ប្រទេសប្រេស៊ីល ៖ ទីភ្នាក់ងារព័ត៌មាន AFP បានរាយការណ៍កាលពីថ្ងៃទី២៨ ខែសីហា ឆ្នាំ២០២៥ ថា រដ្ឋាភិបាលប្រេស៊ីលកំពុងពិចារណាអនុវត្តវិធានការពាណិជ្ជកម្មសងសឹកប្រឆាំងនឹងសហរដ្ឋអាមេរិក រួមទាំងពន្ធគយ…
ប្រទេសប្រេស៊ីល ៖ ទីភ្នាក់ងារព័ត៌មាន AFP បានរាយការណ៍កាលពីថ្ងៃទី២៨ ខែសីហា ឆ្នាំ២០២៥ ថា រដ្ឋាភិបាលប្រេស៊ីលកំពុងពិចារណាអនុវត្តវិធានការពាណិជ្ជកម្មសងសឹកប្រឆាំងនឹងសហរដ្ឋអាមេរិក រួមទាំងពន្ធគយ បន្ទាប់ពីលោកប្រធានាធិបតី ដូណាល់ ត្រាំ (Donald Trump) បានសម្រេចដាក់ពន្ធខ្ពស់ដល់ ៥០% លើទំនិញនាំចូលជាច្រើនពីប្រទេសប្រេស៊ីល។
ប្រភពចំនួនពីរដែលសិ្នទ្ធនឹងរឿងនេះ បានបង្ហើបថា ប្រធានាធិបតីប្រេស៊ីល លោក ល្វីស អ៊ីណាស៊ីយ៉ូ លូឡា ដាស៊ីលវ៉ា (Luiz Inacio Lula da Silva) បានផ្តល់ភ្លើងខៀវសម្រាប់ទីភ្នាក់ងារពាក់ព័ន្ធ ដើម្បីសិក្សាពីសកម្មភាពសងសឹកដែលអាចនឹងកើតមាន។ ជាមួយគ្នានោះ ក្រសួងពាណិជ្ជកម្ម និងឧស្សាហកម្មប្រេស៊ីលនឹងមានពេល៣០ថ្ងៃ ដើម្បីកំណត់ថាតើពន្ធរបស់អាមេរិកបានរំលោភលើច្បាប់ស្តីពីសមភាពសេដ្ឋកិច្ច ដែលប្រទេសប្រេស៊ីលបានអនុម័តកាលពីខែមេសាកន្លងទៅដែរឬទេ? បើដូច្នេះមែន ក្រុមអ្នកជំនាញនឹងស្នើវិធានការតបត ដែលអាចរួមបញ្ចូលការដាក់ពន្ធស្រដៀងគ្នាលើទំនិញពីអាមេរិកចូលមកប្រេស៊ីល។
ប្រភពដដែលបានបន្តថា ប្រេស៊ីលនឹងជូនដំណឹងជាផ្លូវការដល់អាមេរិកនៅថ្ងៃទី២៩ ខែសីហា ឆ្នាំ២០២៥ អំពីការសម្រេចចិត្តរបស់ខ្លួន ដើម្បីពិចារណាវិធានការសងសឹក ដោយមកជាមួយការបញ្ជាក់ថា ការពិគ្រោះយោបល់ការទូតដើម្បីដោះស្រាយបញ្ហា នៅតែបើកចំហ។
យោងច្បាប់ស្តីពីសមភាពសេដ្ឋកិច្ចអនុញ្ញាតឱ្យរដ្ឋាភិបាលប្រេស៊ីលអនុវត្តវិធានការតបត ចំពោះប្រទេសណាមួយដែលធ្វើសកម្មភាពជាឯកតោភាគីប៉ះពាល់ដល់ការប្រកួតប្រជែងរបស់ប្រទេសប្រេស៊ីល។ វិធានការទាំងនោះអាចរួមបញ្ចូលការផ្អាកសម្បទានពាណិជ្ជកម្ម ការវិនិយោគ ឬកិច្ចព្រមព្រៀងកម្មសិទ្ធិបញ្ញា ដែលត្រូវបានមើលឃើញថាជាមធ្យោបាយចុងក្រោយក្នុងករណីមានការបរាជ័យនៃការចរចាទ្វេភាគី ឬពហុភាគី។
ទំនាក់ទំនងរវាងអាមេរិក និងប្រេស៊ីលបានជាប់គាំង ចាប់តាំងពីការដាក់ពន្ធ ៥០% លើកាហ្វេ និងផលិតផលប្រេស៊ីលជាច្រើនផ្សេងទៀត បានចូលជាធរមានកាលពីថ្ងៃទី៦ ខែសីហា កន្លងទៅ។ ប្រធានាធិបតីប្រេស៊ីលបានលើកឡើងថា អាមេរិកមិនបានអើពើនឹងការត្អូញត្អែររបស់ប្រេស៊ីលនោះទេ ដោយលោកបានអះអាងថា «យើងមិនអាចនិយាយជាមួយនរណាម្នាក់ពីភាគីអាមេរិកបាននោះទេ»។
បច្ចុប្បន្នប្រេស៊ីលនាំចូលផលិតផលឧស្សាហកម្មជាច្រើនពីអាមេរិក រួមទាំងគ្រឿងម៉ាស៊ីន ម៉ាស៊ីនស្វ័យប្រវត្តិ និងគ្រឿងបន្លាស់សម្រាប់ឧស្សាហកម្មអវកាស។ ដោយលើកឡើងពីហេតុផលនៃការដំឡើងពន្ធធ្ងន់ធ្ងរលើប្រេស៊ីល លោក ត្រាំ បាននិយាយថា ការសម្រេចចិត្តនេះ ដើម្បីឆ្លើយតបនឹងការប្រមាញ់មេធ្មប់ប្រឆាំងនឹងអតីតប្រធានាធិបតីប្រេស៊ីលស្តាំនិយម លោក ហ្សាអៀរ បុលសូណារ៉ូ (Jair Bolsonaro) ដែលជាសម្ព័ន្ធមិត្តជិតស្និទ្ធរបស់មេដឹកនាំអាមេរិក បច្ចុប្បន្នកំពុងតែស្ថិតក្រោមការកាត់ទោសពីបទរៀបចំផែនការធ្វើរដ្ឋប្រហារ។
ជាមួយសង្គ្រាមពាណិជ្ជកម្មជាមួយអាមេរិក ប្រទេសប្រេស៊ីលកាលពីដើមខែនេះ ក៏បានស្នើទៅអង្គការពាណិជ្ជកម្មពិភពលោក ហៅកាត់ថា WTO សម្រាប់ជំនួយក្នុងការដោះស្រាយជម្លោះលើពន្ធ ៥០% ដែលអាមេរិកដាក់លើទំនិញរបស់ខ្លួនផងដែរ៕ ដកស្រង់ ៖ Tuoi Tre
ចែករំលែកព័តមាននេះ