ខេត្តបន្ទាយមានជ័យ ៖ ទំនៀមទម្លាប់មួយ ដែលប្រហែលមានតែវត្តបឹងត្រាវមួយប៉ុណ្ណោះ ស្ថិតក្នុងស្រុកមង្គលបុរី ដែលក្នុងចេតនារៃអង្គាសបច្ច័យសម្រាប់កសាងវត្ត ដោយវិធីរៀបមង្គលការយុវជនដែលស្ម័គ្រចិត្ត ដើរតួជាកូនកំលោះ-ក្រមុំរៀបការ ដើម្បីប្រមូលបច្ច័យជួយកសាងវត្ត ។…
ខេត្តបន្ទាយមានជ័យ ៖ ទំនៀមទម្លាប់មួយ ដែលប្រហែលមានតែវត្តបឹងត្រាវមួយប៉ុណ្ណោះ ស្ថិតក្នុងស្រុកមង្គលបុរី ដែលក្នុងចេតនារៃអង្គាសបច្ច័យសម្រាប់កសាងវត្ត ដោយវិធីរៀបមង្គលការយុវជនដែលស្ម័គ្រចិត្ត ដើរតួជាកូនកំលោះ-ក្រមុំរៀបការ ដើម្បីប្រមូលបច្ច័យជួយកសាងវត្ត ។ វត្តបឹងត្រាវតែងប្រារពពិធីមង្គលការយុវវ័យនេះ ក្នុងឱកាសបុណ្យចូលឆ្នាំថ្មីប្រពៃណីខ្មែរ ១ឆ្នាំម្ដង មានយុវជន១គូទៅ២គូដែលស្ម័គ្ររៀបការក្នុងវត្ត ។
ក្នុងពិធីមង្គលការយុវវ័យស្ម័គ្រចិត្តនៅវត្តបឹងត្រាវ គេឃើញមានវត្តមានមេភូមិ មេឃុំ អភិបាលស្រុកមង្គលបុរី និងចាស់ទុំ ព្រមទាំងប្រជាពលរដ្ឋជាច្រើនបានចូលរួម ដោយធ្វើទៅតាមប្រពៃណីខ្មែរ ដូចការរៀបអាពាហ៍ពិពាហ៍ពិតៗ តែធ្វើឡើងដោយកាត់ៗឱ្យខ្លី ដើម្បីរកបច្ច័យកសាង និងបង្កភាពអធិកអធមក្នុងវត្ត ។
ការរៀបមង្គលការយុវវ័យស្ម័គ្រចិត្តនេះ មិនមែនជាការពិត ឬរៀបការយកគ្នាជាប្តីប្រពន្ធនោះឡើយ គឺធ្វើឡើងសម្រាប់តែកៀងគរបច្ច័យពីបងប្អូនដែលបានមកចូលរួមក្នុងឱកាសបុណ្យចូលឆ្នាំថ្មីប្រពៃណីខ្មែរ ។ តាមពិតទៅ វត្តបឹងត្រាវនេះ ត្រូវបានរៀបចំធ្វើឡើងរៀងរាល់ឆ្នាំ នៅពេលបុណ្យចូលឆ្នាំថ្មី ហើយមានយុវជនស្ម័គ្រចិត្តបានរៀបការ ក្នុង១ឆ្នាំមានពី១គូទៅ២គូ ។
គណៈកម្មការអាចារ្យវត្តបឹងត្រាវបានប្រាប់ថា ពិធីមង្គលការយុវវ័យស្ម័គ្រចិត្តនេះ ត្រូវបានធ្វើឡើងតាំងពីសម័យដើមរហូតដល់ពេលនេះ នៅតែបន្តធ្វើដូចជាពិធីលើកជំនូន និងផ្ទឹមសែនចងដៃ ដោយមានអាជ្ញាធរស្រុក ឃុំ ភូមិ និងប្រជាពលរដ្ឋជាច្រើនបានចូលរួម ដើម្បីបានបរិច្ចាគថវិកាពីចងដៃកូនកំលោះ-កូនក្រមុំ មកយកសម្រាប់កសាងវត្ត ។ តាមលោកអាចារ្យថា ក្នុងឱកាសបុណ្យចូលឆ្នាំនេះ មាន៣ថ្ងៃ តែឆ្នាំនេះ មានគូស្ម័គ្រចិត្តតែ២គូទេ បានរៀបចំ១ថ្ងៃ១គូ ។
គណៈកម្មការអាចារ្យវត្តបឹងត្រាវ បានប្រាប់អ្នកយកព័ត៌មានថា យុវជន និងយុវនារី ជាកូនចៅអ្នកភូមិរស់នៅក្នុងឃុំបត់ត្រង់ តែងបានស្ម័គ្រចិត្តរៀបមង្គលការជាមួយគ្នា ក្នុងចេតនារៃបច្ច័យកសាងវត្តតែប៉ុណ្ណោះ អត់មានផ្សំដំណេកទេ ។
ក្នុងកម្មវិធីនេះ កូនក្រមុំ និងកូនកំលោះ បានស្លៀកពាក់តុបតែងខ្លួនយ៉ាងស្អាតមកដល់វត្ត ដោយមានប្រជាពលរដ្ឋច្រើនកុះករបានចូលរួម ក្នុងនោះក៏មានការលើកជំនូនចម្រុះច្រើនគូ ចេញពីវត្តហែតាមផ្លូវជាតិអមទៅដោយភ្លេងខ្មែរ និងក្រុមឆៃយ៉ាំ រាំនាំមុខយ៉ាងឆ្ងាយ ទើបហែចូលមកក្នុងវត្តវិញ ។
ក្នុងពិធីបន្ទាប់ តាអាចារ្យឲ្យពរជ័យដល់កូនក្រមុំ និងកូនកំលោះ និងលោកមេឃុំ អ្នកមុខអ្នកការ ម្តាយកូនប្រុស ម្ដាយកូនស្រី និងប្រជាពលរដ្ឋចូលរួមកាត់សក់បង្កក់សិរី អ្នកចូលរួមនាំគ្នាសែនចងដៃយ៉ាងសប្បាយរីករាយ ។ បន្ទាប់មកទៀត កូនកំលោះបានតោងស្បៃកូនក្រមុំ បន្តទៅលេងល្បែងប្រជាប្រិយនានា ។ ពិធីនេះ ជាការរៀបចំសម្តែងមិនមែនយកគ្នាជាប្តីប្រពន្ធមែនទែននោះឡើយ ។ ចប់ពិធីកូនប្រុស-កូនស្រី ត្រឡប់ទៅផ្ទះរៀងៗខ្លួន ។
ទោះបីជាបែបណា មានការកោតសរសើរដល់យុវជនប្រុស-ស្រី ដែលបានស្ម័គ្រចិត្តដោយពុំមាន ការទើសទាល់ខ្មាសអៀននោះទេ គឺគោរពតាមប្រពៃណី ដើម្បីយកចំណងដៃមកកសាងវត្ត បើទោះបីអ្នកទាំងពីរពុំបានគ្នាជាប្តីប្រពន្ធពិតក៏ដោយ ។
គណៈកម្មការអាចារ្យវត្តថា ប្រពៃណីនេះ បានអនុវត្តតពីដូនតា ឲ្យតែចូលឆ្នាំម្តងៗ តែងតែធ្វើពិធីមិនដែលដាច់ គឺតាំងពីសម័យកាល៦០ឆ្នាំមុនមកម្ល៉េះ ។ ហើយពេលខ្លះការដល់ទៅ៥គូក៏មានដែរ តែនៅដំណាក់កាលជំនាន់កូវីដ-១៩ វត្តបឹងត្រាវផ្អាកដំណើរការបណ្តោះអាសន្ន ។ ក្រោយពីចប់កូវីដ-១៩ វត្តទូទាំងប្រទេសដំណើរការឡើងវិញ ទើបដំណើរការកម្មវិធីប្រពៃណីនេះក៏បានរៀបចំឡើងវិញ ។
គួររំលឹកថា វត្តបឹងត្រាវ និងវត្តកោះកេតអូរប្រាសាទ កាលពីសម័យមុន មានយុវវ័យខ្លះបានដឹកដៃគូសង្សា ឬមិត្តភក្តិជិតស្និទ្ធមកស្ម័គ្រចិត្តរៀបការរកបច្ច័យកសាងវត្ត ហើយគូខ្លះពេលត្រឡប់ទៅផ្ទះវិញ ចប់បុណ្យចូលឆ្នាំក៏ឱ្យឪពុកម្តាយចូលដណ្តឹងរៀបការជាគូស្វាមីភរិយាថ្មីក៏មានដែរ ។ ជាក់ ស្តែងឆ្នាំនេះ វត្តនៅស្រុកមង្គលបុរី គឺវត្តកោះកេតអូរប្រាសាទ និងវត្តរហាត់ទឹក នៅបន្តលេងរហូតដល់ថ្ងៃទី២០ មេសា ២០២៦ ទើបចប់សង្ក្រាន្តចូលឆ្នាំថ្មី ៕
ចែករំលែកព័តមាននេះ