ទីក្រុងវ៉ាស៊ីនតោន ៖ សហរដ្ឋអាមេរិកបានចេញអាជ្ញាប័ណ្ណរយៈពេល៣០ថ្ងៃ សម្រាប់ឱ្យប្រទេសនានាទិញប្រេង និងផលិតផលប្រេងរបស់រុស្ស៊ី ដែលបច្ចុប្បន្នកំពុងជាប់គាំងនៅលើសមុទ្រ ដោយសារទណ្ឌកម្មរបស់អាមេរិក។ បើតាមរដ្ឋមន្ត្រីក្រសួងរតនាគារអាមេរិក លោក ស្កុត…
ទីក្រុងវ៉ាស៊ីនតោន ៖ សហរដ្ឋអាមេរិកបានចេញអាជ្ញាប័ណ្ណរយៈពេល៣០ថ្ងៃ សម្រាប់ឱ្យប្រទេសនានាទិញប្រេង និងផលិតផលប្រេងរបស់រុស្ស៊ី ដែលបច្ចុប្បន្នកំពុងជាប់គាំងនៅលើសមុទ្រ ដោយសារទណ្ឌកម្មរបស់អាមេរិក។ បើតាមរដ្ឋមន្ត្រីក្រសួងរតនាគារអាមេរិក លោក ស្កុត បេសឹន (Scott Bessent) បានថ្លែងថា នេះជាជំហានមួយដើម្បីរក្សាស្ថិរភាពទីផ្សារថាមពលសកលដែលរងផលប៉ះពាល់ដោយសង្គ្រាមនៅអ៊ីរ៉ង់ ។ នេះបើតាមប្រភពពីទីភ្នាក់ងារសារព័ត៌មាន Reuters បានចេញផ្សាយ។
ការប្រកាសនេះធ្វើឡើង១ថ្ងៃ បន្ទាប់ពីក្រសួងថាមពលអាមេរិកបានប្រកាសថា សហរដ្ឋអាមេរិកនឹងបញ្ចេញស្តុកប្រេងចំនួន ១៧២ លានបារ៉ែលក្នុងកិច្ចខិតខំប្រឹងប្រែងដើម្បីទប់ស្កាត់តម្លៃប្រេងដែលកើនឡើងខ្ពស់ បន្ទាប់ពីសង្គ្រាមនៅអ៊ីរ៉ង់។ ការចេញផ្សាយនោះដែរ ស្របទៅតាមការប្តេជ្ញាចិត្តដោយទីភ្នាក់ងារថាមពលអន្តរជាតិ (IEA) សមាជិកចំនួន ៣២ ប្រទេសក្នុងការបញ្ចេញស្តុកប្រេងចំនួន ៤០០ លានបារ៉ែល។ ទីភ្នាក់ងារនេះ កាលពីថ្ងៃទី១២ ខែមីនា ឆ្នាំ២០២៦ បានប្រកាសថា សង្គ្រាមនៅមជ្ឈិមបូព៌ាកំពុងតែបង្កើតការរំខានដល់ការផ្គត់ផ្គង់ប្រេងដ៏ធំបំផុតក្នុងប្រវត្តិសាស្ត្រ។
លោក ស្កុត បេសឹន នៅក្នុងសេចក្តីថ្លែងការណ៍មួយលើបណ្តាញទំនាក់ទំនងសង្គម X ដែលបានចេញផ្សាយប៉ុន្មានម៉ោង បន្ទាប់ពីតម្លៃប្រេងគោលសកលបានឡើងខ្ពស់ជាង ១០០ ដុល្លារអាមេរិកនៅក្នុង១បារ៉ែល (ធុង) ថា វិធានការនេះ ត្រូវបានកែសម្រួលយ៉ាងតឹងរ៉ឹង និងរយៈពេលខ្លី ហើយនឹងមិនផ្តល់អត្ថប្រយោជន៍ហិរញ្ញវត្ថុសំខាន់ៗទៅដល់រដ្ឋាភិបាលរុស្ស៊ីឡើយ។ លោកបានបញ្ជាក់បន្ថែមដោយបន្ទរតាមសម្តីរបស់ប្រធានាធិបតីសហរដ្ឋអាមេរិក លោក ដូណាល់ ត្រាំ (Donald Trump) ថា ការកើនឡើងជាបណ្ដោះអាសន្ននៃតម្លៃប្រេង គឺជាការរំខានរយៈពេលខ្លី និងបណ្ដោះអាសន្នប៉ុណ្ណោះ ប៉ុន្តែវានឹងនាំមកនូវអត្ថប្រយោជន៍យ៉ាងច្រើនដល់ប្រទេសជាតិ និងសេដ្ឋកិច្ចសហរដ្ឋអាមេរិកនៅក្នុងរយៈពេលវែង។
យោងតាមអត្ថបទបង្ហោះនៅលើគេហទំព័រក្រសួងរតនាគារអាមេរិក បានឱ្យដឹងថា អាជ្ញាប័ណ្ណរយៈពេល៣០ថ្ងៃ ដែលអនុញ្ញាតឱ្យប្រទេសនានាទិញប្រេង រួមទាំងផលិតផលប្រេងរបស់រុស្ស៊ី គិតចាប់ពីថ្ងៃទី១២ ខែមីនា ឆ្នាំ២០២៦ តទៅ នឹងមានសុពលភាពរហូតដល់ម៉ោង ១២ រំលងអាធាត្រថ្ងៃទី១១ ខែមេសា ឆ្នាំ២០២៦។
ក្រសួងរតនាគារអាមេរិកកន្លងទៅ ទើបតែបានចេញអាជ្ញាប័ណ្ណរយៈពេល ៣០ ថ្ងៃ គិតខចាប់ពីថ្ងៃទី៥ ខែមីនា ឆ្នាំ២០២៥ ជាពិសេសសម្រាប់ប្រទេសឥណ្ឌា ដើម្បីអនុញ្ញាតឱ្យទីក្រុងញូវដេលីទិញប្រេងរបស់រុស្ស៊ីដែលជាប់គាំងនៅសមុទ្រ៕
ចែករំលែកព័តមាននេះ