ប្រទេសថៃ ៖ ឧស្សាហកម្មសណ្ឋាគាររបស់ប្រទេសថៃ ត្រូវបានរំពឹងថានឹងឃើញការធ្លាក់ចុះជាលើកដំបូងក្នុងរយៈពេល៥ឆ្នាំ ដោយអ្នកស្រាវជ្រាវទីផ្សារពីមជ្ឈមណ្ឌលស្រាវជ្រាវថៃ Kasikorn ដែលបានព្យាករណ៍ថា ប្រាក់ចំណូលនឹងធ្លាក់ចុះ ៤,៥% សម្រាប់ឆ្នាំ…
ប្រទេសថៃ ៖ ឧស្សាហកម្មសណ្ឋាគាររបស់ប្រទេសថៃ ត្រូវបានរំពឹងថានឹងឃើញការធ្លាក់ចុះជាលើកដំបូងក្នុងរយៈពេល៥ឆ្នាំ ដោយអ្នកស្រាវជ្រាវទីផ្សារពីមជ្ឈមណ្ឌលស្រាវជ្រាវថៃ Kasikorn ដែលបានព្យាករណ៍ថា ប្រាក់ចំណូលនឹងធ្លាក់ចុះ ៤,៥% សម្រាប់ឆ្នាំ ២០២៥។
តាមរបាយការណ៍ថ្មីៗនេះ ដែលដកស្រង់ដោយសារព័ត៌មានថៃ The Nation បានឱ្យដឹងថា ការធ្លាក់ចុះនេះ បណ្តាលមកពីការធ្លាក់ចុះចំនួនភ្ញៀវទេសចរអន្តរជាតិ អត្រាស្នាក់នៅទាប និងប្រាក់ចំណូលពីសេវាកម្មបន្ថែម។ ចំនួនភ្ញៀវអន្តរជាតិត្រូវបានរំពឹងថានឹងធ្លាក់ចុះ ៩% នៅឆ្នាំនេះ ដែលការមកដល់ពីភ្ញៀវបរទេសអាចឈានដល់ប្រហែល ៣២,២លាននាក់ ខណៈដែលរយៈពេលជាមធ្យមនៃការស្នាក់នៅសម្រាប់ភ្ញៀវបរទេស ក៏ត្រូវបានព្យាករណ៍ថានឹងថយចុះផងដែរ។
អំឡុងពេល៧ខែដំបូងនៃឆ្នាំនេះ អត្រាស្នាក់នៅសណ្ឋាគារនៅទូទាំងប្រទេសថៃមានចំនួន ៧១,៦៦% ពោលធ្លាក់ចុះ ០,២% បើធៀបនឹងរយៈពេលដូចគ្នា កាលពីឆ្នាំមុន។ ស្របពេលដែលអត្រាស្នាក់នៅពេញ១ឆ្នាំ ត្រូវបានរំពឹងថានឹងធ្លាក់ចុះ ២,៣% មកនៅត្រឹមប្រហែល ៦៩,៨៣% ខណៈអត្រាស្នាក់នៅជាមធ្យម ក៏ត្រូវបានរំពឹងថានឹងធ្លាក់ចុះ ៤% សម្រាប់ឆ្នាំនេះ បន្ទាប់ពីមានការធ្លាក់ចុះ ៥% ក្នុងរយៈពេល៧ខែដំបូង។
ប្រាក់ចំណូលបានមកពីព្រឹត្តិការណ៍កម្សាន្ត កិច្ចប្រជុំ ព្រមទាំងសិក្ខាសាលាក៏បានធ្លាក់ចុះ ដោយសារតែព្រឹត្តិការណ៍អន្តរជាតិ និងការប្រគុំតន្ត្រីតិចជាង បើធៀបនឹងឆ្នាំមុន។ នៅក្នុងឆមាសទី១ ទាំងកិច្ចប្រជុំ និងសិក្ខាសាលាក្នុងស្រុក និងអន្តរជាតិមានការថយចុះដល់ទៅ ១៣%។
ក្តីបារម្ភមួយផ្សេងទៀត គឺការកើនឡើងថ្លៃដើម។ ប្រតិបត្តិករសណ្ឋាគារកំពុងប្រឈមមុខនឹងការកើនឡើងតម្លៃប្រតិបត្តិការរបស់ខ្លួន ជាពិសេសដោយសារតែការកើនឡើងនៃប្រាក់ឈ្នួលពលកម្ម។ ស្របពេលដែលទីផ្សារទេសចរណ៍ធ្លាក់ចុះ និងការប្រកួតប្រជែងដ៏ខ្លាំងក្លា បានបន្ថែមវិបត្តិទៅលើការតស៊ូផ្នែកហិរញ្ញវត្ថុរបស់ពួកគេផងដែរ។
មជ្ឈមណ្ឌល Kasikorn បានបង្ហាញថា អាជីវកម្មដែលពឹងផ្អែកលើភ្ញៀវទេសចរអន្តរជាតិ តាមគោលដៅសំខាន់ៗដូចជា ទីក្រុងបាងកក ឈុនបូរី សុងក្លា និងឈៀងម៉ៃ ជាពិសេសសេវាបម្រើភ្ញៀវមកពីតំបន់អាស៊ីបូព៌ា ទំនងជាប្រឈមនឹងផលប៉ះពាល់ខ្លាំងជាងមុន។ សណ្ឋាគារនៅតាមតំបន់ព្រំដែនដូចជា ខេត្តស្រះកែវ និងអ៊ូប៊ុនរ៉ាត់ថានី នឹងរងផលប៉ះពាល់ដោយភាពតានតឹងនៅតាមបណ្តោយព្រំដែនកម្ពុជា-ថៃ។ ទោះយ៉ាងណាក៏ដោយ ខេត្តមួយចំនួនត្រូវបានរំពឹងថានឹងបន្តកើនឡើង ពិសេសខេត្តដែលទាក់ទាញភ្ញៀវទេសចរក្នុងស្រុកដូចជា Kanchanaburi, Phang Nga, Nakhon Si Thammarat, Nakhon Ratchasima និង Nakhon Phanom។
របាយការណ៍បន្ថែមថា វាមានសារៈសំខាន់កាន់តែខ្លាំងឡើង សម្រាប់បណ្តាសណ្ឋាគារ ដើម្បីផ្លាស់ប្តូរទៅកាន់គំរូអាជីវកម្មប្រកបដោយនិរន្តរភាពបន្ថែមទៀត ដែលនឹងអនុញ្ញាតឱ្យពួកគេបំពេញតាមការរំពឹងទុកកើនឡើងនៃចំនួនអតិថិជន។
យោងតាមរបាយការណ៍កាសែត បាងកកប៉ុស្តិ៍ បានឱ្យដឹងថា រដ្ឋាភិបាលថៃកំពុងធ្វើវិធានការជំរុញតម្រូវការទេសចរណ៍។ ជាក់ស្តែង ក្រសួងទេសចរណ៍ និងកីឡារបស់ប្រទេសនេះមានបំណងផ្តល់សំបុត្រយន្តហោះក្នុងស្រុកដោយឥតគិតថ្លៃដល់ភ្ញៀវបរទេសចំនួន ២០ម៉ឺននាក់ ក្នុងកិច្ចខិតខំប្រឹងប្រែងជំរុញទេសចរណ៍នៅទូទាំងប្រទេសក្នុងរយៈពេល៣ខែ។ ក្រសួងរំពឹងថា គំនិតផ្តួចផ្តើមនេះនឹងបង្កើតប្រាក់ចំណូលចំនួន ៨,៨ពាន់លានបាត ឬ ២៧៣លានដុល្លារអាមេរិក បើទោះជាគំនិតផ្តួចផ្តើមនេះ នៅតែទាមទារការយល់ព្រមពីគណៈរដ្ឋមន្ត្រីក៏ដោយ។
គិតត្រឹមថ្ងៃទី១៧ ខែសីហា ឆ្នាំ២០២៥ ប្រទេសថៃទទួលស្វាគមន៍ភ្ញៀវទេសចរបរទេសសរុបចំនួន ២០,៨លាននាក់ ពោលមានការថយចុះ ៧% បើធៀបនឹងឆ្នាំមុន។ ទីផ្សារធំជាងគេគឺភ្ញៀវទេសចរចិនដែលមានចំនួន ២,៩លាននាក់៕ ប្រភព ៖ VnExpress
ចែករំលែកព័តមាននេះ