ប្រទេសជប៉ុន ៖ បុរសម្នាក់មកពីខេត្តអូកាយ៉ាម៉ា (Okayama) ប្រទេសជប៉ុន ត្រូវបានចាប់ខ្លួនពីបទក្លែងបន្លំធ្វើជាកំពូលមហាសេដ្ឋីសញ្ជាតិអាមេរិក លោក Elon Musk នៅលើបណ្តាញទំនាក់ទំនងសង្គម និងបានបោកប្រាស់ស្ត្រីអាយុ៦៥ឆ្នាំម្នាក់ នៅទីក្រុងកាមីអាម៉ាគូសា (Kamiamakusa) ខេត្តគូម៉ាម៉ូតូ (Kumamoto) អស់ ៧០ ម៉ឺនយ៉េន ឬប្រហែល ៤ ៣០០ ដុល្លារអាមេរិក។ នេះបើយោងតាមប្រភពពីសារព័ត៌មាន Japan Today និង TKUofficial ចេញផ្សាយកាលពីថ្ងៃទី២៦ ខែកក្កដា ឆ្នាំ២០២៦។
ទូរទស្សន៍ NTV បានរាយការណ៍ថា បុរសដែលត្រូវចាប់ខ្លួនពីបទសង្ស័យខាងលើ មានឈ្មោះថា រ្យូយ៉ា អូណូ (Ryoya Ono) អាយុ៣១ឆ្នាំ មុខរបរបុគ្គលិកក្រុមហ៊ុន រស់នៅទីក្រុងគូរ៉ាស៊ីគី (Kurashiki) ខេត្តអូកាយ៉ាម៉ា។
បើតាមការអះអាងរបស់សមត្ថកិច្ចបានឱ្យដឹងថា កាលពីអំឡុងខែមីនា ឆ្នាំ ២០២៥ ជនសង្ស័យបានសហការជាមួយបក្សពួកម្នាក់ទៀត ផ្ញើសារផ្ទាល់ចេញពីគណនីក្លែងក្លាយមួយទៅកាន់ស្ត្រីរងគ្រោះ ដែលជាចុចអ្នកតាមដានគណនីរបស់លោក Elon Musk នៅលើបណ្តាញសង្គម X ហើយបានលួងលោមស្ត្រីរងគ្រោះឱ្យទៅប្រើប្រាស់កម្មវិធី LINE។ សារអស់ទាំងនោះមានខ្លឹមសារភូតកុហកដូចជា «ខ្ញុំពិតជាចូលចិត្តអ្នក» «ខ្ញុំស្រឡាញ់អ្នកខ្លាំងណាស់» «អ្នកត្រូវតែស្តាប់ខ្ញុំ ខ្ញុំត្រូវការឱ្យអ្នកផ្ញើលុយឱ្យខ្ញុំ ៥០ ម៉ឺនយ៉េនឥឡូវនេះ» និង «បើអ្នកទិញកាតអ្នកគាំទ្រ អ្នកនឹងអាចជួបខ្ញុំបានច្រើនដង» ជាដើម។
ជនសង្ស័យត្រូវបានចោទប្រកាន់ថា បានបោកប្រាស់ប្រាក់ពីស្ត្រីរងគ្រោះសរុបចំនួន ៧០ ម៉ឺនយ៉េន កាលពីខែកញ្ញា និងខែធ្នូ ឆ្នាំ ២០២៥។ ស្ត្រីរងគ្រោះបានសង្ស័យថា ខ្លួនចាញ់បោកគេ កាលពីខែកញ្ញា ឆ្នាំ ២០២៥ ហើយបានដាក់ពាក្យបណ្តឹងទៅប៉ូលិស ប៉ុន្តែទោះយ៉ាងណាក៏ដោយ ស្ត្រីរងគ្រោះនៅតែបន្តទាក់ទងជាមួយក្រុមជនសង្ស័យ ហើយក៏ត្រូវ គេបោកប្រាស់ម្តងទៀត កាលពីខែធ្នូ។
សមត្ថកិច្ចជឿថា ជនសង្ស័យ និងបក្សពួកបានផ្ញើរូបភាព ព្រមទាំងវីដេអូដែលបង្កើតឡើងដោយបច្ចេកវិទ្យា AI ទៅឱ្យស្ត្រីរងគ្រោះ ដែលធ្វើឱ្យគាត់ជឿស្លុងថា លោក Elon Musk មហាសេដ្ឋីមានបំផុតនៅលើពិភពលោកពិតជាចូលចិត្តគាត់ និងមានទំនាក់ទំនងពិសេសជាមួយគាត់មែន។ ទោះយ៉ាងណាក៏ដោយ ការស៊ើបអង្កេតរបស់ប៉ូលិសបានលាតត្រដាងថា ស្ត្រីរូបនោះបានផ្ទេរលុយសរុបដល់ទៅ ១,៨៥ លានយ៉េន ឬជាង ១១ ០០០ ដុល្លារអាមេរិក ដូច្នេះប៉ូលិសកំពុងស្វែងរកចំនួនទឹកប្រាក់ដែលនៅសល់ផ្សេងទៀត។
ប៉ូលិសបានបន្តថា ជនសង្ស័យបានបដិសេធការចោទប្រកាន់មួយចំនួន ដោយនិយាយថា ខ្លួនពិតជាបានទទួលលុយមែន ប៉ុន្តែមិនបានដឹងអ្វីផ្សេងទៀតទេ។ បច្ចុប្បន្នប៉ូលិសកំពុងបន្តស៊ើបអង្កេតថា តើមានជនរងគ្រោះផ្សេងទៀត ដែលចាញ់បោកតាមទម្រង់ស្រដៀងគ្នានេះដែរឬទេ?
ចែករំលែកព័តមាននេះ