ខេត្តបាត់ដំបង៖ អតីតយុទ្ធជន ៤០គ្រួសារ នៅខេត្តបាត់ដំបង ទទួលបានផ្ទះ និងដី ​ពី​រាជរដ្ឋាភិបាល តាមរយៈសមាគមអតីតយុទ្ធជនកម្ពុជា។

យោងតាមរដ្ឋបាលខេត្តបាត់ បានឱ្យដឹងថានៅថ្ងៃ​ទី២៨ ខែសីហា ឆ្នាំ២០២៥ នេះ ​ ឯកឧត្តមកិត្តិសង្គហបណ្ឌិត គន់ គីម ទេសរដ្ឋមន្រ្តី អនុប្រធាន និងជាអគ្គលេខាធិការសមាគមអតីតយុទ្ធជនកម្ពុជា​បានអញ្ជើញជាអធិបតីក្នុងពិធីបើកការដ្ឋានស្ថាបនាផ្លូវ សម្ពោធដាក់ឱ្យប្រើប្រាស់ស្រះទឹក ប្រគល់ផ្ទះនិងដីឡូត៍ដែលជាអំណោយដ៏ថ្លៃថ្លារបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី និងជាអនុប្រធានទី១ សមាគមអតីតយុទ្ធជនកម្ពុជាជូនអតីតយុទ្ធជន​ ជូន អតីតយុទ្ធជន​ ចំនួន៤០គ្រួសារ នៅតំបន់ដីសម្បទានសង្គមកិច្ចក្នុងភូមិគោករកា ឃុំដូនបា ស្រុកគាស់ក្រឡ ខេត្តបាត់ដំបង។

ពិធីនេះមានអញ្ជើញចូលរួមពី​អ្នកពាក់ព័ន្ធ និងអតីតយុទ្ធជនសរុបចំនួន ៣៥០នាក់។

ក្នុងឱកាសនោះ​ ឯកឧត្តមកិត្តិសង្គហបណ្ឌិត គន់ គីម បាននាំយកនូវប្រសាសន៍ផ្ដាំផ្ញើសាកសួរសុខទុក្ខនិងសេចក្ដីនឹករលឹកពីសម្ដេចតេជោ ហ៊ុន សែន និងសម្ដេចកិត្តិព្រឹទ្ធបណ្ឌិត,សម្ដេចធិបតី ហ៊ុន ម៉ាណែត និងលោកជំទាវបណ្ឌិត ជូនដល់អតីតយុទ្ធជន។

ឯកឧត្តម បានណែនាំដល់អតីតយុទ្ធជនត្រូវខិតខំដាំដុះបង្កបង្កើនផល និងចិញ្ចឹមសត្វដើម្បីផ្គត់ផ្គង់ជីវភាពរស់នៅប្រចាំថ្ងៃ។

ជាមួយគ្នានោះ អតីតយុទ្ធជន បានថ្លែងអំណរគុណចំពោះសម្ដេចតេជោ ហ៊ុន សែន និងសម្ដេចធិបតី ហ៊ុន ម៉ាណែត ដែលបានផ្ដល់ផ្ទះនិងដីព្រមទាំងបានផ្ដល់ការយកចិត្តទុកដាក់គ្រប់បែបយ៉ាងចំពោះអតីតយុទ្ធជនតាំងពីដើមរហូតមកដល់ពេលបច្ចុប្បុន្ននេះ។

សូមជម្រាបថា បច្ចុប្បន្នអតីតយុទ្ធជននៅក្នុងខេត្តបាត់ដំបង មានជាង១៤.០០០នាក់ ក្នុងនោះបានចូលជាសមាជិកសមាគមអតីតយុទ្ធជនកម្ពុជាចំនួនជាង១១.៨០០នាក់ ដោយទទួលបានការយកចិត្តទុកដាក់ខ្ពស់ពីរាជរដ្ឋាភិបាលកម្ពុជា។ អតីតយុទ្ធជនចំនួន១០៤គ្រួសារបានទទួលផ្ទះចំនួន១០៤ខ្នងផ្ទះលើដីសម្បទានសង្គមកិច្ចនៅស្រុកគាស់ក្រឡ ដែលជាអំណោយដ៏ថ្លៃថ្លារបស់សម្តេចអគ្គមហាសេនាបតីតេជោ ហ៊ុន សែន និងនៅថ្ងៃនេះអតីតយុទ្ធជនចំនួន៤០គ្រួសារបន្ថែមទៀតបានទទួលផ្ទះ និងដីឡូត៍ដែលជាអំណោយដ៏ថ្លៃថ្លារបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី និងជាអនុប្រធានទី១ សមាគមអតីតយុទ្ធជនកម្ពុជា៕
​