ខេត្តស្វាយរៀង៖ក្រុមហ៊ុនសុខគន្ធា រងការរិះគន់ពីប្រជាពលរដ្ឋឃុំកំពង់ត្រាចដោយចោទក្រុមហ៊ុននេះថា ទទួលការជួសជុលផ្លូវក្រាលក្រួសក្រហម ប្រវែង៣,៥០០ម៉ែត្រ ប្រែក្លាយទៅជាផ្លូវក្រាលដីឥដ្ឋបង្កឲ្យពិបាកក្នុងការធ្វើដំណើរយ៉ាងខ្លាំងជាពិសេសសិស្សានុសិស្សធ្វើដំណើរទៅរៀនសូត្រ រអឹលនិងស្អិតជាប់កង់ ម៉ូតូ។ប្រជាពលរដ្ឋលើកឡើងនេះកើតឡើងនៅព្រឹកថ្ងៃទី២៨សីហា២០២៥នៅភូមិតាត្រាវឃុំកំពង់ត្រាចស្រុករមាសហែក។
បើតាមប្រជាពលរដ្ឋបានលើកឡើងថា ភូមិតាត្រាវ ទទួលបានគម្រោងជួសជុលផ្លូវក្រាលក្រួសក្រហម១ខ្សែ ទទឹង៤ម៉ែត្របណ្តោយ៣,៥០០ម៉ែត្រ ដោយប្រើថវិកាមូលនិធិឃុំសង្កាត់ចំនួន១១៩,៦៨៩,៥០០រៀល។លទ្ធផលគឺក្រុមហ៊ុនសុខ គន្ធា ជាអ្នកទទួលការអនុវត្តគម្រោង ក៏បន្តែអ្វីដែលប្រជាពលរដ្ឋហួសចិត្តនោះគឺក្រុមហ៊ុនបានយកដីឥដ្ឋមកចាក់ពង្រាយ ដោយមិនបានឈុសឆាយនិងកិន ពង្រាបតាមបច្ចេកទេសទេ រយៈពេលកន្លះខែស្រាប់តែក្រុមហ៊ុនលើកផ្លាកគម្រោងបញ្ចប់គម្រោងទើបប្រជាពលរដ្ឋផ្ទុះការរិះគន់។
បើតាមព្រឹទ្ធាចារ្យម្នាក់បានលើកឡើងថា ផ្លូវលំមួយខ្សែនេះពីដើមឡើយតូចពិបាកការធ្វើដំណើរទើបស្នើសុំ ក្រុមប្រឹក្សាឃុំកំពង់ត្រាចជួសជុល លោកមេឃុំក៏បានស្នើសុំឲ្យប្រជាពលរដ្ឋភូមិតាត្រាវ ដែលរស់នៅអមបណ្តោយផ្លូវលំនេះបរិចាកដីលំនៅឋាន ទទឹង១មែត្រកន្លះ គឺម្ខាង១ម៉ែត្រកន្លះ ដើម្បីបានទទឹងផ្លូវ៦ម៉ែត្រ ប្រជាពលរដ្ឋត្រេកអរ ជាខ្លាំងបាននាំគ្នាបរិចាកដើម្បីបានផ្លូវធ្វើដំណើរ មិននឹកស្មានថា ក្រុមហ៊ុនយកដីឥដ្ឋ មកចាក់ពីលើពង្រាយបង្កឲ្យកាន់តែពិបាកខ្លាំងដោយពេលភ្លៀងមកបែកល្បាប់ដីស្អិតហើយរអឹល ពិបាកធ្វើដំណើរយ៉ាងខ្លាំង។
ទាក់ទិនករណីនេះដែរ លោកមេឃុំកំពង់ត្រាច បានមានប្រសាសន៍ ប្រាប់អ្នកសារព័ត៌មានយើងថា ភូមិតាត្រាវ ទទួលបានគម្រោងជួសជុលផ្លូវដីក្រាលក្រួសក្រហមមួយខ្សែ ប្រវែង៣,៥០០ម៉ែត្រ ទទឹង៤ម៉ែត្រ ក្រួសក្រហមកម្រាស់០,១៥ម៉ែត្រ ដោយប្រើថវិកាចំនួន១១៩,៦៨៩,៥០០រៀលនិងធ្វើស្លាកគម្រោង១ ។ បានដាក់ឲ្យដេញថ្លៃ លទ្ធផលបានទៅលើក្រុមហ៊ុនសុខគន្ធា ទទួលការ ហើយបានអនុវត្តគម្រោង ក៏ប៉ុន្តែបានដឹកអាចម៌ដីមកចាង់ពង្រាយរួចមិនទាន់ឃើញយកគ្រឿងចក្រមកឈុសឆាយនិងកៀរ កិនពង្រាបផង ស្រាប់តែប្រជាពលរដ្ឋរាយការណ៍ថា ក្រុមហ៊ុនបានដកគ្រឿងចក្រទៅបាត់ រហូតមកដល់ថ្ងៃទី២៦សីហា២០២៥(គឺកន្លះខែ)ស្រាប់តែក្រុមហ៊ុនបានយកស្លាកគម្រោងមកដាក់បង្កឲ្យប្រជាពលរដ្ឋមានការងឿងឆ្ងល់ហើយរាយការណ៍ថា ផ្លូវលំ១ខ្សែនេះប្រជាពលរដ្ឋមិនអាចទទួលយកបានទេ។
លោកមេឃុំបន្តទៀតថា លោកក៏បានដឹកនាំក្រុមប្រឹក្សាឃុំនិងលោកមេភូមិចុះទៅពិនិត្យមើល ឃើញថា ផ្លូវ១ខ្សែនេះសាងសង់ ពុំត្រឹមត្រូវតាមកិច្ចសន្យា ទេគឺក្នុងកិច្ចសន្យា ផ្លូវក្រាលក្រួសក្រហមកម្រាស់០,១៥ម៉ែត្រ ដូច្នេះឃុំមិនអាចទទួលយកបានទេ ដោយសារផ្លូវពិបាកធ្វើដំណើរទើបលើកគម្រោងសាងសង់ផ្លូវថ្មី ដោយគម្រោងអភិវឌ្ឍន៍ផ្លូវ១ខ្សែនេះជាផ្លូវបេតុងនៅពេលអនាគត់ ដោយផ្លូវ១ខ្សែនេះគឺជាផ្លូវសិស្សានុសិស្សក្នុងឃុំកំពង់ត្រាចធ្វើដំណើរមករៀននៅវិទ្យាល័យរមាសហែកនេះ គឺឆ្នាំ២០២៥ ជួសជុលផ្លូវក្រួសក្រហម ឆ្នាំ២០២៦ ក្រាលថ្មបំបែក ដល់ឆ្នាំ២០២៧ គម្រោងចាក់បេតុង។
លោកមេឃុំមានប្រសាន៍ទៀតថា ក្រោយពីមានការពិនិត្យលោកបានទូរសព្ទ័ សួរទៅលោកស្រីសុខគន្ធា ប្រធានក្រុមហ៊ុនសុខគន្ធា បានឆ្លើយថា ផ្លូវនេះធ្វើមិនទាន់ហើយទេ ក៏ប៉ុន្តែសុំដាក់ស្លាកគម្រោងសិន ដោយបច្ចុប្បន្នមានភ្លៀងធ្លាក់មិនអាចយកគ្រឿងចក្រចូលបាន ចាំរាំងភ្លៀងទើបអនុវត្តបន្ត ម្យាងប្តីរបស់គាត់មានជម្ងឺ ទៅសម្រាកព្យាបាលនៅឯមន្ទីរពេទ្យកាលម៉ែត្ររាជធានីភ្នំពេញសូមផ្អាកមួយរយៈសិន។លោកមេឃុំបានបញ្ជាក់ថា បើក្រុមហ៊ុនមិនមកអនុវត្តគម្រោងតាមបច្ចេកទេសនៃកិច្ចសន្យាទេ ឃុំក៏មិនទាន់បើកប្រាក់ឲ្យដែរ។
ទាក់ទិនករណីនេះដែរ មិនអាចរកការបំភ្លឺពីក្រុមហ៊ុនសុខគន្ធាបានទេរហូតដល់ល្ងាចថ្ងៃទី២៨សីហានេះ ។
ព័ត៌មានលម្អិតនឹងមានផ្សាយនៅលើទំព័រកាសែតកោះសន្តិភាព ៕
ចែករំលែកព័តមាននេះ