ទីក្រុងកៀវ៖ កាលពីព្រឹកមិញ រុស្ស៊ីវាយប្រហារទ្រង់ទ្រាយធំទៅលើរដ្ឋធានីកៀវរបស់អ៊ុយក្រែនបណ្ដាលឱ្យស្លាប់មនុស្ស១៨នាក់ និងរបួស៤៨នាក់។ នេះជាករណីដ៏កម្រដែលរុស្ស៊ីបាញ់មីស៊ីលដាក់ការិយាល័យទំនាក់ទំនងការទូតរបស់សហភាពអឺរ៉ុប។ ប្រធានកិច្ចការបរទេសនៃសហភាពអឺរ៉ុប លោកស្រីខាចា ខាឡាស់ (Kaja Kallas)…
ទីក្រុងកៀវ៖ កាលពីព្រឹកមិញ រុស្ស៊ីវាយប្រហារទ្រង់ទ្រាយធំទៅលើរដ្ឋធានីកៀវរបស់អ៊ុយក្រែនបណ្ដាលឱ្យស្លាប់មនុស្ស១៨នាក់ និងរបួស៤៨នាក់។ នេះជាករណីដ៏កម្រដែលរុស្ស៊ីបាញ់មីស៊ីលដាក់ការិយាល័យទំនាក់ទំនងការទូតរបស់សហភាពអឺរ៉ុប។ ប្រធានកិច្ចការបរទេសនៃសហភាពអឺរ៉ុប លោកស្រីខាចា ខាឡាស់ (Kaja Kallas) ប្រកាសថាលោកស្រីត្រៀមកោះហៅបេសកជនរុស្ស៊ីប្រចាំទីក្រុងប្រ៊ុចសែលទៅឆ្លើយបំភ្លឺពាក់ព័ន្ធនឹងបញ្ហានេះព្រោះវាយប្រហារលើកនេះហាក់ដូចជាសម្បើមដៃពេក។
បេសកជនជាន់ខ្ពស់របស់អ៊ុយក្រែន២នាក់ត្រៀមជួបមន្ត្រីរដ្ឋាភិបាលអាមេរិកនៅថ្ងៃសុក្រដើម្បីនិយាយអំពីការសម្របសម្រួលដោះស្រាយបញ្ហា។ អ្នកនាំពាក្យវិមានក្រឹមឡាំងថ្លែងថារុស្ស៊ីនៅតែមានចិត្តចង់ចរចាសន្តិភាពជានិច្ចទោះបីមានហេតុការណ៍វាយប្រហារទៅលើអ៊ុយក្រែនកាលពីយប់មិញ និងព្រឹកមិញក៏ដោយ។ ការវាយប្រហារនោះត្រូវបានចាត់ទុកថាជាករណីដ៏ធ្ងន់ធ្ងរមួយចាប់តាំងពីឆ្នាំ២០២២។
នៅក្នុងចំណោមជនរងគ្រោះដែលស្លាប់ក៏មានកុមារ និងមនុស្សជំទង់សរុប៤នាក់ដែលមានអាយុចន្លោះពី២ឆ្នាំដល់១៧ឆ្នាំ។ នេះបើយោងតាមលោកតៃមើ តិចឆឹនកូ (Tymur Tkachenko) ជាប្រធានរដ្ឋបាលសាលាក្រុងកៀវ។ ចំនួនអ្នកស្លាប់អាចនឹងមានជាបន្តទៀតព្រោះនៅក្នុងចំណោមអ្នករបួសទាំងនោះ អ្នកខ្លះរបួសធ្ងន់។ កងទ័ពអាកាសអ៊ុយក្រែនថ្លែងថារុស្ស៊ីបញ្ជូនដ្រូនមែនទែន និងដ្រូនក្លែងក្លាយសរុប៥៩៨គ្រឿង និងមីស៊ីល៣១គ្រាប់វាយប្រហារទីតាំងជាច្រើនកន្លែងនៅទូទាំងប្រទេសអ៊ុយក្រែន។ ប៉ុន្តែទីតាំងដែលរងការវាយប្រហារខ្លាំងជាងគេគឺរដ្ឋធានីកៀវ។
ទីតាំងយ៉ាងតិច៣៣កន្លែងនៅទូទាំងរដ្ឋធានីកៀវរងការវាយប្រហារដោយផ្ទាល់ ឬរងការខូចខាតដោយសារអំបែងគ្រាប់ធ្លាក់ត្រូវ។ កញ្ចក់បង្អួចរាប់ពាន់ផ្ទាំងត្រូវបែកខ្ចាយដោយសារអានុភាពនៃគ្រឿងផ្ទុះ។ អគារជិត១រយខ្នងរងការខូចខាត។ ផ្សារទំនើបមួយកន្លែងក៏រងការខូចខាតផងដែរ។ បុរសជនជាតិអ៊ុយក្រែនម្នាក់ឈ្មោះអូឡិចសាន់ដឺ កាហ៊ីលកូ (Oleksandr Khilko) ប្រាប់ថាបន្ទាប់ពីមីស៊ីលវាយប្រហារអគារដែលប្អូនស្រីគាត់ស្នាក់នៅមិនយូរប៉ុន្មាន គាត់ក៏ធ្វើដំណើរទៅដល់ទីនោះភ្លាម។
គាត់ស្ដាប់ឮសំឡេងមនុស្សស្រែកយ៉ាងកងរំពងនៅពេលពួកគេជាប់ផុងនៅក្នុងគំនរបាក់បែក។ មនុស្សបីនាក់ត្រូវបានគេជួយសង្គ្រោះ។ លោកអូឡិចសាន់ដឺចាត់ទុកថានេះអំពើអមនុស្សធម៌ណាស់ដែលរុស្ស៊ីវាយប្រហារជនស៊ីវិល។ នៅលើខោអាវរបស់គាត់ប្រឡាក់ប្រឡូសដោយល្អងធូលី។ គាត់ប្រាប់ថាគាត់បន់ឱ្យតែសង្គ្រាមនេះបញ្ចប់ទៅវិញឱ្យបានឆាប់ៗ។ គាត់ទន្ទឹងរង់ចាំថ្ងៃនោះមកដល់។ ប៉ុន្តែគ្រប់ពេលដែលគាត់ស្ដាប់ឮសំឡេងស៊ីរ៉ែនប្រកាសអាសន្ន គាត់មានអារម្មណ៍ភ័យព្រួយជានិច្ច។ ខាងលើនេះជាការដកស្រង់ប្រភពពីទីភ្នាក់ងារព័ត៌មានអេភី (AP) និងប្រភពដទៃទៀត៕
ចែករំលែកព័តមាននេះ