រាជធានីភ្នំពេញ ៖ ផ្ទះប៉ះកង់រថយន្ត និងទិញ-លក់ប្រេងមួយកន្លែង ត្រូវបានអគ្គិឆាបឆេះសន្ធោសន្ធៅ និងមានផ្សែងខ្មៅឃ្មួលខ្មាញ់ហុយឡើងកប់អាកាសវេហាស៍ បណ្ដាលមកពីឧប្បត្តិហេតុចរន្តអគ្គិសនី ចេញពីបង្គោលភ្លើង នៅជាប់ផ្ទះខាងលើនោះ ។…
រាជធានីភ្នំពេញ ៖ ផ្ទះប៉ះកង់រថយន្ត និងទិញ-លក់ប្រេងមួយកន្លែង ត្រូវបានអគ្គិឆាបឆេះសន្ធោសន្ធៅ និងមានផ្សែងខ្មៅឃ្មួលខ្មាញ់ហុយឡើងកប់អាកាសវេហាស៍ បណ្ដាលមកពីឧប្បត្តិហេតុចរន្តអគ្គិសនី ចេញពីបង្គោលភ្លើង នៅជាប់ផ្ទះខាងលើនោះ ។
ហេតុការណ៍នោះបានកើតឡើង បង្កឲ្យមានការភ្ញាក់ផ្អើលកាលពីវេលាម៉ោង១២និង៣០នាទីថ្ងៃត្រង់ថ្ងៃទី៣១ ខែធ្នូ ឆ្នាំ២០២៥ ស្ថិតនៅក្នុងភូមិព្រះពុទ្ធ ឃុំក្រាំងទ្រា ស្រុកកណ្ដាលស្ទឹង ខេត្តកណ្ដាល ជាប់មហាវិថី ស៊ី ជីនពីង ហៅផ្លូវក្រវាត់ក្រុងទី៣ ។
សមត្ថកិច្ចបានប្រាប់ថា ផ្ទះដែលរងការឆាបឆេះនោះសាងសង់អំពីដែក ទំហំ៣០ម៉ែត្រគុណនឹង១០ម៉ែត្រ បិទបាំងជញ្ជាំង និងប្រក់ដំបូលស័ង្កសី ជាទីតាំងប៉ះ និងដូរសំបកកង់រថយន្តតូចធំគ្រប់ប្រភេទ ព្រមទាំងមានទិញ-លក់ប្រេងផងដែរ ។ ម្ចាស់នេះ ឈ្មោះ ផាត់ ផា អាយុ៣៩ឆ្នាំ ហើយផ្ទះនោះត្រូវបានភ្លើងឆេះទាំងស្រុង ប៉ុន្តែមិនបានបណ្ដាលឲ្យម្ចាស់ផ្ទះ ឬអ្នកផ្សេងណាម្នាក់រងរបួសនោះឡើយ ហើយក៏មិនបានឆេះរាលដល់ផ្ទះអ្នកដទៃដែរ ព្រោះផ្ទះនេះសង់នៅក្នុងដីឡូត៌ ដាច់ដោយឡែកពីគេឯង ។
ម្ចាស់ផ្ទះបានប្រាប់សមត្ថកិច្ចថា នៅវេលាកើតហេតុ មានហេតុការណ៍ឆ្លងចរន្តអគ្គិសនីចេញពីបង្គោលភ្លើង នៅជាប់ផ្ទះគាត់នោះ ហើយក៏បានឆាបឆេះដល់ប្រេង និងសំបកកង់រថយន្តនៅក្នុងផ្ទះយ៉ាងឆាប់រហ័ស ។ នៅពេលដឹងថា មានភ្លើងឆេះភ្លាម គាត់បាននាំគ្នាពន្លត់ភ្លើងដែរ ប៉ុន្តែពន្លត់អត់ឈ្នះសោះ ដោយកាន់តែពន្លត់ភ្លើង បានឆេះកាន់តែខ្លាំងឡើងៗ មិនបានថមថយទេ ហើយក៏មិនអាចយករបស់អ្វីចេញទាន់ដែរ ព្រោះភ្លើងឆេះខ្លាំងពេក ។
សមត្ថកិច្ច បានប្រាប់បន្ថែមថា ក្រោយពេលទទួលបានដំណឹងនោះភ្លាម កម្លាំងអាជ្ញាធរ និងសមត្ថកិច្ចមូលដ្ឋានបានចេញអន្តរគមន៍ ចំណែករថយន្តពន្លត់អគ្គិភ័យជាង១០គ្រឿង រួមទាំងអ្នកពន្លត់អគ្គិភ័យជាច្រើននាក់ មកពីបណ្ដាអង្គភាព និងក្រុមហ៊ុនឯកជានានា បានចេញទៅកាន់ទីនោះ ។
ក្រុមអ្នកពន្លត់ភ្លើងបានពន្លត់រហូតរលត់ទៅវិញទាំងស្រុង ប៉ុន្តែផ្ទះខាងលើរួមទាំងសម្ភារៈទាំងអស់បានក្លាយទៅជាចំណីព្រះអគ្គិអស់ទាំងស្រុងបាត់ទៅហើយ ៕
ចែករំលែកព័តមាននេះ