បរទេស ៖ ប្រទេសសិង្ហបុរីបានជាប់ចំណាត់ថ្នាក់កំពូលជាប្រទេសដែលមានសន្តិភាពបំផុតនៅទ្វីបអាស៊ីសម្រាប់ឆ្នាំ ២០២៥ ដោយបញ្ជាក់ឡើងវិញនូវកេរ្តិ៍ឈ្មោះដ៏ល្បីល្បាញរបស់ខ្លួនថាជាប្រទេសដែលមានសុវត្ថិភាពបំផុតមួយទូទាំងពិភពលោក។ នេះបើយោងតាមការវាយតម្លៃសន្តិភាពសកលឆ្នាំ ២០២៥ ចុងក្រោយដោយវិទ្យាស្ថានសេដ្ឋកិច្ច និងសន្តិភាព ហៅកាត់ថា…
បរទេស ៖ ប្រទេសសិង្ហបុរីបានជាប់ចំណាត់ថ្នាក់កំពូលជាប្រទេសដែលមានសន្តិភាពបំផុតនៅទ្វីបអាស៊ីសម្រាប់ឆ្នាំ ២០២៥ ដោយបញ្ជាក់ឡើងវិញនូវកេរ្តិ៍ឈ្មោះដ៏ល្បីល្បាញរបស់ខ្លួនថាជាប្រទេសដែលមានសុវត្ថិភាពបំផុតមួយទូទាំងពិភពលោក។ នេះបើយោងតាមការវាយតម្លៃសន្តិភាពសកលឆ្នាំ ២០២៥ ចុងក្រោយដោយវិទ្យាស្ថានសេដ្ឋកិច្ច និងសន្តិភាព ហៅកាត់ថា IEP ដែលមានមូលដ្ឋាននៅប្រទេសអូស្ត្រាលី។
ក្រៅអំពីជាប្រទេសដែលមានសន្តិភាពបំផុតនៅទ្វីបអាស៊ីនៅឆ្នាំនេះហើយនោះ សិង្ហបុរីក៏ជាប់ចំណាត់ថ្នាក់ទី ៦ នៅទូទាំងពិភពលោក ដោយនៅពីក្រោយប្រទេសអ៊ីស្លង់ អៀរឡង់ នូវែលសេឡង់ អូទ្រីស និងស្វីស សម្រាប់បញ្ជីប្រទេសដែលមានសន្តិភាពបំផុតលើពិភពលោក ហើយនាំមុខព័រទុយហ្គាល់ ដាណឺម៉ាក ស្លូវេនី និងហ្វាំងឡង់។ ដ្បិតប្រទេសអាស៊ីដែលមានចំណាត់ថ្នាក់កំពូលផ្សេងទៀតរួមមាន ជប៉ុន (ទី១២) និងម៉ាឡេស៊ី (ទី១៣)។
ប្រទេសសិង្ហបុរីបានបង្ហាញពីវឌ្ឍនភាពជាលំដាប់ ចាប់តាំងពីការវាយតម្លៃនេះ ត្រូវបានដាក់ដំណើរការជាលើកដំបូងនៅក្នុងឆ្នាំ ២០០៨ ដោយនៅពេលសិង្ហបុរីបានជាប់ចំណាត់ថ្នាក់ទី ២២ ពិភពលោក មុនពេលហក់ចូលក្នុងចំណាត់ថ្នាក់កំពូលទាំង ១០ (Top 10) នៅលើពិភពលោកក្នុងឆ្នាំ ២០១៩ ហើយបន្តដំណើរឈរនៅចំណាត់ដ៏ល្អជាលំដាប់។
របាយការណ៍ស្តីប្រទេសដែលមានសន្តិភាពបំផុតលើពិភពលោក បានបង្ហាញពីពិន្ទុដ៏រឹងមាំរបស់ប្រទេសសិង្ហបុរីផ្អែកលើសុវត្ថិភាព និងសន្តិសុខសង្គម រួមជាមួយនឹងកម្រិតទាបនៃជម្លោះក្នុងស្រុក ក៏ដូចជាអន្តរជាតិ។ ទោះជាយ៉ាងណាក៏ដោយ ការបង្កើនសមត្ថភាពកម្រិតខ្ពស់យោធារបស់ប្រទេសដីកោះដែលមានផ្ទៃដីសរុបត្រឹម៧៣៦,៣គីឡូម៉ែត្រការ៉េមួយនេះ ភាគច្រើនដើម្បីការពារផ្លូវពាណិជ្ជកម្មសមុទ្រដ៏សំខាន់របស់ខ្លួន ដែលបានរារាំងប្រទេសនេះមិនឱ្យឈានដល់ចំណាត់ថ្នាក់កំពូលនៃការវាយតម្លៃរបស់ IEP។
ប្រទេសដែលមានសន្តិភាពបំផុតនៅលើពិភពលោកនៅតែជាប្រទេសអ៊ីស្លង់ ដែលបានជាប់ចំណាត់ថ្នាក់កំពូលនេះក្នុងរយៈពេល១៨ឆ្នាំជាប់គ្នា។ ប្រទេសនៅក្នុងក្រុមប្រទេសកោះកោះន័រដិក (Nordic) នៅទ្វីបអឺរ៉ុបមួយនេះ ពុំមានកងទ័ពឈរជើងអចិន្ត្រៃយ៍ គ្មានកងទ័ពជើងទឹក ឬទ័ពអាកាស ប្រជាជនតិចចំនួនត្រឹមជាង ៣៩៩ ០០០នាក់ប៉ុណ្ណោះ និងមានអត្រាឧក្រិដ្ឋកម្មទាបបំផុតនៅទូទាំងពិភពលោក អ៊ីស្លង់ក៏ត្រូវបានចាត់ទុកថាជាគោលដៅទេសចរណ៍សម្រាប់សន្តិភាព និងសន្តិសុខ។
របាយការណ៍ពី IEP បានអះអាងថា ដោយគ្មានកងទ័ពឈរជើង កងទ័ពជើងទឹក ឬទ័ពអាកាស និងចំនួនប្រជាជនតិចជាងគេបំផុតនៃរដ្ឋសមាជិកអង្គការណាតូ (NATO) នោះ ប្រទេសអ៊ីស្លង់ក៏រីករាយនឹងអត្រាឧក្រិដ្ឋកម្មទាប រហូតដល់កម្រិតដែលប៉ូលិសជាទូទៅមិនកាន់អាវុធ។
ប្រទេសដែលមានសន្តិភាពបំផុតទាំង ១៥ នៅលើពិភពលោករបស់ IEP ៖
១. អ៊ីស្លង់
២. អៀរឡង់
៣. នូវែលសេឡង់
៤. អូទ្រីស
៥. ស្វីស
៦.សិង្ហបុរី
៧. ព័រទុយហ្គាល់
៨.ដាណឺម៉ាក
៩.ស្លូវេនី
១០. ហ្វាំងឡង់
១១. សាធារណរដ្ឋឆេក
១២. ជប៉ុន
១៣. ម៉ាឡេស៊ី
១៤. ហូឡង់ ស្ទួនជាមួយកាណាដា
១៥. បែលហ្ស៊ិក៕ ដកស្រង់ ៖ The Straits Times និង VnExpress
ចែករំលែកព័តមាននេះ