ហួសថ្លែង! កា.ប់ឪពុកបង្កើតជាប់គុ.កជាង២ឆ្នាំទើបចេញបានជាង២០ថ្ងៃដេញចា.ក់ម្ដាយនិងអ្នកភូមិមិនបាន ចា.ក់ខ្លួនឯង
- ភ្នំពេញ
រាជធានីភ្នំពេញ៖ បុរសញៀនថ្នាំម្នាក់ធ្លាប់ជាប់នៅមណ្ឌលកែប្រែគ្រឿងញៀនចំនួន៤លើកនិងធ្លាប់ជាប់ពន្ធនាគារព្រៃ១ដងរយៈពេលជាង២ឆ្នាំដោយសារតែកាប់ឪពុកបង្កើតរបស់ខ្លួនឯង បណ្ដាលឲ្យរងរបួសធ្ងន់ធ្ងរ ។ បន្ទាប់មកទើបតែចេញពីគុកមានសេរីភាពឡើងវិញបានរយៈពេល២៤ថ្ងៃប៉ុណ្ណោះ ប៉ុន្តែមិនបានរាងចាលឬកែខ្លួននោះឡើយ នៅតែបន្តប្រើប្រាស់ថ្នាំញៀនរហូតដល់កម្រិតបែកថ្នាំ ក៏បានកាន់កាំបិតដេញចាក់អ្នកភូមិតែមិនបណ្ដាលឲ្យមានអ្នកត្រូវរបួសទេ ។ ពេលនោះក៏ត្រូវបានម្ដាយបង្កើតចាប់ដាក់ឃុំនៅក្នុងផ្ទះ ស្រាប់តែបុរសនេះហែកជញ្ជាំងស័ង្កសីរត់ចេញក្រៅរួច ក៏ដេញចាក់ម្ដាយបង្កើតទៀត ប៉ុន្តែខឹងចាក់ម្ដាយអត់បាន ជននោះក៏ចាក់ពោះខ្លួនឯង បណ្ដាលឱ្យរងរបួសយ៉ាងដំណំ និងត្រូវនគរបាលឃាត់ខ្លួនតែម្ដង ។
ហេតុការណ៍នោះបានកើតឡើងកាលពីវេលាម៉ោង២និង២០នាទីរសៀលថ្ងៃទី២៧ ខែកក្កដា ឆ្នាំ២០២៦ ស្ថិតនៅក្នុងភូមិអង្គកែវ សង្កាត់ចោមចៅទី៣ ខណ្ឌពោធិ៍សែនជ័យ រាជធានីភ្នំពេញ។
ជនសង្ស័យឈ្មោះ លីវ ជាតិឡេង អាយុ៣៧ឆ្នាំ មានទីលំនៅបច្ចុប្បន្នស្ថិតនៅភូមិអង្គកែវ សង្កាត់ចោមចៅទី៣ រងរបួសរយះពោះ គ្រូពេទ្យនៃមន្ទីរសម្រាកព្យាបាលសុភ័ក្ត្រវិសាល ដេររបួសចំនួន០៥ថ្នេរ ហើយនគរបាលក៏ដកហូតបានកាំបិតចិតបន្លែប្រឡាក់ឈាម០១ដើមពីជនបែកថ្នាំនេះផងដែរ ។
សមត្ថកិច្ចបានប្រាប់ថា នៅវេលាម៉ោងខាងលើ បុរសនោះបានបែកថ្នាំរវើរវាយលែងដឹងខុសត្រូវ និងមានចរិកកាចសាហាវ ក៏កាន់កាំបិតចិតបន្លែខាងលើដេញចាក់អ្នកភូមិនិងអ្នកដំណើរតាមផ្លូវ បង្កឲ្យមានការភ័យខ្លាចគ្រប់គ្នា ។ បន្ទាប់ពីបានឃើញសកម្មភាពកូនប្រុសបែបនេះ ស្ត្រីជាម្ដាយបង្កើតបានចាប់ដាក់នៅក្នុងផ្ទះ ចាក់សោពីក្រៅ ស្រាប់តែបុរសនោះហែលជញ្ជាំផ្ទះស័ង្កសីចេញក្រៅបាន ក៏ទាញកាំបិតដេញចាក់ម្ដាយរបស់ខ្លួន ប៉ុន្តែខឹងចាក់អត់បានជនខាងលើក៏បានចាក់ពោះខ្លួនឯង បណ្ដាលឱ្យរងរបួសយ៉ាងដំណំ ។
សមត្ថកិច្ចបានប្រាប់ឲ្យដឹងបន្តថា ខណៈនោះស្ត្រីជាម្ដាយ និងប្រជាពលរដ្ឋបានប្ដឹងនគរបាលប៉ុស្តិ៍ចោមចៅទី៣ឲ្យជួយអន្តរាគមន៍ ហើយគាប់ជួននគរបាលកំពុងល្បាតនៅជិតនោះស្រាប់ ក៏ទៅធ្វើការឃាត់ខ្លួនជននោះបានភ្លាមៗ ។ បន្ទាប់មកនគរបាលនិងស្ត្រីជាម្ដាយបានបញ្ជូនបុរសនេះទៅសង្គ្រោះនៅមន្ទីរសម្រាកព្យាបាលសុភ័ក្ត្រវិសាលហើយក្រោយគ្រូពេទ្យដេររបួសចំនួន០៥ថ្នេររួច នគរបាលក៏បាននាំខ្លួនជននោះទៅកាន់ប៉ុស្តិ៍នគរបាលរដ្ឋបាលចោមចៅ៣ ដើម្បីចាត់ការបន្តតាមច្បាប់ ។
បើតាមស្ត្រីជាម្ដាយបាននិយាយថា កូនប្រុសគាត់រូបនេះបានប្រើប្រាស់គ្រឿងញៀនដល់កម្រិតបែកថ្នាំទៅហើយ កន្លងមកគាត់និងក្រុមគ្រួសារបានបញ្ជូនទៅកាន់មណ្ឌលកែប្រែបន្សាបគ្រឿងញៀនចំនួន៤លើករួចមកហើយដែរ ប៉ុន្តែកូនប្រុសនេះមិនត្រឹមតែមិនអាចផ្ដាច់គ្រឿងញៀននោះទេថែមទាំងញៀនកាន់តែខ្លាំងជាងមុនទៀត ។ ដោយឡែកកាលពីជា២ឆ្នាំមុនកូនប្រុសនេះបែកថ្នាំបានកាប់ឪពុកបង្កើ បណ្ដាលឲ្យរងរបួសធ្ងន់ធ្ងរ ហើយត្រូវនគរបាលឃាត់ខ្លួនបញ្ជូនទៅតុលាការ និងបានជាប់ពន្ធនាគាររយៈពេល២ឆ្នាំ៣ខែ ដោយទើបតែចេញមកវិញបានរយៈពេល២៤ថ្ងៃប៉ុណ្ណោះ ក៏ប្រព្រឹត្តទង្វើកាចសាហាវបែបនេះជាថ្មីទៀត ៕
ចែករំលែកព័តមាននេះ