ខេត្តកោះកុង ៖ បើតាមសេចក្តីរាយការណ៍បឋមបានឱ្យដឹងថា បន្ទាប់ពីកោះសន្តិភាពបានចុះផ្សាយរឿងឈ្មួយមួយក្រុម ក្លាហានហា៑នជីករំលាយភ្នំ ដើម្បីយកថ្ម និងអាចម៍ដីលក់យ៉ាងអនាធិបតេយ្យនៅក្នុងក្រុងខេមរៈភូមិន្ទ ខេត្តកោះកុង ដែលជាដីតំបន់ជួរភ្នំស្ថិតក្នុងដែនជម្រកសត្វព្រៃតាតៃ ការពារដោយអនុក្រឹត្យលេខ ៨០ អនក្រ.បក ចុះថ្ងៃទី០៩ ខែឧសភា ឆ្នាំ២០១៦ រួចមក បានធ្វើឱ្យរឿងអាស្រូវល្មើសនឹងផ្លូវច្បាប់មួយចំនួនត្រូវបានផ្ទុះចេញមក ។
ប៉ុន្តែទោះជាយ៉ាងណា បទល្មើសជីករំលាយភ្នំរបស់ក្រុមឈ្មួញខាងលើនេះ ជាបន្ទុករបស់ស្ថាប័នមានសមត្ថកិច្ចចំនួន៣ ត្រូវតែទទួលខុសត្រូវចំពោះមុខច្បាប់ ជាពិសេសចំពោះមុខប្រមុខរាជរដ្ឋាភិបាល ដែលបានចេញអនុក្រឹត្យការពារតំបន់ភ្នំទាំងនោះ ។ ហើយស្ថាប័នទាំងពាក់ព័ន្ធការងារខាងលើនេះ រួមមាន ៖
១- មន្ទីររៀបចំដែនដីនគរូបនីយកម្មសំណង់ និងសុរិយោដីខេត្ត (ពាក់ព័ន្ធនឹងការផ្តល់កម្មសិទ្ឋិដីធ្លី),
២- មន្ទីរបរិស្ថាន (ពាក់ព័ន្ធនឹងតួនាទីការពារតំបន់ជួរភ្នំ)
៣- មន្ទីររ៉ែ និងថាមពល (ពាក់ព័ន្ធនឹងការអនុញ្ញាតិផ្តល់ទីតាំង និងការទទួលសួយសារ) ។
ហើយដោយសារតែរឿងនេះរងការរិះគន់ពីគ្រប់មជ្ឈដ្ឋាននានាក្នុងខេត្ត និងអង្គការអភិរក្សផងនោះ កាលពីក្នុងសប្តាហ៍កន្លងទៅនេះ សាលាខេត្តកោះកុងបានកោះហៅស្ថាប័នពាក់ព័ន្ធទាំងអស់ក្នុងខេត្តមកប្រជុំ ដើម្បីមានវិធានការជាបន្ទាន់មួយ ប៉ុន្តែមិនទាន់ឃើញចេញលទ្ធផលជាផ្លូវការយ៉ាងណានៅឡើយទេ ។
មជ្ឈដ្ឋាននានាជាច្រើនបានរិះគន់ដោយបញ្ជាក់យ៉ាងច្បាស់ថា ដីក្នុងអនុក្រឹត្យលេខ៨០ (តំបន់ដែនជម្រកសត្វព្រៃតាតៃ) មានចំនួន ១៤៤២៧៥ ហិកតា បានលាតសន្ធឹងគ្របដណ្តប់ក្រុងខេមរៈភូមិន្ទស្ទើរតែទាំងស្រុង និងស្រុកជាច្រើនទៀត។ សូម្បីតែដីស្រែចំការលំនៅដ្ឋាន សាលារៀន វត្តអារាម ទីតាំងស្ថាប័នរដ្ឋជាច្រើន ស្ទឹងបឹងព្រែក និង ជួរភ្នំទាំងអស់ សុទ្ធតែជាប់នៅក្នុងដីអនុក្រឹត្យលេខ៨០នេះ ។
ពលរដ្ឋគ្មានសិទ្ធិកាប់ទន្ទ្រាន ឈូសឆាយ កាន់កាប់ លក់ដូរ ឬសាងសង់ តាមលក្ខណៈផ្លូវច្បាប់បានឡើយ ។ ចុះហេតុអ្វីក៏ខ្នងភ្នំទាំងនោះ ត្រូវបានក្រុមឈ្មួញជីករំលាយយកថ្ម និងអាចម៍ដីលក់ដោយគ្មានច្បាប់បានយ៉ាងអនាធិបតេយ្យពេញក្រុងខេមរៈភូមិន្ទ យ៉ាងដូច្នេះ ។
ប៉ុន្តែថ្មីៗនេះ កម្មករកាន់គ្រឿងចក្រម្នាក់ឈ្មោះ ឈួរ វុទ្ធី ជាអ្នកឈរឈ្មោះជំនួសថៅកែឈ្មោះ សំ វីរៈ បានអះអាងថា គាត់មានច្បាប់ជីរំលាយភ្នំនេះ។ គាត់បានបង់លុយឱ្យខាងបរិស្ថាន និង ស្ថាប័នផ្សេងៗទៀតជាច្រើន ។ បន្ទាប់មកគាត់បានបង្ហាញលិខិតមួយច្បាប់ដែលចុះហត្ថលេខាឯកភាពដោយលោកប្រធានមន្ទីរបរិស្ថាន អនុញ្ញាតិឱ្យកាយដីលក់លើផ្ទៃដីទំហំ ៩៨៦៩ ម៉ែត្រក្រឡា។ លិខិតនេះមានលក្ខខណ្ឌ១០ប្រការ ដែលប្រការ៩ បានតម្រូវឱ្យឈ្មោះ ឈួរ វុទ្ធី បង់ប្រាក់មូលនិធិទ័យជ្ជទានបរិស្ថានប្រចាំឆ្នាំ ចំនួន ១លាន២សែនរៀលក្នុងមួយឆ្នាំ ហើយលោកប្រធានបានប្រាប់កោះសន្តិភាពតាមទូរស័ព្ទថា កិច្ចសន្យាការពារផលប៉ះពាល់បរិស្ថាននេះ សម្រាប់អាជីវកម្មកាយដីក្រហមលក់ ប៉ុន្តែបែរជាឈ្មោះ ឈួរ វុទ្ធី យកលិខិតនេះធ្វើជាច្បាប់ជីករំលាយភ្នំទៅវិញ ។
លោកម៉ន ផល្លា ប្រធានមន្ទីរបរិស្ថានបានបញ្ជាក់ដើម្បីការពារហត្ថលេខារបស់ខ្លួនក្នុងលិខិតខាងលើថា តំបន់ភ្នំទាំងនេះ ជាតំបន់ដែលត្រូវបានគេអនុគ្រោះឱ្យប្រើប្រាស់រួចហើយ គ្រាន់តែមិនទាន់មានឯកសារផ្លូវការតែប៉ុណ្ណោះ ជាតំបន់ដែលក្រុមយុវជនវាស់វែងរួចហើយ គ្រាន់តែចេញប្លង់អត់ទាន់បាន ដែលគេនិយាយថា បានកន្ទេលធំ ចោរប្លន់សម្ងំដេកយ៉ាងស្រួល ។
ព័ត៌មានពិស្តារនឹងមានផ្សាយជូននៅកាសែតកោះសន្តិភាព ៕ (កែសម្រួលដោយ ៖ បុប្ផា)
ចែករំលែកព័តមាននេះ