ប្រទេសជប៉ុន ៖ ទីភ្នាក់ងារឧតុនិយមជប៉ុន បានព្រមានអំពីហានិភ័យខ្ពស់នៃមហាគ្រោះរញ្ជួយដីកម្រិត ៨,០ រ៉ិចទ័រ ឬក៏ខ្លាំងជាងនេះ នៅសប្តាហ៍ក្រោយ បន្ទាប់ពីគ្រោះរញ្ជួយដីដ៏ខ្លាំងមួយកម្រិត ៧,៧…
ប្រទេសជប៉ុន ៖ ទីភ្នាក់ងារឧតុនិយមជប៉ុន បានព្រមានអំពីហានិភ័យខ្ពស់នៃមហាគ្រោះរញ្ជួយដីកម្រិត ៨,០ រ៉ិចទ័រ ឬក៏ខ្លាំងជាងនេះ នៅសប្តាហ៍ក្រោយ បន្ទាប់ពីគ្រោះរញ្ជួយដីដ៏ខ្លាំងមួយកម្រិត ៧,៧ រ៉ិចទ័រ បានវាយប្រហារ ភាគខាងជើង កាលពីរសៀលថ្ងៃទី២០ ខែមេសា ឆ្នាំ២០២៦ ជំរុញឱ្យមានការចេញបទបញ្ជាជម្លៀសប្រជាជន និងការព្រមានអំពីរលកយក្សស៊ូណាមិកម្ពស់៣ម៉ែត្រ។ នេះបើតាមប្រភពពី NHK, Japan Today និង BBC ចេញផ្សាយនៅថ្ងៃទី២១ ខែមេសា ឆ្នាំ២០២៦។
តាមទីភ្នាក់ងារឧតុនិយមជប៉ុនបានរាយការណ៍ថា ប្រហែល៤០នាទី បន្ទាប់ពីការរញ្ជួយដី រលកយក្សស៊ូណាមិកម្ពស់ ៨០ សង់ទីម៉ែត្រ បានវាយប្រហារកំពង់ផែមួយនៅទីក្រុង Kujiខេត្ត Iwate ដែលដំបូងឡើយត្រូវបានប៉ាន់ប្រមាណថាមានកម្រិត ៧,៤ រ៉ិចទ័រ មុនពេលកែសម្រួលទៅដល់កម្រិត ៧,៧ រ៉ិចទ័រ។
ទីភ្នាក់ងារបានចេញការព្រមានពីរលកយក្សស៊ូណាមិសម្រាប់ខេត្ត Iwate និងឆ្នេរសមុទ្រខេត្ត Hokkaido និង Aomori នៅរសៀលថ្ងៃទី២០ ខែមេសា ដោយរលកយក្សដែលមានកម្ពស់រហូតដល់ ៣ ម៉ែត្រ អាចនឹងកើតឡើង។ ប៉ុន្តែទោះយ៉ាងណាក៏ដោយ ការព្រមានទាំងនោះ ត្រូវបានដកចេញវិញ នៅម៉ោង ១១:៤៥ នាទីយប់ (ម៉ោងក្នុងស្រុក)។
វីដេអូពីទូរទស្សន៍ជាតិជប៉ុន NHK មិនបានបង្ហាញពីការខូចខាតណាមួយនៅជុំវិញកំពង់ផែជាច្រើននៅខេត្ត Iwate នៅឡើយទេ។ ប៉ុន្តែមន្ត្រីបានបញ្ជាក់ជាថ្មីថា ការរញ្ជួយដីជាបន្តបន្ទាប់អាចវាយប្រហារតំបន់នេះក្នុងរយៈពេល១សប្តាហ៍ខាងមុខ ជាមួយហានិភ័យនៃការរញ្ជួយដីដល់កម្រិត ៨,០ រ៉ិចទ័រ ឬខ្ពស់ជាងនេះ ដែលត្រូវបានចាត់ថ្នាក់ចូលកម្រិត មហាគ្រោះរញ្ជួយដី (Mega Quake)។
ការជូនដំណឹងនេះគ្របដណ្ដប់លើក្រុងចំនួន ១៨២ នៅក្នុងខេត្ត Hokkaido, Aomori, Iwate, Miyagi, Fukushima, Ibaraki និង Chiba។ ប្រជាជននៅតំបន់ទាំងនោះ គួរតែអនុវត្តតាមការជូនដំណឹងនេះរហូតដល់ម៉ោង ៥ ល្ងាច ថ្ងៃចន្ទសប្តាហ៍ក្រោយ ប៉ុន្តែមិនបានអំពាវនាវឱ្យមានការជម្លៀសជាមុននោះទេ។
គួររំលឹកថា ប្រជាជនជប៉ុននៅតែដិតជាប់ស្លាកស្នាមភ័យរន្ធត់នៃគ្រោះរញ្ជួយដីដ៏សាហាវបំផុតកម្រិត ៩,០ រ៉ិចទ័រក្នុងឆ្នាំ ២០១១ នៅឆ្នេរសមុទ្រភាគខាងត្បូងនៃខេត្ត Iwate ដែលជាការរញ្ជួយដីដ៏ខ្លាំងក្លាបំផុតដែលខ្លួនបានកត់ត្រាទុក ដោយវាបង្កឱ្យមានរលកយក្សស៊ូណាមិសម្លាប់មនុស្សជាង ១៨ ០០០នាក់ និងបណ្តាលឱ្យមានការបំផ្លិចបំផ្លាញនៅរោងចក្រនុយក្លេអ៊ែរ Fukushima ដែលជាគ្រោះមហន្តរាយនុយក្លេអ៊ែរដ៏អាក្រក់បំផុតមួយក្នុងប្រវត្តិសាស្ត្រជប៉ុន៕
ចែករំលែកព័តមាននេះ