រាជធានីភ្នំពេញ ៖ ខណៈដែលប្រទេសកម្ពុជាកំពុងខិតខំប្រឹងប្រែងបង្កើតនូវផលិតផលទេសចរណ៍ថ្មីៗដើម្បីទាក់ទាញទេសចរមកទស្សនាកម្ពុជាឲ្យស្នាក់នៅក្នុងរយៈពេលយូរ កម្ពុជាក៏កំពុងប្រឈមបញ្ហានៃការខ្វះធនធានមនុស្សក្នុងវិស័យនេះផងដែរ ។
លោក ហោ មុនីរ័ត្ន រដ្ឋលេខាធិការក្រសួងទេសចរណ៍បានមានប្រសាសន៍ឲ្យដឹងថា នាពេលបច្ចុប្បន្ន អ្នកកំពុងបម្រើការងារក្នុងវិស័យទេសចរណ៍មានចំនួនប្រមាណតែ ២០% ប៉ុណ្ណោះ ដែលបានឆ្លងកាត់ការសិក្សាជំនាញទេសចរណ៍ តាមសាលាបណ្ដុះបណ្ដាលវិជ្ជាជីវៈទេសចរណ៍ សាកលវិទ្យាល័យទេសចរណ៍ និងវគ្គបណ្ដុះបណ្ដាលខ្លីៗ។ លោករដ្ឋលេខាធិការបានបន្តទៀតថា «ដើម្បីឆ្លើយតបនឹងកំណើនទេសចរ នៅឆ្នាំ២០២០ កម្ពុជាត្រូវការកម្លាំងពលកម្មថ្មីចំនួនប្រមាណ ២០ម៉ឺននាក់ បន្ថែមទៀត។ ដូចនេះ ក្រសួងទេសចរណ៍កំពុងដោះស្រាយបញ្ហាប្រឈមខាងលើ ពោលគឺត្រូវជំរុញការបណ្តុះបណ្តាលកម្លាំងពលកម្មថ្មី និងបំពាក់បំប៉នជំនាញបន្ថែមទៀតដល់អ្នកកំពុងបម្រើការងារក្នុងវិស័យទេសចរណ៍» ។
ថ្លែងនៅកម្មវិធីបើកវគ្គបណ្ដុះបណ្ដាលស្តីពី «ការអភិវឌ្ឍ និងការគ្រប់គ្រងឧស្សាហកម្មទេសចរណ៍កម្ពុជាឆ្ពោះទៅឧស្សាហកម្ម ៤.០» ដើម្បីរួមចំណែកបំពេញតម្រូវធនធានមនុស្ស ក្នុងវិស័យទេសចរណ៍ ធ្វើយ៉ាងណាឱ្យពួកគេទទួលបាននូវចំណេះដឹង ពាក់ព័ន្ធនឹងការរីកចម្រើន នៃបច្ចេកវិទ្យាឌីជីថល ដែលត្រូវបានរៀបចំសហការរវាងក្រសួងទេសចរណ៍ជាមួយមន្ទីរពាណិជ្ជកម្មខេត្តហៃណាន នៃសាធារណរដ្ឋប្រជាមានិតចិននាថ្ងៃទី១២ ខែសីហា ឆ្នាំ២០១៩ លោក ហោ មុនីរ័ត្ន បានបញ្ជាក់ថាពាក់ព័ន្ធនឹងបញ្ហាខាងលើ ក្រសួងទេសចរណ៍បាននិងកំពុងដាក់ឱ្យអនុវត្តនូវយុទ្ធសាស្ត្រស្ដីពី ការអភិវឌ្ឍវិស័យទេសចរណ៍ឌីជីថល ដូចជាការចុះបញ្ជីអាជ្ញាបណ្ណទេសចរណ៍តាមប្រព័ន្ធ Online ប្រព័ន្ធចំណាត់ថ្នាក់សណ្ឋាគារ និងភោជនីយដ្ឋាន Online ប្រព័ន្ធគ្រប់គ្រងមគ្គុទេ្ទសក៍ទេសចរណ៍ Online ប្រព័ន្ធវាយតម្លៃចលនាប្រឡងប្រណាំង «ទីក្រុងស្អាត រមណីយដ្ឋានស្អាត សេវាល្អ បដិសណ្ឋារកិច្ចល្អ» តាមប្រព័ន្ធ QR-Code និងប្រព័ន្ធទូរស័ព្ទវៃឆ្លាត ព្រមជាមួយការរីកចម្រើននៃមធ្យោបាយទូទាត់សម្រាប់ទេសចរណ៍តាមប្រព័ន្ធ QR-Code មធ្យោបាយដឹកជញ្ជូនវៃឆ្លាត ជាដើម។ លើសពីនេះ ក្រសួងទេសចរណ៍ក៏បាននិងកំពុងរៀបចំឯកសារយុទ្ធសាស្ត្រអភិវឌ្ឍន៍ទេសចរណ៍ឌីជីថល ឆ្នាំ២០២០-២០២៣ ដែលជាឯកសារគោលសម្រាប់ជំរុញការប្រើប្រាស់ និងអភិវឌ្ឍបច្ចេកវិទ្យាឌីជីថល សម្រាប់ឧស្សាហកម្មទេសចរណ៍កម្ពុជា ឆ្ពោះទៅរកបដិវត្តឧស្សាហកម្មទី៤ ដែលកំពុងបង្ហាញពីការរីកចម្រើននៃបច្ចេកវិទ្យាពិភពលោក ដែលជះឥទ្ធិពលយ៉ាងខ្លាំងលើការកំណត់ឡើងវិញនូវកត្តាផលិតកម្ម ការគ្រប់គ្រង ឥរិយាបថនៃការប្រើប្រាស់ និងរចនាសម្ព័នសេដ្ឋកិច្ច ។
សូមបញ្ជាក់ថានាឆ្នាំ២០១៨ កម្ពុជាទទួលបានទេសចរអន្តរជាតិជាង ៦.២លាននាក់ កើនឡើង ១០.៧% និងនាំមកនូវប្រាក់ចំណូលប្រមាណ ៤.៣៥៦លានដុល្លារ។ នៅឆ្នាំ២០១៩ កម្ពុជារំពឹងថានឹងទទួលភ្ញៀវទេសចរអន្តរជាតិប្រមាណ ៦.៧លាននាក់ ហើយនៅឆ្នាំ២០២០ ប្រមាណជាង ៧លាននាក់។ ប្រាកដណាស់ ភ្ញៀវទេសចរចិន គឺជាទីផ្សារដែលធំជាងគេលេខមួយរបស់កម្ពុជា ក្នុង
រយៈពេលប៉ុន្មានឆ្នាំមកនេះ។ នៅឆ្នាំ២០១៨ កន្លងទៅ កម្ពុជាទទួលបានទេសចរចិនចំនួន ២លាននាក់ កើនឡើង ៣៣% ហើយនៅឆ្នាំ២០១៩នេះ យើងរំពឹងថាទេសចរចិននឹងកើនឡើងដល់ ២.៦លាននាក់ និង ៣លាននាក់ នៅឆ្នាំ២០២០» ៕ កែសម្រួលដោយ ៖ សុឃាក់
ចែករំលែកព័តមាននេះ