ខេត្តកំពង់ស្ពឺ៖ មុខសញ្ញាកំហែងយកម៉ូតូម្នាក់នៅក្នុងស្រុកបសេដ្ឋត្រូវបានសមត្ថកិច្ចនគរបាលឃាត់ខ្លួនបានហេីយ ខណៈដែលក្រុមជនសង្ស័យធ្វើសកម្មភាពកាន់កាំបិតផ្គាក់ ហើយធាក់ជនរងគ្រោះជាម្ចាស់ម៉ូតូបណ្តាលឱ្យដួលរងរបួស ឆ្លៀតឱកាសប្លន់យកម៉ូតូបានសម្រេចព្យាយាមរត់គេចខ្លួនបាន១សប្តាហ៍ នគរបាលស្រុកបសេដ្ឋធ្វើការស្រាវជ្រាវឃាត់ខ្លួនបាន។
ការស្រាវជ្រាវឃាត់ខ្លួនជនសង្ស័យបានម្នាក់ធ្វើឡើងកាលពីព្រឹកថ្ងៃទី២៨ ខែសីហា ឆ្នាំ២០២៥ នៅភូមិព្រៃស្រូល ឃុំពោធិអង្ក្រង ស្រុកបសេដ្ឋ ខេត្តកំពង់ស្ពឺ។
មន្ត្រីនគរបាលស្រុកបសេដ្ឋបាននិយាយឱ្យដឹងថា ជនសង្ស័យជាមុខសញ្ញាដែលឃាត់បានមានឈ្មោះ សួង ផុន ប្រុស២២ឆ្នាំមុខរបរមិនពិតប្រាកដ រស់នៅក្នុងភូមិព្រៃស្រូល ឃុំពោធិអង្ក្រង ស្រុកបសេដ្ឋ ខេត្តកំពង់ស្ពឺ។ ចំណែកម៉ូតូដែលក្រុមជនសង្ស័យធ្វើសកម្មភាពប្លន់បានសម្រេចនោះម៉ាកហុងដាសេ១២៥ស៊េរីឆ្នាំ២០២៥ ពណ៌ខ្មៅ ពាក់ផ្លាកលេខភ្នំពេញ 1LJ-0778 ម្ចាស់ម៉ូតូដែលជាជនរងគ្រោះមានឈ្មោះ អំ ចាន់ដេត ភេទប្រុស អាយុ១៨ឆ្នាំ រស់នៅក្នុងភូមិព្រៃខ្លា ឃុំទួលអំពិល ស្រុកបសេដ្ឋ ខេត្តកំពង់ស្ពឺ។
មន្ត្រីនគរបាលស្រុកបសេដ្ឋបាននិយាយបន្តថា មុននិងឈានទៅដល់ធ្វើការស្រាវជ្រាវឃាត់ខ្លួនជនសង្ស័យខាងលើគឺ ដោយអនុវត្ដតាមការដឹកនាំបញ្ជាដ៏ខ្ពង់ខ្ពស់របស់ លោកឧត្ដមសេនីយ៍ទោ ឃឹម សុកខៃ ស្នងការនគរបាលខេត្ដកំពង់ស្ពឺ រួចមកលោកវរសេនីយ៍ឯក ចន សុភីត អធិការនគរបាលស្រុកបសេដ្ឋ បានដឹកនាំប្រតិបត្ដិការចុះស្រាវជ្រាវករណីកំហែង(ធាក់យកម៉ូតូ) ដោយមានកាំបិតផ្គាក់ផងនោះ កាលពីវេលាម៉ោង៨និង៣០យប់ ថ្ងៃទី១៩ ខែសីហា ឆ្នាំ២០២៥កន្លងទៅ នៅលើកំណាត់ផ្លូវជាតិលេខ៣ ចន្លោះបង្គោលគីឡូម៉ែត្រលេខ៥៩~ទៅលេខ៦០ ស្ថិតនៅក្នុងភូមិត្រពាំងទំនាប់ ឃុំទួលអំពិល ស្រុកបសេដ្ឋ ខេត្តកំពង់ស្ពឺ ។
មន្ត្រីនគរបាលស្រុកបសេដ្ឋបានបន្ថែមថា÷ បើយោងតាមដំណេីរអង្គហេតុមានជនសង្ស័យមិនស្គាល់អត្តសញ្ញាណ០១ក្រុមជិះម៉ូតូម៉ាកហុងដាសេ១២៥ {C125 } ពណ៌ខ្មៅ មិនស្គាល់ស្លាកលេខ តាមពីក្រោយជនរងគ្រោះឈ្មោះ អំ ចាន់ដេត ភេទប្រុស អាយុ១៨ឆ្នាំ រស់នៅភូមិព្រៃខ្លា ឃុំទួលអំពិល ស្រុកបសេដ្ឋ ជិះម៉ូតូម៉ាកហុងដាC125ឆ្នាំស៊េរីឆ្នាំ២០២៥ ពណ៌ខ្មៅ ពាក់ផ្លាកលេខភ្នំពេញ 1LJ-0778 បានធ្វើសកម្មភាពធាក់ជនរងគ្រោះចំនួន០១ជើងបណ្ដាលឱ្យជនរងគ្រោះ ដួលរបួសដៃនិងជើងរួចក្រុមជនសង្ស័យបានលើកម៉ូតូរបស់ជនរងគ្រោះជិះគេចខ្លួនតាមបណ្តោយផ្លូវជាតិលេខ៣ឆ្ពោះទៅទិសខាងត្បូងបាត់ទៅ ដោយបន្សល់ទុកកាំបិតផ្គាកចំនួន០២ដើម។ ពេលនោះជនរងគ្រោះក៏បានមកដាក់ពាក្យបណ្តឹងនៅប៉ុស្តិនគរបាលរដ្ឋបាល ដើម្បីអន្តរាគមន៍ស្រាវជ្រាវ។
មន្ត្រីនគរបាលស្រុកបសេដ្ឋបានបញ្ជាក់ថា÷ ក្រោយពីទទួលបានពាក្យបណ្តឹងបសមត្ថកិច្ចបានអន្ដរាគមន៍ និងធ្វើការស្រាវជ្រាវ លុះដល់ព្រឹកថ្ងៃទី២៨ ខែសីហា ឆ្នាំ២០២៥ នគរបាល ឈានទៅឃាត់ខ្លួនជនសង្ស័យឈ្មោះ សួង ផុន ភេទប្រុស អាយុ២២ឆ្នាំមុខរបរមិនពិតប្រាកដ រស់នៅភូមិព្រៃស្រូល ឃុំពោធិអង្ក្រង ស្រុកបសេដ្ឋ យកមកសួរនាំ។
ចំពោះម៉ូតូជនរងគ្រោះ សមត្ថកិច្ចនគរបាលបានប្រគល់ជូនជនរងគ្រោះម្ចាស់ដើមយកទៅប្រេីវិញហើយ។
ចំណែកជនសង្ស័យត្រូវបានបញ្ជូនទៅកាន់អធិការដ្ឋាននគរបាលស្រុកបសេដ្ឋសួរនាំ ដើម្បីកសាងសំណុំរឿងបញ្ជូនបន្តចាត់ការតាមផ្លូវច្បាប់៕
ចែករំលែកព័តមាននេះ