រាជធានីភ្នំពេញ ៖ អ្នកសម្របសម្រួលអង្កការសហប្រជាជាតិប្រចាំនៅកម្ពុជា បានសម្តែងការព្រួយបារម្ភចំពោះស្ថានភាពជម្លោះ ដែលបានកើតឡើងនៅតាមតំបន់ព្រំដែនកម្ពុជា-ថៃ នៅឆ្នាំ ២០២៥ ។ការសម្តែងការព្រួយបារម្ភនេះ ខណៈដែលឯកឧត្តមទេសរដ្ឋមន្ត្រី កែវ…
រាជធានីភ្នំពេញ ៖ អ្នកសម្របសម្រួលអង្កការសហប្រជាជាតិប្រចាំនៅកម្ពុជា បានសម្តែងការព្រួយបារម្ភចំពោះស្ថានភាពជម្លោះ ដែលបានកើតឡើងនៅតាមតំបន់ព្រំដែនកម្ពុជា-ថៃ នៅឆ្នាំ ២០២៥ ។ការសម្តែងការព្រួយបារម្ភនេះ ខណៈដែលឯកឧត្តមទេសរដ្ឋមន្ត្រី កែវ រ៉េមី ប្រធានគណៈកម្មាធិការសិទ្ធិមនុស្សកម្ពុជា (គ.ស.ម.ក) ជួបជាមួយលោកជំទាវ Vladanka Andreeva អ្នកសម្របសម្រួលអង្គការសហប្រជាជាតិប្រចាំកម្ពុជាកាលពីរសៀលថ្ងៃទី ១២ ខែមីនា ឆ្នាំ ២០២៦ នៅស្នាក់ការគណៈកម្មាធិការសិទ្ធិមនុស្សកម្ពុជា ។ យោងតាមសេចក្តីប្រកាសព័ត៌មានស្តីពីលទ្ធផលនៃកិច្ចជំនួបរវាងបានឲ្យដឹងថា កិច្ចជំនួបនេះ មានគោលបំណងបន្តពង្រឹងកិច្ចសហ ប្រតិបត្តិការរវាង គ.ស.ម.ក. និងអង្គការសហប្រជាជាតិ លើវិស័យសិទ្ធិមនុស្ស ។
ឯកឧត្តម កែវ រ៉េមី រីបានទទួលការស្វាគមន៍លោកជំទាវ Vladanka Andreeva និងសហការី ហើយបានគូសបញ្ជាក់អំពីស្ថានភាពជាក់ស្តែងនៅតាមតំបន់ព្រំដែន កម្ពុជា-ថៃ ដែលបានបង្កផលប៉ះពាល់យ៉ាងធ្ងន់ធ្ងរយោងច្បាប់អន្តរជាតិ ជាពិសេសច្បាប់សិទ្ធិមនុស្ស និងច្បាប់មនុស្សធម៌អន្តរជាតិ រួមមាន ៖
ការរើសអើង និងការប្រើប្រាស់អំពើហិង្សាលើពលករទេសន្តប្រវេសន៍កម្ពុជា ។
ការប្រព្រឹត្តអំពើហិង្សាផ្លូវភេទលើស្ត្រីពលករកម្ពុជាពីសំណាក់កងទ័ពថៃ ។
ការប្រើប្រាស់សំឡេងមានកម្រិតដេស៊ីបែលខ្ពស់ និងសំឡេងរំខានផ្សេងៗ ដែលបង្កការ ប៉ះពាល់ផ្លូវចិត្តដល់ប្រជាជននៅតាមតំបន់ព្រំដែន ។
ការវាយប្រហារដោយមិនរើសគោលដៅ ដោយប្រើប្រាស់អាវុធធុនធ្ងន់ គ្រាប់បែកចង្កោម ផ្សែងពុល និងយន្តហោះចម្បាំងប្រភេទ F-16, Gripen និង T-50 បណ្តាលឱ្យខូចខាត ទ្រព្យសម្បត្តិឯកជន និងសាធារណៈ រួមទាំង ប្រាសាទព្រះវិហារ ដែលជាសម្បត្តិ បេតិកភណ្ឌពិភពលោក ។ ការលួចទ្រព្យសម្បត្តិប្រជាពលរដ្ឋកម្ពុជាពីសំណាក់កងទ័ពថៃ ។
ការព្យាយាមបង្កើតតថភាពថ្មីនៅនឹងកន្លែង (fait accompli) តាមរយៈការដាក់ពង្រាយលួសបន្លា ដាក់ទូកុងតឺន័រ ឈូសបំផ្លាញផ្ទះប្រជាពលរដ្ឋ និងការកសាងហេដ្ឋារចនាសម្ព័ន្ធថ្មីៗ ក្នុងតំបន់ឈ្លានពាន ដែលធ្វើឱ្យប្រជាពលរដ្ឋប្រមាណ ៤០ ០០០ នាក់ មិនអាចត្រឡប់ ទៅលំនៅឋានរបស់ពួកគេវិញបានដោយសុវត្ថិភាព ។
ឯកឧត្តមទេសរដ្ឋមន្ត្រីបានបញ្ជាក់ថា រាជរដ្ឋាភិបាលកម្ពុជា បន្តគាំទ្រ និងសហប្រតិបត្តិការយ៉ាង ពេញលេញជាមួយតំណាងអង្គការសហប្រជាជាតិប្រចាំកម្ពុជា ទោះបីស្ថិតក្នុងស្ថានភាពសណ្តាប់ធ្នាប់ ពិភពលោកកំពុងធ្លាក់ចុះ ព្រមទាំងនៅតែបន្តប្រកាន់យកជំហរនៃការអត់ធ្មត់ និងការដោះស្រាយជម្លោះដោយសន្តិវិធី ស្របតាមច្បាប់អន្តរជាតិ និងយន្តការច្បាប់ដែលមានស្រាប់ ព្រមទាំងបន្តខិតខំការពារសិទ្ធិ សុវត្ថិភាព និងសេចក្តីថ្លៃថ្នូររបស់ប្រជាពលរដ្ឋដែលរងផលប៉ះពាល់ ។
ក្នុងឱកាសនេះ លោកជំទាវ Vladanka Andreeva បានថ្លែងអំណរគុណចំពោះរាជរដ្ឋាភិបាលកម្ពុជា និងគណៈកម្មាធិការសិទ្ធិមនុស្សកម្ពុជា សម្រាប់កិច្ចខិតខំប្រឹងប្រែង និងកិច្ចសហប្រតិបត្តិការជាមួយយន្តការ អង្គការសហប្រជាជាតិ ក្នុងការលើកកម្ពស់ និងការពារសិទ្ធិមនុស្ស និងយកចិត្តទុកដាក់ខ្ពស់ចំពោះ សហគមន៍ LGBTQIA+ ។
លោកជំទាវក៏បានសម្តែងការព្រួយបារម្ភចំពោះស្ថានភាពជម្លោះ ដែលបានកើត ឡើងនៅតាមតំបន់ព្រំដែនកម្ពុជា-ថៃ ក្នុងឆ្នាំ២០២៥ ដែលបានបង្កផលប៉ះពាល់ដល់ពលករទេសន្តប្រវេសន៍ និងប្រជាពលរដ្ឋនៅតាមតំបន់ព្រំដែន។ លោកជំទាវបានគូសបញ្ជាក់ថា ៖ ជម្លោះតែងតែបង្កផលប៉ះពាល់ យ៉ាងធ្ងន់ធ្ងរដល់ជីវិតប្រជាជន និងការអភិវឌ្ឍសង្គម ហើយបានសង្កត់ធ្ងន់ថា សន្តិភាពត្រូវតែថែរក្សា និងច្បាប់អន្តរជាតិត្រូវតែគោរព ។
លោកជំទាវក៏បានលើកឡើងពីសារៈសំខាន់នៃ លំហរស៊ីវិល និងតួនាទីរបស់អង្គការសង្គមស៊ីវិល ក្នុងការចូលរួមលើកកម្ពស់សិទ្ធិមនុស្ស និងការអភិវឌ្ឍសង្គម ជាពិសេសអំឡុងពេលជនភៀសសឹកកំពុងត្រូវការការគាំពារយ៉ាងខ្លាំង ។
ឯកឧត្តម កែវ រ៉េមី បានបញ្ជាក់ថា រាជរដ្ឋាភិបាលកម្ពុជា តែងតែយកចិត្តទុកដាក់ និងជឿជាក់លើសារៈសំខាន់នៃកិច្ចសហប្រតិបត្តិការប្រកបដោយភាពស្មោះត្រង់ជាមួយអង្គការ សង្គមស៊ីវិល និងបានបើកចំហ លំហរស៊ីវិល ឱ្យមានការចូលរួមយ៉ាងទូលំទូលាយក្នុងការលើកកម្ពស់សិទ្ធិមនុស្ស ។
ក្នុងឱកាសនោះផងដែរ លោកជំទាវ ឡុង សូនីតា អនុប្រធាន គ.ស.ម.ក. បានលើកឡើងអំពីការ បន្តពង្រឹងកិច្ចសហប្រតិបត្តិការ និងកិច្ចសន្ទនាក្នុងវិស័យសិទ្ធិមនុស្ស រួមមាន ការអនុវត្តអនុសាសន៍នៃ យន្តការ Universal Periodic Review (UPR) ការកសាងសមត្ថភាពស្ថាប័ន ការគាំទ្រផ្នែកបច្ចេកទេស ការរៀបចំ មូលដ្ឋានទិន្នន័យតាមដានអនុសាសន៍ជាតិ (National Recommendations Tracking Database – NRTD) ការអប់រំ និងផ្សព្វផ្សាយអំពីសិទ្ធិមនុស្ស ការត្រួតពិនិត្យស្ថានភាពសិទ្ធិមនុស្សនៅ ពន្ធនាគារ និងមណ្ឌលអប់រំកែប្រែ ការគាំទ្រដល់ក្រុមងាយរងគ្រោះ រួមមានជនភៀសសឹកកម្ពុជា ជាពិសេស ការគាំទ្រផ្នែកសុខភាពផ្លូវចិត្ត និងការគាំទ្រការអប់រំដល់កុមារភៀសសឹក ព្រមទាំងការលើកកម្ពស់ការ យល់ដឹងអំពីសិទ្ធិ និងសមភាពសម្រាប់សហគមន៍ LGBTQIA+ ផងដែរ៕
ចែករំលែកព័តមាននេះ