់ ពោល​បន្ទាប់​ពី​បញ្ចប់​ភារកិច្ច​ការ​ប្រកួត​វគ្គ​ផ្តាច់ព្រ័ត្រ​ពានរង្វាន់ FIFA Club World Cup ដោយ​ចាញ់​ក្រុម Chelsea លទ្ធផល ៣​ទល់​នឹង​០ កាលពី​ខែ​មុន ។

គ្រូបង្វឹក​សញ្ជាតិ​អេ​ស្ប៉ា​ញ​វ័យ​៥៥​ឆ្នាំ​រូប​នេះ បាន​ប្រាប់​សារព័ត៌មាន TNT Sports ដូច្នេះ​ថា «​សម្រាប់​រយៈពេល​៨០​នាទី ពួក​យើង​មិន​សម​នឹង​ទទួល​បាន​ជ័យជម្នះ​ទេ ខ្ញុំ​គិត​ថា Tottenham សម​នឹង​ឈ្នះ​ការ​ប្រកួត​នេះ ព្រោះ​ពួក​គេ​មាន​ទម្រង់​លេង​ល្អ ពួក​គេ​បាន​ហ្វឹកហាត់​រយៈពេល​៦​ស​ប្តា​ហ៍​។ ផ្ទុយ​ទៅ​វិញ យើង​ហ្វឹកហាត់​បាន​ត្រឹមតែ​៦​ថ្ងៃ​ប៉ុណ្ណោះ ប៉ុន្តែ​ពេល​ខ្លះ​បាល់ទាត់​គឺ​អយុត្តិធម៌​អ៊ីចឹង​។ ខ្ញុំ​ត្រូវ​តែ​និយាយ​ថា យើង​មានសំណាង​ណាស់​ក្នុង​រយៈពេល​១០​នាទី​ចុង​ក្រោយ ដែល​អាច​ស៊ុត​បញ្ចូល​ទី​បាន​ពីរ​គ្រាប់​វិញ​»​។

អតីត​គ្រូបង្វឹក​ក្រុម Barcelona និង​ក្រុម​ជម្រើសជាតិ​អេ​ស្ប៉ា​ញ​រូប​នេះ បាន​បន្ថែម​ទៀត​ថា «​កីឡាករ​របស់ខ្ញុំ​ទាំងអស់​មាន​ជំនឿ​ចិត្ត​រហូត​ដល់​នាទី​ចុង​ក្រោយ ដូច​ជា​អ្នកគាំទ្រ​របស់​យើង​ដែរ​»៕