តំបន់​ហ្កា​ហ្សា ៖ ជា​រឿង​ដ៏​តក់ស្លុត និង​រន្ធត់​បំផុត​មួយ បន្ទាប់​ពី​សមាគម​កីឡាបាល់ទាត់​ប៉ា​ឡេ​ស្ទី​ន កាលពី​ថ្ងៃ​ទី​៦ ខែសីហា ឆ្នាំ​២០២៥ បាន​ប្រកាស​ពី​ការ​បាត់បង់​ជី​វីត​អតីត​ខ្សែបម្រើ​ប្រយុទ្ធ​ឆ្នើម Suleiman al-Obeid ដែល​ត្រូវ​បាន​គេ​ដាក់​រហស្សនាម​ឱ្យ​ថា «Pelé ប៉ា​ឡេ​ស្ទី​ន​» ដោយសារ​តែ​ការ​វាយប្រហារ​តាម​អាកាស​របស់​អ៊ី​ស្រា​អែ​ល នៅ​ពេល​ដែល​លោក​កំពុង​រង់ចាំ​ជំនួយ​មនុស្សធម៌​នៅ​តំបន់​ហ្គា​ហ្សា​។ នេះ​បើ​យោង​តាម​ប្រភព​ពី​កាសែត​បារាំង L’Équipe និង​សារព័ត៌មាន TRT World របស់​តួ​ក​គី​បាន​ចេញផ្សាយ​។

នៅ​ពេល​ដែល​គ្រប់​គ្នា​កំពុង​ប្រឈម​មុខ​នឹង​ស្ថានភាព​ដ៏​លំបាក​ខ្លាំង​បំផុត ដោយសារ​តែ​ស្ថានភាព​មនុស្សធម៌​នៅ​ឯ​តំបន់​ហ្គា​ហ្សា ស្រាប់តែ​ពេល​នេះ​ក្រុមបាល់ទាត់​ជម្រើសជាតិ​ប៉ា​ឡេ​ស្ទី​ន​កំពុង​តែ​កាន់ទុក្ខ​ចំពោះ​ការ​បាត់បង់​លោក Suleiman Obeid ដែល​ជា​អតីត​កីឡាករ​ដ៏​មាន​ទេព​កោសល្យ​បំផុត​១​រូប​របស់​ប៉ា​ឡេ​ស្ទី​ន រហូត​ត្រូវ​បាន​គេ​ដាក់​រហស្សនាម​ឱ្យ​ថា «Pelé ប៉ា​ឡេ​ស្ទី​ន​» ដោយ​ត្រូវ​បាន​ប្រដូច​ទៅ​នឹង​វីរបុរស​បាល់ទាត់​ប្រេ​ស៊ី​ល លោក Pelé​។

យោង​តាម​សមាគម​បាល់ទាត់​ប៉ា​ឡេ​ស្ទី​ន​បានឱ្យ​ដឹង​ថា អតីត​ខ្សែបម្រើ​ប្រយុទ្ធ​វ័យ​៤១​ឆ្នាំ​រូប​នេះ ត្រូវ​បាន​សម្លាប់​ដោយ​ការ​វាយប្រហារ​តាម​ផ្លូវអាកាស​របស់​ប្រទេស​អ៊ី​ស្រា​អែ​ល ខណៈ​ពេល​ដែល​លោក​កំពុង​រង់ចាំ​ជំនួយ​មនុស្សធម៌​នៅ​ហ្គា​ហ្សា ភាគ​ខាងត្បូង​។

អតីត​កីឡាករ​ឆ្នើម​ក្រុម​ជម្រើសជាតិ​ប៉ា​ឡេ​ស្ទី​ន​អំឡុង​ឆ្នាំ ២០០៧ ដល់ ២០១៣ រូប​នេះ ធ្លាប់​ប្រកប​អាជីព​ជាមួយ​ក្លិប​មួយ​ចំនួន រួម​ទាំង Khadamat al-Shatea និង Markaz Shabab al-Am’ari ផង​ដែរ​។

បើ​យោង​តាម​គេហទំព័រ Transfermarkt បាន​បង្ហាញ​ថា លោក Suleiman Obeid ដែល​ស៊ុត​បញ្ចូល​ទី​បាន​២​គ្រាប់​ពី​ក្នុង​ការ​បង្ហាញខ្លួន​សរុប​១៨​ប្រកួត​ជាមួយ​ក្រុម​ជម្រើសជាតិ គឺជា​អត្ត​ព​លិ​ក​ប៉ា​ឡេ​ស្ទី​ន​ចុង​ក្រោយ​គេ​ដែល​បាន​ស្លាប់​បាត់បង់​ជីវិត ចាប់តាំងពី​ការ​ចាប់ផ្តើម​ជម្លោះ​នៅ​មជ្ឈិមបូព៌ា ដ្បិត​បើ​តាម​ទិន្នន័យ​ចេញផ្សាយ​ដោយ​សមាគម​បាល់ទាត់​ប៉ា​ឡេ​ស្ទី​ន កាលពី​ថ្ងៃ​ទី​២៣ ខែកក្កដា ឆ្នាំ​២០២៥ បានឱ្យ​ដឹង​ថា អត្ត​ព​លិ​ក និង​កាយរឹទ្ធិ​ប៉ា​ឡេ​ស្ទី​ន​ចំនួន ៨០៧​នាក់ ត្រូវ​បាន​សម្លាប់​នៅ​ក្នុង​រយៈពេល​៦៧០​ថ្ងៃ​៕