ទីក្រុងកៀវ៖ សម្រាប់ឆ្នាំនេះ គិតពីដើមឆ្នាំរហូតដល់បច្ចុប្បន្ន កងទ័ពរុស្ស៊ីវាយដណ្ដើមបានដីអ៊ុយក្រែន១៧០០គីឡូម៉ែត្រការ៉េថែមទៀត។ រុស្ស៊ីក៏កំពុងវាយសម្រុកទៅមុខនៅក្នុងអ្វីដែលខ្លួនហៅថាការបង្កើតតំបន់ខ្សែក្រវាត់ការពារនៃតំបន់ដុនបាស់។ ខាងលើនេះជាការអះអាងរបស់មេបញ្ជាការកំពូលរបស់រុស្ស៊ី។ លោកថ្លែងដូច្នេះនៅពេលចុះត្រួតពិនិត្យមើលកងទ័ព។
នាយអគ្គសេនាធិការកងទ័ពរុស្ស៊ី ឧត្ដមសេនីយ៍វ៉ាល់ឡឺរី ហ្គេរ៉ាស៊ីម៉ូស (Valery Gerasimov) ថ្លែងថាចាប់តាំងពីដើមឆ្នាំនេះ កងទ័ពយើងវាយដណ្ដើមបានទីតាំងសរុប៨០កន្លែងដែលមានទំហំជាង១៧០០គីឡូម៉ែត្រការ៉េ។ ឧត្ដមសេនីយ៍រូបនេះថ្លែងបន្តទៀតថាកងទ័ពនៅភាគខាងត្បូងបន្តវាយប្រហារតំបន់ខ្សែក្រវាត់ការពារតំបន់ដុនបាស់។ ទីនេះមានទីក្រុងជាច្រើនដូចជាស្លូវីយ៉ង់ (Sloviansk), ក្រាម៉ាតស់ (Kramatorsk) និងកូស្ទីយ៉ង់ទីនីកា (Kostiantynivka)។ លោកថាកងទ័ពរុស្ស៊ីវាយកាន់តែកៀកនឹងទីក្រុងស្លូវីយ៉ង់ និងក្រាម៉ាតស់ហើយ នៅសល់តែ៧ទៅ១២គីឡូម៉ែត្រទៀតតែប៉ុណ្ណោះ។
លោកថ្លែងបន្តទៀតថាកងឯកភាពរបស់រុស្ស៊ីចាប់ផ្ដើមវាយប្រហារចូលទីក្រុងកូស្ទីយ៉ង់ទីនីកាជាបណ្ដើរៗហើយ។ ក្រៅពីនេះ លោកថាកងទ័ពរុស្ស៊ីក៏កំពុងវាយសម្រុកទៅមុខនៅតំបន់ស៊ូមីនៅភាគខាងជើង និងតំបន់ខាគីវនៅភាគឦសានដើម្បីបង្កើតនូវអ្វីដែលលោកហៅថា «តំបន់សន្តិសុខ»។ បើគេស្ដាប់ពីខាងភាគីអ៊ុយក្រែនវិញម្ដង អ៊ុយក្រែនអះអាងថាយោធារបស់ខ្លួនបានបញ្ឈប់ការប៉ុនប៉ង២លើករបស់រុស្ស៊ីដែលចង់វាយយកភូមិមួយចំនួននៅក្បែរតំបន់ស្លូវីយ៉ង់នារយៈពេល២៤ម៉ោងចុងក្រោយ។ រុស្ស៊ីក៏បើកការវាយប្រហារ១៩លើកក្បែរតំបន់កូស្ទីយ៉ង់ទីនីកា និង៨ដងក្បែរភូមិជាច្រើននៅក្បែរនោះ។
កងទ័ពរុស្ស៊ីក៏ប៉ុនប៉ងវាយទម្លុះខ្សែការពាររបស់អ៊ុយក្រែននៅតំបន់ខាគីវដែលកៀកនឹងព្រំដែនរុស្ស៊ីផងដែរ។ យោងតាមការប៉ាន់ស្មានរបស់រុស្ស៊ី សព្វថ្ងៃនេះកងទ័ពរុស្ស៊ីកាន់កាប់តំបន់ដុនបាស់៩០%, ហ្សាប៉ូរីហ្សៀ៧៥% និងខឺសុន៧៥%ដូចគ្នា។ ក្រៅពីនេះរុស្ស៊ីកាន់កាប់បានមួយចំណែកនូវតំបន់ខាគីវ (Kharkiv), ស៊ូមី (Sumy), មីកូឡាយ (Mykolaiv) និងឌីនីប្រូប៉េត្រូស (Dnipropetrovsk)។ តាមរយៈផែនទីដែលគូសដោយក្រុមគាំទ្ររុស្ស៊ី កងទ័ពរុស្ស៊ីកាន់កាប់ទឹកដីអ៊ុយក្រែន១១៦ ៧៩៣គីឡូម៉ែត្រការ៉េ ឬប្រហាក់ប្រហែលនឹង១៩,៣៥%នៃទឹកដីអ៊ុយក្រែនសរុប៕ ប្រភព៖ រ៉យទ័រ និងប្រភពដទៃទៀត
ចែករំលែកព័តមាននេះ