ប្រទេសកូរ៉េខាងជើង ៖ សេនាធិការដ្ឋានកងទ័ពកូរ៉េខាងត្បូងរាយការណ៍ថា កូរ៉េខាងជើងកាលពីថ្ងៃទី១៦សីហាបានបាញ់មីស៊ីល២គ្រាប់ថ្មីទៀតដែលហោះទៅធ្លាក់ក្នុងសមុទ្រ។
មីស៊ីលទាំង២គ្រាប់នោះត្រូវបានបាញ់ចេញពីតំបន់ជាយក្រុងTUNGCHON ជាទីក្រុងមួយនៃខេត្តKANGWONស្ថិតនៅភាគអាគ្នេយ៍កូរ៉េខាងជើង ហើយទៅធ្លាក់ក្នុងសមុទ្រខាងកើតដែលក៏ហៅថាសមុទ្រជប៉ុនផងដែរ។ កងទ័ពកូរ៉េខាងជើងបានតាមដានសភាពការណ៍ក្រែងមានការបាញ់មីស៊ីលឯទៀតៗ។
នេះជាការបាញ់មីស៊ីលលើកទី៦ហើយរបស់កូរ៉េខាងជើង ចាប់តាំងពីដំណាច់ខែកក្កដាមក។ មេដឹកនាំកូរ៉េខាងជើង លោកគីមជុងអ៊ុនថ្លែងកាលពីដើមខែសីហាថា ការបាញ់មីស៊ីលទាំងនោះគឹជាការព្រមានជាមហាឡារិក ចំពោះកូរ៉េខាងត្បូងនិងសហរដ្ឋអាមេរិក មកពីការធ្វើសមយុទ្ធយោធារួមរបស់ប្រទេសទាំង២ ជាសមយុទ្ធដែលក្រុងព្យុងយ៉ាងមិនសប្បាយចិត្ត។
គណៈកម្មាធិការដើម្បីការបង្រួបបង្រួមប្រទេសដោយសន្តិវិធី ជាស្ថាប័នមួយរបស់រដ្ឋអំណាចកូរ៉េខាងជើង ប្រកាសនាថ្ងៃទី១៦សីហាក្នុងសេចក្ដីប្រកាសមួយថា ខ្លួនបដិសេធសេចក្ដីថ្លែងការណ៍កាលពីថ្ងៃទី១៥សីហា របស់ប្រធានាធិបតីកូរ៉េខាងត្បូង លោកMOON JAE INដែលថា ទិសដៅរបស់លោកគឺធ្វើឲ្យសម្រេចសន្តិភាពនិងការបង្រួមបង្រួមប្រទេសរហូតដល់ឆ្នាំ២០៤៥ឯណោះ ខណៈអាណត្តិប្រធានាធិបតីរបស់លោកត្រូវចប់នាឆ្នាំ២០២២។
សេចក្ដីប្រកាសរបស់កូរ៉េខាងជើង បានចោទប្រកាន់ក្រុងសេអ៊ូលថា ជាអ្នកទទួលខុសត្រូវលើការផ្អាកការចរចាអន្តរកូរ៉េ ហើយមិនអនុវត្តសេចក្ដីថ្លែងការណ៍នៅប៉ានមុនហ្សូម៕ (កែសម្រួលដោយ ៖ បុប្ផា)
ចែករំលែកព័តមាននេះ