បរទេស ៖ យោងតាមសេចក្តីរាយការណ៍ពីទីភ្នាក់ងារសារព័ត៌មាន Reuters បានឱ្យដឹងថា តម្លៃមាសអន្តរជាតិបានកើនឡើងខ្ពស់បំផុតក្នុងរយៈពេលជាង៤ខែ នៅក្នុងការជួញដូរថ្ងៃទី១ ខែកញ្ញា ឆ្នាំ២០២៥ ចំពេលបណ្តាវិយោគិនបង្ហាញក្តីរំពឹងខ្ពស់…
បរទេស ៖ យោងតាមសេចក្តីរាយការណ៍ពីទីភ្នាក់ងារសារព័ត៌មាន Reuters បានឱ្យដឹងថា តម្លៃមាសអន្តរជាតិបានកើនឡើងខ្ពស់បំផុតក្នុងរយៈពេលជាង៤ខែ នៅក្នុងការជួញដូរថ្ងៃទី១ ខែកញ្ញា ឆ្នាំ២០២៥ ចំពេលបណ្តាវិយោគិនបង្ហាញក្តីរំពឹងខ្ពស់ សម្រាប់ការកាត់បន្ថយអត្រាការប្រាក់របស់ធនាគារកណ្តាលអាមេរិក (Fed) ក្នុងខែនេះ។
តម្លៃមាសអន្តរជាតិបានកើនឡើង ១,២% នៅក្នុងតម្លៃ ៣,៤៨៦ដុល្លារក្នុង១អោន ឬស្មើនឹង ៤ ២០០ដុល្លារក្នុង១តម្លឹង គិតត្រឹមម៉ោង ១:៤០នាទីរសៀលថ្ងៃទី១ កញ្ញា ឆ្នាំ២០២៥ (ម៉ោងនៅកម្ពុជា) ដែលជាតម្លៃខ្ពស់បំផុតចាប់តាំងពីថ្ងៃទី២៣ ខែមេសា កន្លងទៅ។
លោក Matt Simpson អ្នកវិភាគជាន់ខ្ពស់ពី City Index បានលើកឡើងថា វិនិយោគិនកំពុងបង្ហាញក្តីរំពឹងខ្ពស់ថា ធនាគារកណ្តាលអាមេរិកអាចនឹងកាត់បន្ថយអត្រាការប្រាក់ជាមូលដ្ឋាន ២៥ ពិន្ទុក្នុងខែកញ្ញានេះ។ ជាមួយគ្នានោះដែរ លោកបានបន្តថា តុលាការឧទ្ធរណ៍អាមេរិកក៏បានចាត់ទុកគោលនយោបាយពន្ធគយភាគច្រើនរបស់ប្រធានាធិបតីអាមេរិក លោក ដូណាល់ ត្រាំ (Donald Trump) ថាខុសច្បាប់ ដែលកត្តានេះប៉ះពាល់ដល់តម្លៃប្រាក់ដុល្លារអាមេរិក។
ប្រភពពី Reuters បានឱ្យដឹងថា ប្រាក់ដុល្លារអាមេរិកបានធ្លាក់ចុះក្នុងការជួញដូរថ្ងៃទី១ ខែកញ្ញា ខណៈដែលវិនិយោគិនកំពុងផ្តោតទៅលើទិន្នន័យទីផ្សារការងាររបស់អាមេរិកក្នុងសប្តាហ៍នេះ ដែលអាចកំណត់ទំហំនៃការកាត់បន្ថយអត្រាការប្រាក់ដែលរំពឹងទុកដោយធនាគារកណ្តាលអាមេរិកនៅចុងខែនេះ។ ដ្បិតការធ្លាក់ចុះតម្លៃប្រាក់ដុល្លារ និងការរំពឹងទុកពីទិន្នន័យទីផ្សារការងាររបស់អាមេរិក ក៏មានជះឥទ្ធិពលលើកំណើនតម្លៃមាសអន្តរជាតិផងដែរ។
ប្រាក់ដុល្លារបានធ្លាក់ចុះ ០,០៤% ធៀបទៅនឹងប្រាក់យេនជប៉ុនក្នុងការជួញដូរនៅអាស៊ីថ្ងៃទី១ ខែកញ្ញា សម្រាប់ ១ដុល្លារស្មើ ១៤៦,៩៨យេន ដោយបានបន្តការធ្លាក់ចុះប្រចាំខែរបស់ខ្លួនចំនួន ២,៥% ធៀបនឹងរូបិយប័ណ្ណជប៉ុន កាលពីខែសីហា។ ចំណែកប្រាក់អឺរ៉ូបានកើនឡើង ០,២៥% ដោយ ១អឺរ៉ូ ស្មើនឹង ដល់ ១,១៧ដុល្លារ។
ងាកទៅផ្នែកពាណិជ្ជកម្មឯណោះវិញ អ្នកតំណាងពាណិជ្ជកម្មអាមេរិក លោក Jamieson Greer កាលពីថ្ងៃទី៣១ ខែសីហា ឆ្នាំ២០២៥ បានថ្លែងថា រដ្ឋបាលលោក ត្រាំ កំពុងបន្តកិច្ចចរចារបស់ខ្លួនជាមួយបណ្តាដៃគូពាណិជ្ជកម្ម បើទោះបីជាតុលាការឧទ្ធរណ៍អាមេរិកបានសម្រេចថា គោលនយោបាយពន្ធគយភាគច្រើនរបស់លោក ត្រាំ គឺខុសច្បាប់យ៉ាងណាក៏ដោយ៕
ចែករំលែកព័តមាននេះ