ខេត្តស្វាយរៀង ៖ មានករណីជនបរទេសបាញ់ប្រហារគ្នាយ៉ាងសាហាវបណ្តាលឲ្យស្លាប់បុរសម្នាក់ និងរបួសធ្ងន់២នាក់ ចំណែកជនសង្ស័យបានរត់ឡើងជិះរថយន្តម៉ាកព្រូស ដើម្បីគេចខ្លួន ខណៈកំពុងបើករត់គេចខ្លួនទៅដល់ចំណុចខាងត្បូងសាលាក្រុងបាវិតរថយន្តបានបែកកង់ទៅមុខលែងរួចក៏ចុះទៅភ្ជង់ប្លន់យករថយន្តដឹកទំនិញជិះគេចខ្លួនបន្ត។
ករណីជនបរទេសបាញ់ប្រហាគ្នានេះកើតឡើងនៅវេលាម៉ោង៧និង៥នាទីយប់ថ្ងៃទី២៧សីហា២០២៥ស្ថិតនៅភូមិបាវិតកណ្តាលសង្កាត់បាវិតក្រុងបាវិត។
ទាក់ទិនករណីនេះដែរសមត្ថកិច្ចមិនទាន់ផ្តល់ព័ត៌មានជាក់លាក់ទេ គ្រាន់តែប្រាប់អ្នកសារព័ត៌មានយើងថា ជនរងគ្រោះស្លាប់ម្នាក់ និងរបួសធ្ងន់២នាក់ ជាជនបរទេសមិនទាន់ដឹងថា ជាជនជាតិចិនឬជនជាតិវៀតណាមទេ សមត្ថកិច្ចកំពុងធ្វើការ ដោយមានជនបរទេសនៅក្នុងអាគារ៦ទៅ៧នាក់ទៀតត្រូវឃាត់ខ្លួនយកទៅសាកសួរ។
បន្ទាប់ពីហេតុការផ្ទុះអាវុធ សមត្ថកិច្ចបានហៅរថយន្តសាមុយដឹកជនរងគ្រោះ២នាក់រងរបួសយកទៅមន្ទីរពេទ្យដើម្បីសង្គ្រោះ។ចំណែកសពជនរងគ្រោះគេឃើញជនបរទេសលើកដាក់លើរថយន្តពណ៌ខ្មៅ១គ្រឿងបម្រុងដឹកចេញក៏ប៉ុន្តែត្រូវសមត្ថកិច្ចទៅដល់ធ្វើការឃាត់ខ្លួនជនសង្ស័យម្នាក់ យកទៅសាកសួរ ចំណែកជនដៃដល់០៣នាក់ដែលរត់គេចខ្លួនរហូតមកដល់រសៀលថ្ងៃទី២៩សីហានេះ មិនទាន់ដឹងថា ចាប់បានឬយ៉ាងណាដែរ សមត្ថកិច្ចមិនទាន់ផ្តល់ព័ត៌មាននៅឡើយ ។
ក៏ប៉ុន្តែព័ត៌មានក្រៅផ្លូវការប្រាប់ថា ជាជនជាតិចិន ចំណែកមូលហេតុនាំឲ្យបាញ់ប្រហារគ្នានេះក៏មិនទាន់ដឹងដែរ ។
មហាជនដែលនៅក្បែកន្លែងកើតហេតុ ប្រាប់ថាឮស្នូរបាញ់ចំនួន៥នៅ៦គ្រាប់ កាំភ្លើងខ្លី មិនស្គាល់ម៉ាក ៕
ចែករំលែកព័តមាននេះ