រាជធានីភ្នំពេញ ៖ មានករណីជនស៊ីវិល២នាក់មិនស្គាល់អត្តសញ្ញាណបានធ្វើការឃាត់ខ្លួនយុវជនម្នាក់ពេលកំពុងជិះម៉ូតូមួយគ្រឿងចេញពីផ្ទះ និងចាប់យុវជនម្នាក់នេះវាយខ្នោះយកទៅកន្លែងដីវាលស្ងាត់ រួចចាប់ធ្វើតេស្តទឹកនោមកណ្តាលផ្លូវទៀត ពេលរកមិនឃើញមានសារធាតុញៀន ទើបដោះលែងវិញ ។
ហេតុការណ៍ខាងលើនេះបានកើតឡើងកាលពីវេលាម៉ោង៨និង១០នាទីយប់ថ្ងៃទី១៦ ខែសីហា ឆ្នាំ២០១៩ តាមបណ្តោយផ្លូវR6 នៅចំណុចបឹងកក់ ស្ថិតនៅក្នុងសង្កាត់ស្រះចក ខណ្ឌដូនពេញ ។
តាមប្រភពព័ត៌មានពីជនរងគ្រោះឈ្មោះ នៅ រ៉ាទី ភេទប្រុស អាយុ១៩ឆ្នាំ ស្នាក់នៅក្នុងម្តុំរ៉ារថភ្លើង ស្ថិតនៅក្នុងសង្កាត់ស្រះចក ខណ្ឌដូនពេញ បានអោយដឹងថា មុនពេលកើតហេតុខាងលើនេះ គាត់បានជិះម៉ូតូមួយគ្រឿងម៉ាកហុងដាBig ពណ៌ក្រហម មិនចាំស្លាកលេខ ទើបតែចេញមកពីផ្ទះក្នុងគោលបំណងទៅមើលឈ្មោះប្រឡង ។
តាមប្រភពដដែលបានបន្តថា ខណៈពេលគាត់ជិះម៉ូតូបានពាក់កណ្តាលផ្លូវនៅចំណុចបឹងកក់ ក៏ស្រាប់តែលេចមុខជនស៊ីវិល២នាក់ជិះម៉ូតូមកកាក់ឱ្យគាត់ឈប់ និងធ្វើការឃាត់ខ្លួនថែមទាំងវាយខ្នោះរឹតដៃគាត់យ៉ាងខ្លាំង លុះឆែកឆេរទៅរកមិនឃើញជាប់ពាក់ព័ន្ធ ឬជួញដូរគ្រឿងញៀននោះ ក៏គំរាមបាញ់គាត់ថែមទៀត ។ បន្ទាប់មកជនស៊ីវិលទាំង២នាក់បានដឹកគាត់ទៅកន្លែងស្ងាត់ហើយធ្វើតេស្តទឹកនោម ពេលធ្វើតេស្តអត់ឃើញមានសារធាតុញៀនក៏វាយ និងអោយគាត់ចេញទៅវិញ ទើបគាត់ទូរស័ព្ទទៅម្តាយអោយមករកអ្នកសារព័ត៌មានជួយផ្សាយរឿងរ៉ាវខាងលើនេះ ។
តាមប្រភពព័ត៌មានបានឱ្យដឹងថា ដោយសារឃើញជនរងគ្រោះមានស្នាមរបួសច្រើនកន្លែងទាំងដៃទាំងជើង ទើបម្តាយជនរងគ្រោះសំណូមពរដល់សមត្ថកិច្ចដែលពាក់ព័ន្ធ មេត្តាជួយអន្តរាគមន៍លើករណីនេះផង ។
ក្រោយពេលកើតហេតុខាងលើនេះ ជនរងគ្រោះបានទៅដាក់ពាក្យបណ្តឹងនៅប៉ុស្តិ៍នគរបាលស្រះចកដើម្បីឱ្យសមត្ថកិច្ចជួយដោះស្រាយលើករណីខាងលើនេះ ៕ (កែសម្រួលដោយ ៖ ធីតា)
ចែករំលែកព័តមាននេះ