រយៈពេលចុងក្រោយនេះបណ្ដាប្រទេសជុំវិញពិភពលោកមួយចំនួនបានផ្ទុះឡើងនូវអំពើហិង្សាតវ៉ាផ្នែកនយោបាយដែលបង្កឱ្យមានភាពវឹកវរក្នុងប្រទេសទាំងនោះ ពិសេសគឺប្រទេសផលិតប្រេងតែម្ដងដែលជាកត្ដារុញច្រានឱ្យមានអស្ថិរភាពផលិតកម្មរហូតមានការគំរាមកំហែងដល់កន្លែងប្រេងទៀតផង ។ ជាក់ស្ដែងបច្ចុប្បន្នមានប្រទេសចំនួន៤ដែលកំពុងជួបវិបត្តិនេះ ថែមទាំងអាចធ្វើឱ្យតម្លៃប្រេងកើនឡើងគឺប្រទេសវ៉េណេស៊ុយអេឡា អីុរ៉ាក់ លីប៊ី និងស៊ូដង់ខាងត្បូង ។
វ៉េណូស៊ុយអេឡាជាប្រទេសដែលផលិតប្រេងបម្រុងទុកច្រើនជាងគេបំផុតលើពិភពលោកលើសប្រទេសអារ៉ាប៊ីសាអូឌីត ។ នៅក្នុងឆ្នាំ១៩៩៤ ប្រទេសនេះបូមប្រេងបាន២,៧លានបារែលក្នុងមួយថ្ងៃ ដោយឡែកនៅក្នុងឆ្នាំ២០១៣ សម្រេចបានត្រឹម២,៤លានបារែលប៉ុណ្ណោះ ។ ដូច្នេះនេះគឺជាបញ្ហាធំមួយសម្រាប់រដ្ឋាភិបាលដែលពឹងផ្អែកលើក្រុមហ៊ុនប្រេងរបស់រដ្ឋ(PDVSA)និងរូបិយប័ណ្ណបរទេស៩៦% ។ ម្យ៉ាងទៀតផលិតកម្មសម្រាប់តម្រូវការលើដីបាត់បង់ជាង២លានបារែលក្នុងមួយថ្ងៃរាប់ទាំងការនាំចេញទៅសហរដ្ឋអាមេរិក៨០ម៉ឺនបារែលក្នុងមួយថ្ងៃ ។
ប្រទេសអីុរ៉ាក់ឯណោះវិញបច្ចុប្បន្នជាប្រទេសផលិតប្រេងធំបំផុតទី២នៅក្នុងបញ្ជីរបស់OPEC ។ នៅក្នុងខែមករា ការនាំចេញប្រេងរបស់អីុរ៉ាក់បានធ្លាក់ចុះស្មើនឹងចំនួន២,២លានបារែល ក្នុងមួយថ្ងៃធៀបនឹងខែធ្នូ ឆ្នាំ២០១៣ នាំចេញបាន២,៣៤លានបារែលក្នុងមួយថ្ងៃ ។ តាមប្រភពព័ត៌មានឱ្យដឹងថា ប្រទេសអីុរ៉ាក់កំពុងសហការជាមួយអីុរ៉ង់ដើម្បីប្រកួតប្រជែងនឹងអារ៉ាប់ប៊ីសាអូឌីតគ្រប់គ្រងតំណែងក្នុងបញ្ជី OPEC ។
ចំណែកប្រទេសលីប៊ី ក៏ជាអ្នកនាំមុខលើវិស័យផលិតប្រេងផងដែរ នៅចន្លោះខែកុម្ភៈ និងខែមេសា ឆ្នាំ២០១១ តម្លៃប្រេងក្នុងប្រទេសនេះបានកើនឡើង២០% ។ ចំណែកខែមករា ឆ្នាំ២០១៤ លីប៊ីផលិតប្រេងបានត្រឹមតែកន្លះលានបារែលប៉ុណ្ណោះក្នុងមួយថ្ងៃ ។ រីឯស៊ូដង់ខាងត្បូងជាប្រទេសផលិតប្រេងធំបំផុតទី៤ ដែលជាការគំរាមកំហែងដោយអំពើហិង្សាជាថ្មីម្ដងទៀត ។
ជាក់ស្ដែងកាលពីថ្ងៃទី១៨ ខែកុម្ភៈ កន្លងមក ពួកឧទ្ទាមក្នុងប្រទេសនេះបានបើកការវាយប្រហាររដ្ឋធានីMalkal ដែលជាទីតាំងផលិតប្រេងធំបំផុតនៅក្នុងប្រទេស ។ ស្ថានការណ៍នេះបានធ្វើឱ្យការនាំចេញប្រេងត្រូវបានកាត់បន្ថយ ហើយបច្ចុប្បន្នលើទីផ្សារពិភពលោកពុំមានក្ដីរំពឹងនឹងប្រើប្រាស់ប្រេងរបស់ប្រទេសនេះឡើយ ខណៈដែលគេព្យាករថា ក្នុងមួយថ្ងៃប្រទេសស៊ូដង់ខាងត្បូងផលិតប្រេងបានចន្លោះពី២២ម៉ឺនបារែលទៅ២៤ម៉ឺនបារែលប៉ុណ្ណោះក្នុងមួយថ្ងៃ ៕
ចែករំលែកព័តមាននេះ